O ULANGAN 9
9
O Israel manyawa manga hingounua
1”Ni ihene Roriadodoto! O wange nënanga ngini nia tobongo o Yordan ma Ngairi mangale nio gogere hagala o hoana de o berera manga daera iholoi ilago-agomo deʼ iholoi ikuata de ngini. Toönanga manga kota ma ago-agomo deʼ ma bebeno o mehele igorakil̄e hokä o dihanga ma gurutil̄e. 2Manyawa manga ago-agomo deʼ manga röehe iputurungu; önanga gënanga o meki, deʼ ni ihenoka kao nyawa moiö mayakunua yalawani önanga. 3Maöraha nanga ngini aha nia hakihi mahirete sarakia ma Jou nia Jou Madutu wotagi tingini nia himangoka hokä o uku ihi tö tuhu-tuhuku. Unanga aha wä hohihanga önanga nia lako mahimangoka, hiädono ngini ni akunu niä duhu deʼ niä binaha önanga de ma japati hokä wohi jajaji ma Jou.
4-5Ma Jou nia Jou Madutu wä duhu önanga mangale ngini de ipahaika, uha niato bote ngini winï ao dokengika mangale nima hitingini o tonaka gënanga karana ngini yaoa deʼ nia diai ma Jou nia Jou Madutu Ai mau hiädono ipatutu nia tarima. Hakali-kali kowali! Ma Jou wä duhu hagala o hoana de o berera gënanga mangale ngini karana önanga itorou. Ma Jou wa mal̄aika ngini nia l̄ë toönanga manga tonaka karana Unanga womau watotomo Ai jaji nia ete de nia tohoraika o Abraham, o Ishak deʼ o Yakub. 6Ni ngaku ma Jou nia Jou Madutu wohi döaka o tonaka ma bo burere gënanga nginika koigoungua karana ngini ipatutu nia tarima. Kowali! Ngini nënanga manyawa manga haëke ito-togowini.
7Nio hohininga sarakia ngini nidiai ma Jou nia Jou Madutu wongamo o tonaka ikokakahaoka. Kadema dero ngini nia mal̄a o Mesir hiädono ngini nimahi ädono nenangino ngini niwi lawani ma Jou. 8Maboboloi o Sinai mal̄okuoka ngini nia diai ma Jou nia Jou Madutu duru iwi tohata, hiädono Unanga womau winï binaha ngini. 9#Kel. 24:18 Ngohi tadoa ol̄oku gënanga mangale tatarima o jaji ma helewo wadodiai ma Jou dede ngini. O hutu moruata deʼ o wange moruata madekana ngohi togogere ol̄okuoka gënanga tol̄omua deʼ tokerua. 10De ipaha ma Jou wohihi döaka o helewo o gahumu hinoto wa tuli-tulihoka ma Jou Madutu mahirete. O helewoika gënanga i tulihika o demo-demo waheto-hetongo nginika o uku mahi dogoronaka, maöraha ngini nimatoomu ol̄oku matimioka. 11Igoungu, o hutu moruata deʼ o wange moruata ipahaika, ma Jou wohihi döaka ngohino o jaji ma helewo gënanga hinotö.
12Daha ma Jou wohitemo ngohino, ’Itaiti nouti, hababu ani nyawa naö ao-ao yohupu o Mesirino yodiaioka o dorou. Onanga yamotekokaua Ahi pareta-pareta, deʼ yodiai o dulada mangale yahuba,’
13Ma Jou wo hi temoli ngohino, ’Ngohi to hi oriki o nyawa geönanga duru manga haeke i togowini. 14Uha nataili nohitatoko ngohi. Ngohi tomau täbinaha önanga hiädono önanga tahohininga okauaoli. Mä ngona aha Tonihi dadi moi o hoana de o berera manga ama iholoi ilamoko deʼ iholoi yokuata dede önanga.’
15Daha toma idulu, deʼ inoli tao o jaji mahelewo hinotö de ahi giama hinoto, ngohi tauti mal̄oku magogiria itoka-tokara. 16Ngohi ta make ngini nia tilakuroka ma Jou nia Jou Madutu aipareta. Ngini nibaradohaka ma Jouika karana nia diai mangale nia diri moi o dulada o hapi o gurasi. 17De nia lako ma himangoka o jaji ma helewo hinotö gënanga ngohi tohipaka hiädono iwedere ibela-belakuku. 18De mamoioli ngohi tatilabukuku de tomahi tudukuku o tonakuku ma Jou Ai himangoka ol̄oku ma tubuoka o hutu moruata de o wange moruata, tol̄omua deʼ tokerua. Gënanga ngohi tadiai karana ngini ni baradohaka ma Jouika de nia dodiai okianaga wa mäo itorou, hiädono Unanga iwi tohata. 19#Ibr. 12:21 Ngohi to modongo ma Jou Ai dohatika itö toka-tokara ngini-ka hiädono Unanga womau winï binaha, mä mamoi nënanga ma Jou wohihi gihene ngohi. 20Ma Jou o duru wï ngamo o Harunika hiädono womau wïtoma, done ngohi to hubayanga mangale ünanga. 21O dulada o hapi o gurasi nia dodiai, ngohi tohikaweli o uku magoronaika. Daha tawedere deʼ tatutuku ta alu-aluhuku hokä o kafo, deʼ o kafo gënanga ngohi tohikaweli o ngairi maitiuku ihä hahuru ol̄okuino gënanga.
22 #
Kel. 17:7; Bil. 11:3, 34 O Tabera, o Masa deʼ o Kibrot-Taawa okaö, ngini nia diai ma Jou iwi tohata. 23#Bil. 13:25–14:38, 13:31; Ul. 1:21, 26; Ibr. 3:16 De maöraha ma Jou winï huloko nia mal̄a o Kades-Barnea mangale nitagi nia himangika deʼ nio gogere o tonaka winihi döa-döaka nginika, ngini nia lawani ma Jou nia Jou Madutu Ai pareta; ngini nioluku niwi ngaku de niwihi ngounu Unangika. 24Ka de ma dero ngohi tinï nako ngini, salalu ngini niwi lawani ma Jou.
25Ngohi tohiöriki ma Jou Ai adekati womau winï binaha ngini. Done madekana o hutu moruata deʼ o wange moruata tatilabukuku o tonakuku ma Jou Ai himangoka deʼ tohubayanga hoko nënanga: 26Ya Jou Duru no Kokurutil̄e, uha nabinaha Ani umati nënanga, o nyawa Nahi bebasoka deʼ Nä ngota-ngotakoka yohupu o Mesirino deʼ o kuata deʼ Ani kuaha ma amoko. 27Nä hininga Ani gogilaongo o Abraham, o Ishak, deʼ o Yakub, deʼ uha nohiningaika toönanga manga biaha manga haëke madodo-gowini, manga dorou deʼ manga baradoha o nyawa neönanga. 28Nako Ani umati maka Nä binaha dika, done o Mesir manyawa aha yotemo Ngona näpoaua na ao Ani nyawa neönanga o berera Nahijä jajaji onangika, deʼ Ngona na ao önanga o tonaka ikokakahaika mangale Nä toma önanga, karana Ngona nä dohata önanga. 29Mä nomahininga, Jou, önanga nënanga o nyawa Nä iri-irikoka yodadi Ani umati, deʼ Na ao o Mesir deʼ yaino de ani kuata deʼ Ani kuaha ma amoko.”
Currently Selected:
O ULANGAN 9: TLB
Highlight
Share
Compare
Copy
Want to have your highlights saved across all your devices? Sign up or sign in
