O NGO ESTER 5
5
O ngo Ester ma ahoko ma koano de o Haman ami jamuangika
1O wange mahangeoka mopuaha, o ngo Ester momahi noa o Jou Boki mapakeanga daha moiki o kadato magoronaka maloaika de momaokoino ma koano wohima-himanga o kawaha mangorana mahimangoka. Ma koano magogiria wogogeruku o pareta makuruhi mal̄okuoka yohimangika o ngoranika gënanga. 2Maöraha ünanga womimake ma Jou Boki o ngo Ester momaokoino maporetoka, ünanga wamao womidora munangika de womihi tumutika ai diki-diki o gurasi munangika. Done o ngo Ester motagi ami himangika, daha masö o diki-diki madekarika gënanga. 3Ipaha ma koano womi leha, ”Naga okia, ngohi Jou Boki? Okia noigo? Nahetongo! Ngaroko nogahoko ahi pareta mahononga aha tonihidöaka dika.”
4O ngo Ester mohaluhu, ”Nako Jou Koano nomodeke, kokiani o hutu nënanga Jou Koano de o Haman niboa ahi jamuangika ngohi tadiai mangale Jou Koano.”
5Ma koano wihuloko o Haman itaiti woböa, hupaya önanga yakunu ihitotomo o ngo Ester amigogahoko. Daha önanga yoboa o jamuangika o ngo Ester madodiai gënanga. 6Maöraha yokere o angguru, ma koano womileha, ”O öraha nënanga nahetongo okia noö igo-igo. Okia dika nogahoko aha tonihidöaka, ngaroka ahipareta mahononga!”
7-8O ngo Ester mohaluhu, ”Nako Jou Koano nomodeke natarima tongohi ahi gogahoko, kokiani jou Koano de o Haman niboali o jamuangika ngohi tadiai iyarehe mahutu. Daha o jamuangoka gënanga ngohi aha tohingahu ahi gogahoko Jou Koanoika.”
O Haman ai niata womau wïtoma o Mordekhai
9O Haman wolio ma Jou Boki o ngo Ester ami jamuangoka de waino, de ai hininga duru imorene. Mä maöraha o kadato mangorana ma amo-amokoka ünanga wimake o Mordekhai womaokoua mangale wihoromati unangika, ünanga idadi duru wongamo. 10Mä ünanga kawoma tongohono ai diri de wolio ai tauika. Womahi adonika dokengoka ünanga wähuloko ai dodiawo yoböa de wogahoko o ngo Zeres, ngoi hekata, mangale imagögogere kamamoi de önanga. 11Daha o Haman womahi ade-ade onangika de womaedenge de ai kaya, ai ngoha-ngohaka o nauru mangangöe, o mulia ibö baraguna watarima ma koanoino, de ai pangkati iholoi ikurutil̄e ngaro de o pegawe-pegawe mahomoa. 12Wotemoli, ”Igoungu ma Jou Boki o ngo Esterö duga-duga momiahoko ngohi de ma koano o jamuangika madödodiai mangale ngomi, de iyarehe mahutu ngomi momiahokoli. 13Mä mata-mata gënanga koiwa mamangarati, madekanino katimakeohi o Mordekhai, o Yahudi manyawa gënanga, wogogeruku o kadato mangorana ma amo-amokoka.”
14Yoihene gënanga ngoi hekata de ai dodiawo yogahoko hoko nënanga, ”Nohuloko dika yodiai o liate yalikouku magurutil̄e o metere monaoko de hinoto. Daha iyarehino, o ngoru-ngorumino nogahoko wonihigumal̄a ma koanoika mangale nilikouku o liateoka nënanga. De hoko gënanga ngona yakunu o jamuangika gënanga de ani hininga irirïdi.” O gogahoko gënanga duru yaoa imamoteke o Haman ai damake, hababu gënanga ünanga wohuloko de majapatioka yodiai o liate yaliko-likouku gënanga.
Currently Selected:
O NGO ESTER 5: TLB
Highlight
Copy
Compare
Share
Want to have your highlights saved across all your devices? Sign up or sign in