O NGO ESTER 3
3
O Haman wodiai o datoro madorou mangale wäbinaha o Yahudioka manyawa
1O öraha muruono naga ipaha ma Koano Ahasyweros wigoraka womatengo ai romanga o Haman wodadi o menteri manga baluhu. O Haman ganga o Hemedata aingohaka o Agag aidifauku. 2Ma koano wohipareta ai pegaweika mata-mata hupaya iwihoromati o Haman de imahi tudukuku ai himangoka. Mata-mata ihingounu o pareta gënanga, sowaliua o Mordekhai. 3O pegawe-pegawe mahomoa o kadatoka iwi leha unangika yadodoa ünanga watilakuru ma koano aipareta, 4de o wange ihigetongo önanga iwiributu ünanga la wamoteke dika, mä ünanga woluku woihene. Wato, ”Ngohi o Yahudi manyawa; ngohi takunua tahuba o nyawaika.” Daha önanga ihingahu o hali gënanga o Hamanika karana önanga yoigo ihiöriki o manarama okia aha wal̄ë o Mordekhaika. 5O Haman duru wongamo maöraha wohi öriki o Mordekhai woluku wihuba unangika. 6De maöraha wohiöriki o Mordekhai o Yahudioka manyawa, ünanga wol̄ë o putuhu mangale wihukumu o Mordekhai de kaunangua dika, mä aha wabinahaö o Yahudi manyawa yongodumu o Persia maparetaka.
7O taongo ngimoi de hinotoka ma Koano Ahasyweros aipareta, o mede mamoioka, enagënanga o Nisan mamede, o Haman wähuloko yodiai o undi yahetongo o ”Purim” mangale ihiöriki mawange de o mede okia yadaene mangale wadiai ai niata itotorou gënanga. Daha ihitatapu mawange ngimoi de hange, mamede ngimoi de hinoto, enagënanga o Adar mamede.
8Daha o Haman wotemo ma koanoika, ”Jou Koano, naga moi o hoana iheranga yodogerewoto o propinsi yogetongo o paretaka nënanga. Manga adati duru imako howono de o hoana de o berera mahomoa. Önanga yamotekua o pareta mahuku-hukumu. Ho, kayaoa Jou Koano uha namal̄aika önanga yodiai manga hininga mahuka. 9Nako Jou Koano nokabaratangua, kokiani nohi hupu o pareta mahurata mangale yabinaha önanga. De nako Jou Koano nomau natarima tongohi ahi gogahoko, ngohi maraioka aha takunu tohi ngohama iholoi de o haaka o kilo ratuhu hange de moruata maribuhu. Jou Koano ani kas magoronaika.”
10Woihene gënanga, ma koano wahuputu ai ali-ali ai hagararaka wapöpake-pake mangale wohi sapu o pareta madiai, daha wohi döaka o Hamanika, o Yahudi manyawa manga haturu ma amo-amoko. 11Ma koano witemo unangika, ”O hoana gënanga de manga tiwiö tohilapahi ngonaika. Nadiaioka napulono yaoa onangika.”
12-13Daha mawange ngimoi de hangeoka o mede mamoi, o Haman wa ahoko ma koano ai sekretaris-sekretaris. Onanga wähuloko yotulihi o hurata imamoteke de hagala iwihi poparetaka, daha o hurata gënanga yauti de o bahasa mata-mataika de yatulihi mata-mata de o dulihi magoronaka yapö pake-pake o paretaka gënanga. O hurata gënanga yatulihi de ma Koano Ahasyweros ai romanga, de ihi sapu de ai ali-ali, daha ihidingoto de majapati yokokuahaika, o gubernur de o nyawa yo lago-agomo o propinsioka mata-mata. Madol̄a enagënanga o pareta o wange ngimoi de hangeoka o Adar mamede, o Yahudi manyawa yongodumu, yaoa yatotimono yaoa yogö gö, yaoa o ngongoheka yaoa o ngoha-ngohaka, kiani yätoma koiwa ma apongo, de toönanga manga arata yal̄ëa de mapakisa. 14O pareta gënanga kiani nihi ngahu o propinsioka yogetongo hupaya mata-mata o nyawa ima hidiaioka mawange ihi tatantuoka gënanga.
15O huhuloko-huhuloko imataiti imagoraka o hura-hurata gënanga o pareta mapropinsika mata-mata. Mangale ma koano ai huloko, o pareta gënanga ihingahuö o Susanoka, o Persia makota matiti. Iböto gënanga ma koano de o Haman ima gogeruku ikali yokere o angguru, mä o Susan ma kota itodokana karana o abari gënanga.
Currently Selected:
O NGO ESTER 3: TLB
Highlight
Copy
Compare
Share
Want to have your highlights saved across all your devices? Sign up or sign in