O NGO ESTER 4
4
O Moderkhai wogahoko o roriwo o ngo Esterika
1Maöraha o Mordekhai woihene okia idadadioka, ünanga wakakihi ai pakeanga de womahi noa o karongo hokä manonako ai hininga ihuha. Unanga woderero o kafo ai haekoka, daha woma dagi o kotaka ikali woari dema kuatil̄e de woduka. 2O kadato mangorana ma amo-amoko mahimangoka ünanga womatogumu, hababu o nyawa imahi noauku o karongo yahigumal̄aua yowohama. 3Hagala o propinsiokaö, o Yahudi manyawa yododora ma koano aipareta ihi ngahu ibötino. Onanga yopuaha, yoari de yoruaëuku, de manga ngöe toönanga manga hidogoronaka imahi noa o karongo de ima rubaiha o kafo mal̄okuoka.
4Maöraha o momoholehe de o pangkati magogurutil̄e imilö leleani ma Jou Boki o ngo Ester imihi ngahu munangika okia magogiria wadiai o Mordekhai, o ngo Ester duru ami hininga ihuha. Munanga mihidingoto o pakeanga o Mordekhaika hokä madagali o karongo, Mä o Mordekhai woluku watarima. 5I paha o ngo Ester miahoko o Hatan, womatengoani o pangkati magogurutil̄e wihimanarama ma koano mangale womi leleani o ngo Ester. Mihuloko o Hatah wïleha o Mordekhaika okia magogiria idadi de yadodoa ünanga wodiai hokä hoko gënanga. 6Daha o Hatah woiki o Mordekhaika o kota malapangoka o kadato mangorana ma amo-amoko mahimangoka. 7O Mordekhai wohi ade-ade unangika okia idadadioka de muruono o tiwi o haaka wohi jajioka o Haman mangale wohi ngohama ma koano ai kas magoronaika, ipaha de o Yahudi manyawa yäbinahaka mata-mata. 8O Mordekhaiö wohi döaka o Hatahika ma koano ai hurata watuli-tulihuku wohihö hupu-hupuoka o Susanoka de madol̄a o pareta mangale yabinaha o Yahudioka manyawa. Unanga wï huloko o Hatah wohi döaka o hurata gënanga o ngo Esterika de wohi tararono o perekara gënanga munangika, mangale wogahoko hupaya o ngo Ester mihimanga ma koano mangale mogahoko o dora de o hayanga ami hoanika. 9Daha o hatah woiki o ngo Esterika de wohi ädono o Mordekhai ai behehongo munangika. 10Mä o ngo Ester mihulokoli ünanga o Mordekhaika de o behehongo nënanga, 11”O nyawa moi-moi, yaoa o nauru yaoa o ngoheka, ya ahokua, iwi himanga ma koano o kadato magoronaka maloaoka, kiani yahukumu yahohonenge. Genanga ganga o datoro-o datoro de mata-mata o nyawa mulaenge iwinö nasihati ma koano de yaino hiädono o kawahaika o propinsi-propinsioka, ihi öriki o hali gënanga. Duga-duga naga moi o ngekomo mangale yolapahi de o datoro-o datoro gënanga, enagënanga nako ma koano wahi tumutika ai diki-diki o gurasi o nyawaika gënanga. Nako gënanga idadi, ünanga aha wohalamati. Mä o mede moi iböto nënanga, ma koano wohi ahokua ngohi.”
12Daha o Hatah wohiädono o ngo Ester ami behehongo gënanga o Mordekhaika. 13Daha o Mordekhai wohi dingoto o hohininga nënanga o ngo Esterika, ”Uha natobote ngona aha iholoi norïdi de o Yahudioka manyawa mahomoa, duga-duga karana ngona nogogere o kadatoka! 14O Yahudioka manyawa aha yamake o roriwo de madodagi sarakiaö dika hiädono önanga yohalamati. Mä nako ngona kahirahi nomarirïdoka dika maöraha hoko nënanga magoronaka, ngona mahirete aha nohonenge de ani ama ai tau manyawa aha manga jarita koiwa. O nagona ihiöriki, mudukua hababu mangale hagala o öraha hokä hoko nënanga ngona ini irikoka nodadi ma Jou Boki.”
15Daha o ngo Ester mohidingoto o abari nënanga o Mordekhaika, 16”Natoomu mata-mata o Yahudioka manyawa naga o Susanoka ima niata mangale ngohi. Uha yol̄omo de yokere o hutu hange de o wange hange madekana. Ngohi mahirete de o momoholehe ihilö leleaniö aha mipuaha. Iböto gënanga ngohi aha tihimanga ma koano, ngaroko gënanga yatilakuru o datoro-o datoro. Nako ngohi kiani tohonenge karana gënanga, mal̄aika ngohi tohonenge!”
17Daha o Mordekhai woiki de wadiai mata-mata mohi bobehehongo o ngo Ester unangika.
Currently Selected:
O NGO ESTER 4: TLB
Highlight
Copy
Compare
Share
Want to have your highlights saved across all your devices? Sign up or sign in