O KELUARAN 12
12
O Paska mangol̄omo marameanga
1 #
Im. 23:5; Bil. 9:1-5, 28:16; Ul. 16:1-2 Ma Jou wätemo-temo o Musa deʼ o Harunika o Mesir matonakoka. Wato, 2”O mede nënanga idadi o mede madodihiraka nia almanak mataongoka. 3Niahiadono o pareta nënanga o Israel manyawaika yongodumu: Mawange ngimoioka o mede nënanga, o nyawa moi-o nyawa moi o nau-nauru kokiani yotöaka o duba mangohaka o dutu moi la yaol̄omo kamamoi de manga tau madol̄a. 4Nako o tau madol̄a gënanga yohutuluholi mangale yamata o duba mangohaka o dutu moi, done o tau madol̄a gënanga deʼ i makokadateke yotigi-tigino yakunu kamamoi mata-mata yaol̄omo o duba mangohaka gënanga. O duba mangohaka gënanga kokiani yaregu i moteke manga ngöe manyawa yaol̄o-ol̄omo. 5Ngini yakunu nimä ngiriki o duba ekola o kabingi, mä kokiani manauru, ma umuru o taongo moi, deʼ koiwa mabodito. 6Ngini kokiani nia gogonika hiädono mawange ngimoi de iatoka. O wange gënanga, mabimaoauku, o Israel manyawa yongodumu kokiani yatoaka o duba mangohaka gënanga. 7Mahuhutulu ma awunu kokiani ihi nauhu o ngorana maliateika hinoto de o tau mangorana masita il̄o l̄oku-l̄okuil̄e manga ngï önanga yol̄omo. 8O hutu genangoli ma akeme kokiani yal̄ofo deʼ yaol̄omo de o gauku mamali-mali deʼ o roti maragi koiwa-iwa. 9O duba mangohaka gënanga kokiani yal̄ofo ingodu-ngodumu, mahäeke itotiai, mal̄ou deʼ mamamata madol̄a. Yaol̄omo ma akeme yal̄ofo-l̄ofoka gënanga, uha naga imä ol̄omo magou ekola iboho-bohoko. 10Mahuhutulö mauha yamal̄aika o hiode ma akeme gënanga hiädono o ngorumino; nako naga mahou, kokiani yatuhuku hiädono koiwaka. 11Maöraha niol̄omo ngini kokiani nimapakeanga nimahi dodiaioka mangale nia dodagi, de nia sandal nia l̄ouoka deʼ o diki-diki nia giamoka. Ngini kokiani ni ol̄omo nima tai-taiti. Genanga o Paska mangol̄omo marameanga mangale nihi horomati Ngohi, ma Jou.
12O hutu gënanga Ngohi aha tokaika tokaino tamode-modeke o Mesir matonaka, deʼ Tä toma moi-moi o ngohaka o nauru o riaka, kayaoa o nyawa, kayaoa o aiwani. Ngohi aha tähukumu mata-mata o gikiri o Mesir matonakoka, karana Ngohi ma Jou. 13O awunu naga nia tau mangoranoka aha imadadi o nonako o tau-o tau nia ngï ngini nio gogogere. Nako Ngohi tamake o awunu gënanga, ngini tini tilakuru deʼ tini binahaua maöraha Ngohi tähukumu o Mesir. 14#Kel. 23:15, 34:18; Im. 23:6-8; Bil. 28:17-25; Ul. 16:3-8 O wange gënanga kokiani ngini nio hohininga hokä o wange ma amoko mangale ma Jou. Genangoka dei hikaika o wange gënanga kokiani ngini nihi amoko o taongo ihi geto-getongo.”
O Roti i Ragi-ragi Ua ma Rameanga
15Ma Jou wätemo, ”O wange tumidi madekana ngini yakunua nia ol̄omo o roti dema ragi-ragioka. O wange madodihiraka mata-mata o ragi kokiani nihihupu nia tauoka, hababu nako madekana o wange tumidi gënanga woma tengoani waol̄omo o roti dema ragi-ragioka, ünanga yakunokaua iwi etongo Ahi umati. 16O wange madodihiraka, deʼ o wange matumidokaö, ngini kokiani nima toomu la nia diai o puji. O wange gënanga ngini yakunua nia diai o manarama okia dika sowaliua ipöparalu mangale nimä sadia o inomo. 17O wange gënanga ani nyawa yongodumu Täao Tahihupu o Mesir mabereraka. Hababu gënanga nenangoka dei hikaika o taongo ihi geto-getongo, o wange gënanga kokiani ngini nio hohininga hokä o wange ma amoko. 18-20O mede madodihiraka magoronaka, i mulaenge mawange ngimoi de iatoka mahutu, hiädono mawange monaoko de moioka mahutu, ngini yakunua nia ol̄omo o roti dema ragi-ragioka. Madekana o wange tumidi gënanga mata-mata o ragi kokiani nihi hupu niatauoka. O Israel manyawa ekola o nyawa maporetino yaol̄omo o roti dema ragi-ragioka o wange ma amokoka gënanga, yakunokaua yaetongo Ahi umati.”
O Paska madodihiraka
21O Musa wä ahoko o Israel manyawa manga tutuda mata-mata, deʼ wätemo onangika, ”Nioiki deʼ nial̄ë mangale nia tau madol̄a o duba mangohaka o dutu moi mangale o Paska marameanga. 22Nia l̄ë o hisop o nikutu moi, nia tono o loyanguku yogö guhe-guhe ukuoka o duba ma awunu gënanga, daha nihinauhu nia ngorana maliate hinoto deʼ nia tau mangorana masita il̄ol̄oku-l̄okuoko. Hiädono o ngorumino nia hidogoronaka ka o nyawa moiö mauha nia mal̄a o tau. 23#Ibr. 11:28 Maöraha ma Jou wödagi o berera nënanga wakaika wakaino mangale wätoma o Mesir manyawa, ma Jou aha wamake o awunu nia liateoka hinoto deʼ nia tau mangorana masita il̄ol̄oku-l̄okuoko; done Ünanga aha kawatilakuru dika deʼ Wohigumal̄aua o Honenge ma Malaekat yö ngohama nia tau mangale inï toma ngini. 24Ngini deʼ nia ngoha-ngohaka kokiani nihimoteke o pareta gënanga kahi ado-adonika. 25Nako ngini nio ngohamoka o berera winihi jäjajioka ma Jou nginika, ngini kokiani nia diai o nonako ma ago-agomo nënanga. 26Nako nia ngoha-ngohaka yoleha, ’Okia ma mangarati o nonako ma ago-agomo nënanga?ʼ 27Ngini kokiani nihaluhu, ’Nenanga o Paska mahuhuba mangale hï horomati ma Jou, hababu o Israel manyawa manga tau o Mesir mabereraka watilakuru, maöraha ünanga wätoma o Mesir manyawa manga ngoha-ngohaka o nauru mariaka; deʼ ngone wonahi gumal̄a howango!ʼ ”
Done yatilabukuku o Israel manyawa deʼ yohuba. 28Daha önanga yoiki deʼ yadiai okia ma Jou wahi popareta o Musa deʼ o Harunika.
O ngoha-ngohaka mariaka yä toma
29 #
Kel. 4:22-23
O hutu gënanga i togorona ma Jou wätoma mata-mata o Mesir manyawa manga ngohaka o nauru mariaka, mulaenge ma koano aingohaka hiädono o bui manyawa manga ngoha-ngohaka. Mata-mata o aiwani i popaliara mangohaka mariaka mawa toma. 30O hutu gënanga ma koano, o popegawe deʼ mata-mata o Mesir manyawa manga gogiokoka deʼ yomomiki. O Mesir maberera yamode-modekika yoihene o dodora mailingi i kua-kuatil̄e, karana koiwa naga moi o tau koi honengua womatengo manga ngohaka o nauru. 31O hutu gënanga dika, ma koano wä ahoko o Musa deʼ o Harun deʼ wätemo, ”Nioikoka, ngini mata-mata nenangoka! Nia mal̄a ahiberera! Nioiki niwi horomati nia Jou Madutu hokä ngini nigahoko. 32Niao mata-mata nia hapi, o duba, deʼ nia kabingi, deʼ nioikoka! Ngohiö nihi gahoko o barakati.!”
33O Mesir manyawa yatataiti o Israel manyawa hupaya itai-taiti yamal̄a o berera gënanga. Ona yato, ”Ngomi mata-mata aha mihonenge nako ngini koni oikua!” 34Daha o Israel manyawa yal̄ë toönanga manga boko-bokolo de madol̄a o roti maragi koiwa-iwa yaojo-ojouku, yahawo deʼ o ngöere, deʼ yamoku. 35#Kel. 3:21-22 O nangö yadiaioka okia o Musa waheto-hetongoka, enagënanga yogahoko o poromu o haaka deʼ o gurasi inoli o pakeanga o Mesir manyawaika. 36Ma Jou wadiai o Mesir manyawa yoigo yahidöaka o Israel manyawaika, hiädono önanga yahi döaka hagala o Israel manyawa yogö gaho-gahoko. De madodagi hoko gënanga o Israel manyawa yao o Mesir manyawa manga kaya ihupu deʼ o berera gënanga.
O Israel manyawa yamal̄a o Mesir matonaka
37O Israel manyawa imä jobo deʼ imä dagi o Raamses makotaoka de o Sukot makotaika. Önanga manga ngöe yaribuhu ratuhu butanga, yäetongua o ngongoheka deʼ o ngoha-ngohaka. 38Onanga yoao o hapi, o duba deʼ o kabingi kahängöe. Manga ngöe o nyawa maporetinoö magilamoko yonïki. 39Onanga yoharongo o roti maragi koiwa-iwa yaojo-ojoukuoka, o Mesir mabereraka de önanga yoao. Onanga genangokadau de yäduhu de duru yahitodokanino, hiädono imahi daenua o bilaono imadiai.
40 #
Kej. 15:13; Gal. 3:17 O Israel manyawa yogogeroka o Mesir matonakoka madekana o taongo o ratuhu iata de moruange. 41Mawange mabobahaka mataongo o ratuhu iata de moruange gënanga i ngodumu manga duduono ma Jou Ai umati yamal̄a o Mesir matonaka. 42O hutu gënanga ma Jou woma togu-togumua wagoana mangale Wängotaka önanga o Mesir matonakoka deʼ yohupu. Deʼ genangö mahutu kahi ado-adonika ihi huba ma Jouika hokä o hohininga mahutu. Mahutu gënanga o Israel manyawa kokiani imä goa-goana.
O Paska marameanga madatoro
43Ma Jou wätemo o Musa deʼ o Harunika, ”Nënanga o Paska marameanga madatoro. O nyawa maporetino yakunua yaol̄omo o duba ma akeme ihi huba-huba o Paska mawangeoka. 44Mä o gilaongo nimä ija-ijaino yakunu yonïki yol̄omo, nako önanga ima hunaoka. 45O nyawa o dagi-dagino ekola o hewa manyawa yakunua yonïki yaol̄omo. 46#Bil. 9:12; Yoh. 19:36 I ngodumu o duba ma akeme gënanga kokiani yaol̄omo o tau magoronaka, deʼ yakunua yao ihihupu maporetika. Ma kobongo kamoiö mauha yatobiki. 47Yongodumu o Israel manyawa kokiani ihi rame o rameanga gënanga. 48O nyawa ima huna-hunaua yakunua yaol̄omo o rameanga mainomo gënanga. Nako o nyawa maporetino moi ani yogogere i tiaioka nginioka yöigo ihi rame o Paska mangale ihi horomati Ngohi, ma Jou, mata-mata o nau-nauru manga tau magoronaka kokiani imahuna ihira. Gënanga deʼ ibötoönanga yäetongo hokä o Israeloka manyawa madutu, deʼ yakunu yonïki o Paska marame magoronaka. 49O datoro kaima tero inï korona o Israel manyawa madutu deʼ o nyawa maporetino mahirahi yogogere tingini nia hidogoronaka.”
50Mata-mata o Israel manyawa ihi moteke deʼ yadiai hagala ma Jou wohi popareta o Musa deʼ o Harunika. 51Mawange gënanga ma Jou wä ao yongodumu o Israel manyawa o Mesir mabereraka yohupu.
Currently Selected:
O KELUARAN 12: TLB
Highlight
Share
Compare
Copy
Want to have your highlights saved across all your devices? Sign up or sign in
