O KELUARAN 15
15
O Musa ai nyanyi
1 #
Him. 15:3
Daha o Musa deʼ o Israel manyawa ihi nyanyi o nyanyi nënanga mangale iwi higiriri ma Jou,
”Ngohi tomau tihinyanyi ma Jou,
hababu Unanga woutumoka de macahaya.
Mata-mata o kuda de yobare-barenuku
yahikaweli o ngötuku.
2 #
Mzm. 118:14; Yes. 12:2 Ma Jou ahi roriwo wokö kua-kuata;
Unanga wohihi hohalamati ngohi.
Unanga ahi Jou madutu Unanga ngohi tomau tihigiriri
ma Jou Madutu ahi ete de ahi tohora iwi huba-huba,
Unanga ngohi tihimulia.
3Ma Jou gënanga o kapita yonau-nauru,
ma Jou, gënanga Ai romanga.
4O Mesir manga tentara deʼ mata-mata manga kurete
ihi kaweli o ngötuku.
O kokapita duru yonau-nauru
yalutu o Gelagah ma Ngötuku.
5Onanga o ngöto maluku-lukuku yalahiri,
deʼ hokä o helewo iuti matitiuku.
6Ani kuata duru yöheranga, ya Jou,
Nadiai koiwaka mia haturu nahi gogerewotoka.
7De Ani mulia ma amo-amoko
Nä binaha mata-mata ini lawa-lawani Ngona.
Ani dohata ihiru-hiru hokä o uku,
deʼ Nätuhuku önanga hokä o gandum maröehe madoolenge.
8O ngöto Ngona nawuwu, ma akere malulu magurutil̄e,
imaoko imatotiail̄e hokä o bebeno o mehele,
hiädono o tonaka o ngöto matimiuku yakunu yodilakuru.
9Mia haturu yato, ’Onanga aha taginïki deʼ tätagoko,
ahi oworo tatauril̄e, deʼ tabinaha önanga.
Daha mata-mata manga arata taora,
tohikodoku deʼ tajame hiädono tamao yaoaka.’
10Mä ma Jou deʼ mamoi dika wowohama
wadotagao o Mesirika o bodito mawange.
Onanga yalutu hokä o hori madodubuho,
o akere mamoku-moku malulu homodo-modongo magoronauku.
11O gikiri okia yakunu honihi tero de Ngona,
ya Jou duru no Momulia deʼ Notebini?
12O nagona yakunu yadiai ihöhera-heranga
de o manarama i ago-agomo hokä ma Jou?
Ngona nohi mongöika Ani giama maniraka,
done o haturu yohihanga o tonaka yalahiri.
13Ngona nätuda o nyawa Nahihalamatoka nënanga,
karana Ngona nosetia Ani jajika.
De o kuata ma amoko Ngona nähohongo
deʼ Nä tuda Ani tonaka itebi-tebinika.
14O hoana de o berera yogihene de yohahara;
o Filistin manyawa deʼ o Edom manga tutuda yoburakituku.
15O Moab manyawa yonönau-nauru kaima hidahaharuku,
o Kanaan manyawa manga hininga ieteke.
16Onanga duru yohawana
yahakihi ma Jou Ai kuata.
Maöraha Ani umati yakaino, o hö haturu yakunua yätumungu;
manga diri ihi oara o nyawa Nahibö bebasoka.
17Daha o Israeloka Nä ngotaka
o ngï Na iri-irikokaika mangale Nogogogere.
Onanga yogogere Ani doporono iTebi-tebinoka,
o Tauoka Ngona mahirete nohigö goko-goko.
18Ngona ma Jou o Koano,
no pareta kahiado-adonika.”
O ngo Miryam ami nyanyi
19Maöraha o Israel manyawa yatoaka o ngötoönanga i mädagi o tonaka madüdudungika. Mä maöraha o Mesir manga kureta de manga kuda deʼ yobö bare-barenuku yowohama o ngöto magoronauku. Ma Jou wadiai ma akere ihahuroli hiädono önanga yälutu.
20Daha o ngo Miryam, momatengo ma nabi o Harun ngoi hiranga o riaka, mal̄ë ami damunu, deʼ mata-mata o ngongoheka imakinïki yatakoro o damunu de yoselo. 21O ngo Miryam mo nyanyi mangale önanga,
”Ni nyanyi mangale ma Jou
hababu Unanga woutumoka de macahaya.
Mata-mata o kuda deʼ yoböbare-barenuku
yahikaweli o ngöto magoronauku.”
O akere ma mali-mali
22De ipaha o Musa wä ao o Israel manyawa o Gelagah ma Ngötoka de yodumutu o Syur matonaka ikokakahaika. Madekana o wange hange önanga yotagi yamakeua o akere. 23Daha önanga yadono moi o ngï maromanga o Mara, mä genangoka ma akere duru kahämali, hiädono yakunua yaokere. Hababu gënanga o ngï gënanga yahetongo o Mara, mamangarati mamali. 24Done hagala o nyawa gënanga yotaiana o Musaika deʼ iwi leha, ”Okia aha ngomi mia okere?” 25O Musa womaniata wagou-goungu ma Jouika, daha ma Jou wihimatoko unangika o gota o dobiki moi. O gota gënanga o Musa wohikaweli o akeruku, daha o akere gënanga idadi ma ake-akere, hiädono yakunu yaokere.
O ngïoka gënanga ma Jou wohi döaka o datoro-o datoro onangika, deʼ genangokaö Unanga wätaili önanga. 26Ma Jou wato, ”Nihihi moteke Ngohi nia gou-goungu, deʼ nia diai okia Ngohi tapulono yaoa; nia moteke mata-mata Ahi pareta. Nako ngini nidiai hoko gënanga, ngini aha Tinï hukumua de o panyake Tahitotapal̄uoka o Mesir manyawaika. Ngohi ma Jou tinihi togu-togumu ngini.”
27Iböto de gënanga önanga yadono moi o ngï ma romanga o Elim. Genangoka naga o jobubu ngimoi de hinoto deʼ o kurma ma utu moritumidi. Onanga imä tau ima hitigi-tigika o akerika gënanga.
Currently Selected:
O KELUARAN 15: TLB
Highlight
Share
Compare
Copy
Want to have your highlights saved across all your devices? Sign up or sign in
