O KELUARAN 18
18
O Yitro wïadono o Musa
1O Yitro, o Musa ai toroa, ma imam o Midian matonakoka, woihene mangale hagala moi-moi wamomanarama ma Jou Madutu mangale o Musa deʼ o Israel manyawa, maöraha ünanga wätuda önanga o Mesir mabereraka deʼ yohupu. 2#Kel. 2:21-22 Done o Yitro woiki wïadono o Musa, womi ao o ngo Zipora, o Musa ngoi hekata kamogogogerohi o Midian matonakoka, 3#Kis. 7:29 imakomoteke deʼ o Gersom deʼ o Eliezer, aingohaka o nauru yahinoto. aingohaka madodihiraka wihiromanga o Gersom karana o Musa wato, ”Ngohi o dagi-dagino manyawa o berera mahomoaka”; 4aingohaka mahinotoka wihi romanga o Eliezer karana o Musa wato, ”Ma Jou Madutu ahi ete deʼ ahi tohora iwi huba-huba wohï riwoka deʼ wohi hihalamatoka ngohi hiädono ngohi wohitomaua ma koano Mesir”. 5O Yitro woböa imakomoteke de o Musa ngoi hekata deʼ ai ngohaka yahinoto o tonaka ikokakahaka mangï o Musa womä tau imahitigi-tigika ol̄oku itebi-tebinika. 6O Musa iwi hiabari önanga yoböa, 7done ünanga wohupu wäbuhuku önanga. Unanga watilabukuuku deʼ wohuba o Yitro ai himangoka deʼ wïame. Onanga imakeleha moi-moi manga röehe madumuloa, daha yowohama o Musa ai tau magoronaika. 8O Musa wohi jarita ai toroaika hagala moi-moi wadodiai ma Jou ma koanoika deʼ o Mesir manyawaika mangale wahihalamati o Israel manyawa. Unangö wohijarita mangale hagala mahuha de makangela yöhimanga o Israel manyawa o ngekomo mahoanika, deʼ sarakia ma Jou wahihalamati önanga. 9Woihene gënanga mata-mata o Yitro wamao womorene, 10deʼ wotemo, ”Iwi higogiriri ma Jou winihi hohalamati ngini ma koano deʼ o Mesir manyawa manga giama mahoatino! Iwi higogiriri ma Jou wahibebasoka o Israel manyawa yogogilaongo! 11Oraha nanga ngohi tohiöriki ma Jou iholoi wolamoko de o gikiri mata-mata, karana mata-mata gënanga Wadiai maöraha o Mesir manyawa okianaga yodiai o Israel manyawaika duru de manga ëdenge.” 12De ipaha o Yitro wa ao muruono naga o huhuba yatö tuhu-tuhuku deʼ o huhuba yatoa-toaka hokä ihi huba-huba ma Jou Madutuika. O Harun deʼ mata-mata o Israel manyawa manga tutuda yoböa deʼ yol̄omo imakomoteke de o Yitro ma Jou Ai himanga magoronaka.
O Musa wä goraka o Hakim-hakim
(Ul. 1:9-18)
13Yarehino mawange o Musa watailako imateke roributu o Israel manyawa manga hidogoronaka. O karajanga gënanga yaol̄omo o öraha kade o ngorumino hiädono yohutu. 14Maöraha o Yitro wamake mata-mata kokiani o Musa wakarajanga, ünanga wïleha, ”Okia dika kokiani nakarajanga mangale o nyawa neonanga? Mata-mata nënanga kokiani nakarajanga mahirete, hiädono mangale ani nasihati dika yogahoko, hagala o nyawa gënanga imaokoino nenangoka kade o ngorumino hiädono yohutu?”
15O Musa wohaluhu, ”Hagala o nyawa gënanga yoböa ngohino hupaya ihiöriki ma Jou Madutu Ai mau. 16Nako önanga imateke ributu, önanga ihï himanga ngohi hupaya taputuhu toönanga manga perekara, deʼ ngohi tahingahu onangika hagala o pareta deʼ ma Jou Madutu Ai tita.”
17O Yitro wato, ”Itorou hoko gënanga. 18De madodagi gënanga ngona nakangela ani diri mahirete, deʼ hagala o nyawaö gënanga. O karajanga gënanga kaima tengo duru iwöe holi. 19Noihene tongohi ahi nasihati, deʼ ma Jou Madutu aha wonïriwo. Igoungu yaoa ngona natagali o nyawa neönanga ma Jou Madutu Ai himangoka deʼ nao toönanga manga hali Unangika. 20Ngona kokiani nädotoko onangika ma Jou Madutu Aipareta deʼ nähitararono o wowango maoa-oa madodagi deʼ okia kokiani önanga yadiai. 21Mä de inoli gënanga ngona kokiani näiriki o nau-nauru yososawaro yamuruono naga, deʼ nätumutu önanga yodadi o tutuda o nyawa yaribuhu moi, yaratuhu moi, yamoritoa, deʼ yangimoi. Onanga kokiani o nyawa iwï modo-modongo deʼ iwi hingounu ma Jouika, yakunu yangaku deʼ yoluku yatarima o tiwi ouru mabokumu. 22Nähuloko önanga imadiai hokä o nyawa neönanga manga hakimi, moi-moi yaregu manga doomu. O manarama gënanga kokiani önanga yadiai de madatoro. Hagala o perekara ipöparalu yakunu önanga ihiadono ngonaika, mä o ributu maiteteke yakunu önanga mahirete yatiai. O hali gënanga aha inihi uwini ngona karana önanga yomodeke imahi tagongo. 23Nako ngona nadiai hoko gënanga, de o hali gënanga ma Jou Madutu wohipareta ngonaika, ngona aha kanakunu nadiai ani manarama, deʼ o nyawa mata-mata aha yolio de yamao yosanangi karana toönanga manga hali itaiti itiai.”
24O Musa wamoteke o Yitro ai nasihati, 25deʼ wäiriki o nyawa yososawaro o Israel manyawa manga hidogoronaka. Unanga wätumutu önanga yodadi o nyawa yäribuhu moi manga tutuda, yaratuhu moi, yamoritoa, deʼ yangimoi. 26Onanga ihidagi manga manarama hokä o hakimi o Israel manyawaika. Hagala o perekara duru ipoparalu önanga ihiädono o Musaika, mä o ributu maiteteke önanga mahirete yatiai. 27De ipaha o Musa wihigumal̄a o Yitro woiki deʼ o Yitro wolio ai bereraika.
Currently Selected:
O KELUARAN 18: TLB
Highlight
Share
Compare
Copy
Want to have your highlights saved across all your devices? Sign up or sign in
