O KELUARAN 13
13
O huhuba o ngohaka o riaka
1Ma Jou wïtemo o Musaika, 2#Bil. 3:12-13; Luk. 2:23 ”Nihihi huba Ngohino mata-mata nia ngohaka o nauru o riaka. Moi-moi o Israeloka manga ngohaka o nauru o riaka, deʼ moi-moi o aiwani i popaliara manauru madodihiraka i ngohaka, gënanga Tongohi.”
O roti i Ragi-ragi Ua ma Rameanga
3O Musa wätemo o Israel manyawaika, ”O wange nënanga ma Jou ngini winihi bebasi de Ai kuaha ma amo-amoko, hiädono ngini yakunu o Mesir mabereraka de nihupu, o ngï ngini imä gilaongo. Hababu gënanga, niohininga o wange nënanga. Uha nia ol̄omo o roti dema ragi-ragioka. 4O wange nënanga, o wange madodihiraka o Abib mamede ekola o mede madodihiraka, ngini nia mal̄a o Mesir maberera. 5De makoboto ma Jou wahi jaji nia ete de nia tohoraika la winihi döaka nginika o Kanaan manyawa manga berera, o Het, o Amori, o Hewi deʼ o Yebus manyawa. Ma Jou de i böto winï ao ngini o berera i kaya-kaya deʼ i boburereika gënanga, o taongo ihi gëtongo o Abib mamede magoronaka, ngini kokiani nia diai o agama madatoro nënanga. 6Madekana o wange tumidino ngini kokiani nia ol̄omo o roti i ragi-ragiua, deʼ o wange matumidoka kokiani nia diai o rame mangale niwi horomati ma Jou. 7Madekana o wange tumidino ngini yakunua nia ol̄omo o roti de ma ragi-ragioka, deʼ nia berera yamode-modekika yakunua naga o ragi ekola okianaga moi dema ragi-ragioka.
8O rame gënanga de i mulaenge ngini kokiani nihi jarita nia ngohaka o nau-naurika mata-mata gënanga ngini nia diai karana hagala ma Jou wadodiaioka nginika maöraha ngini nia mal̄a o Mesir maberera. 9O rame nënanga idadi o hohininga mangale ngini hokä o nonako nihi liko-likoino nia giamino ekola nia bionoko. O rame nënanga inihi hohininga ngini mangale nima togu-togumua nia hetongo deʼ nimä dotoko ma Jou Ai tita, hababu ma Jou o Mesir mabereraka de ngini winihihupu de Ai kuaha ma amo-amoko. 10Nihi rame o rameanga nënanga o taongo ihi getongo ihi totantantu ma orahoka.”
O ngohaka o riaka
11Ma Jou wätemo o Israel manyawaika, ”Ma Jou aha winï ngotaka ngini o Kanaan matonakika winihi jäjajioka deʼ makoboto nginika de nia ete de nia tohoraika. O tonaka gënanga de idadioka tingini madutu, 12#Luk. 2:23 ngini kokiani nihi huba moi-moi o ngohaka o nauru o riaka deʼ moi-moi o aiwani i popaliara manauru madodihiraka ihi ngohaka. Mata-mata gënanga toma Jou, 13mä o keledai manauru madodihiraka ihi ngohaka kokiani ma Jouoka de yatuhuhu de ihi huba o duba mangohaka o dutu moi hokä madururu. Nako ngini nioluku nia tuhuhu o keledai gënanga, kokiani matomara nia tobiki. Moi-moi nia ngohaka o nauru madodihiraka imakil̄au kokiani niä tuhuhu. 14Nako o wange maduruino nia ngohaka yoleha okia mamangarati mata-mata gënanga, kokiani ngini nihaluhu hoko nënanga, ’De o kuaha ma amo-amoko ma Jou wonä ao ngone o Mesir mabereraka de hohupu, o ngï ngone imä gilaongo. 15Maöraha o Mesir ma koano watogowini ai haeke deʼ woluku wona higumal̄a ngone hoiki, ma Jou wätoma moi-moi o ngohaka o nauru o riaka o Mesir mabereraka, kayaoa o nyawa manga ngohaka kayaoa o aiwani mangohaka. Genanga mahababu ngone hohihuba ma Jouika moi-moi o aiwani i popaliara mangohaka manauru madodihiraka ihi ngohaka, mangone hätuhuhu tongone nanga ngohaka mariaka.’ 16O biaha gënanga idadi o hohininga ngoneino hokä o nonako ihi liko-liko nanga giamino ekola nanga bionoko. De hoko gënanga ngone aha hirahi inahi hohininga ma Jou de Ai kuaha ma amo-amoko o Mesir mabereraka de wonahi hupuoka.”
O liate o lobi deʼ o liate o uku
17O Mesir ma koano wahigumal̄a o Israel manyawa yoiki de iböto, ma Jou Madutu wä aoua önanga yanïki o ngekomo yatilakuru o Filistin maberera, ngaroko gënanga o ngekomo duru madigi. Ma Jou Madutu woma pikiri, ”Uha-uha o nyawa geönanga imatoduba nako yamake önanga kokiani ima teke parangi, de i makilioro o Mesirika.” 18Karana gënanga ma Jou wä ao önanga yanïki o ngekomo i kokiloliti yatilakuru o tonaka i kokakaha yodumutu o Gelagah ma Ngöto. Maöraha o Mesir yamal̄a, o Israel manyawa gënanga de manga dae hokä aha yoparangi.
19 #
Kej. 50:25; Yos. 24:32 O Musa wäo o Yusuf ai kobo-kobongo, hababu kawo wango-wangohi o yusuf wähuloko o Israel manyawa yokoboto la yodiai hoko gënanga. Hoko nënanga o Yusuf ai behehongo, ”Maöraha ma Jou winihi bebasi ngini, ahi mayeti kokiani nenangoka de niao.”
20O Israel manyawa yamal̄a o Sukot deʼ imä tau o Etam makotaka, o tonaka i kokakaha madatekoka. 21Maöraha o wangeoka ma Jou womä dagi toönanga manga himangoka o liate o lobi magoronaka deʼ maöraha o hutu-hutu nanga wahihira önanga o liate o uku magoronaka mangale wahidumutu o ngekomo. De hoko gënanga önanga yakunu yotagi o wange-wange deʼ o hutu-hutu. 22O wange magurutu o liate o lobi naga toönanga manga himangoka deʼ o hutu yähaiwatiki o liate o uku yätomoteke önanga.
Currently Selected:
O KELUARAN 13: TLB
Highlight
Share
Compare
Copy
Want to have your highlights saved across all your devices? Sign up or sign in
