O ULANGAN 10
10
O Musa mahinotoka watarima ma Jou Madutu Ai Tita Ngimoi
(Kel. 34:1-10)
1”De ipaha ma Jou wohitemo ngohino, ’Musa, nohonotoko o helewo o belaka hinoto hokä madodi hiraka, deʼ nodiai mangï o gahumu moi o peti o gota, daha naino Ngohino ol̄oku matubu oka. 2O helewo-helewoika gënanga aha Tatulihi o demo-demo gënanga, hoʼka o helewo tapopootekoka, dahao kokiani nö noa o petiuku gënanga.’
3Daha ngohi todiai o peti de o gota o akasia deʼ tohonotoko o helewo o gahumu hinoto hokä mahira deʼ tao ol̄okuil̄e. 4O helewoika gënanga ma Jou watulihi o Tita Ngimoi ima tero dema dodihiraka, enagënanga o pareta-pareta wohi döa-doäka nginika, maöraha Unanga wo temo-temo o uku mahi dogoronaka mawange ngini nimatoomu ol̄oku matimioka. Gënanga de iboto ma Jou wohi döaka o helewo watuli-tulihoka gënanga ngohino, 5deʼ ngohi tomakilioro tauti ol̄oku. Daha imamoteke de ma Jou aipareta. O helewo hinoto gënanga tö noa o petiuku tadodiai-ukuoka – deʼ kadema dero o öraha gënanga hiädono o öraha nënanga o helewo watö tuli-tulihi hinotö gënanga ka dema enangohi genangoka.”
(6#Bil. 20:28, 33:38 De ipaha o Yaakan manyawa manga humuoka de o Israel ma nyawa ima goraka, deʼ yoiki o Moseraika. Genangokadau o Harun wohonenge deʼ iwi lungunu. Aingohaka o Eleazer wïtagali hokä ma imam. 7Genangokadau önanga yoiki o Gudgodika, genangoka de yo gila-gila o Yotbataika, o daera dema akere mangöe. 8#Bil. 3:5-8 Ol̄okuoka gënanga ma Jou wä tingaka o Lewi ai hoana mangale ihi dailako o Jaji ma Peti deʼ iwï leleani ma Jou, ikali yahetongo o barakati de Tounanga ai romanga. Genanga toönanga manga manarama hiädono o öraha nënanga. 9Mangale karana gënanga o Lewi ai hoana yatarimaua o tonaka o puhaka hokä o hoana ma homoa, hababu ma Jou dika toönanga ma-nga hidoku idadi manga puhaka, hokä ma Jou nia Jou Madutu waheto-hetongoka nginika.)
10 #
Kel. 34:28
”O hutu moruata de o wange moruata ngohi togö gogere ol̄okuoka hokä ngohi todiai madodi hiraka. Mamoi hongoli ma Jou wohigihene ngohi deʼ Unanga wömodeke mangale ngini winï binahaua. 11Genangoka de Unanga wohihuloko ngohi toiki mangale tinï tuda ngini hupaya ngini yakunu nia l̄ë nima hitingini o tonaka tonaka wahijä jajioka nia ete de nia tohoraika.”
Ma Jou Ai gogahoko
12”O öraha nënanga, Roriadodoto, nia tailako nihi dodiai ma Jou nia Jou Madutu okia wogahoko nginika: Niwi horomati ma Jou nia Jou Madutu deʼ nia diai hagala Ai pareta. Niwi hininga Unanga deʼ ni puji Unangika de ingodumu nia röehe de nia jiwa. 13Nihi ngounu hagala ma Jou Ai pareta o wange nënanga ngohi tohiädono nginika mangale nia oa mahirete. 14Ma Jou nia Jou Madutu ka Tounanga o dihanga ikö kurutil̄e; o dunia maka Tounanga de ikali hagala nä naga mal̄okuoka. 15Mä ma Jou Ai dora nia ete de nia tohoraika hoko gënanga ma amoko, hiädono hagala o hoana de o berera mahi dogoronaka ngini dika winï iriki deʼ hiädono o öraha nënanga ma ngini Ai umati winï iri-iriki. 16Hoʼ imulaenge o öraha nënanga kokiani ngini nihi ngounu ma Jouika deʼ uha nia haëke nia togowinoli. 17#Kis. 10:34; Rm. 2:11; Gal. 2:6; Ef. 6:9; 1Tim. 6:15; Him. 17:14, 19:16 Ma Jou nia Jou madutu naga hagala o gikiri mal̄okuoka deʼ woma hiholoi de hagala o kuaha. Unanga ma Jou Madutu wo lamo-amoko deʼ wokokuaha kokiani niwihi ngounu. Unanga wö igoua yo iri-iriki de kowö igouaö o uru mabobokumu. 18Unanga wä riwo o gohihi ma ngohaka deʼ o ngoheka bobao manga haku hupaya önanga yahidiai iadili, Unanga wä dora o nyawa ma homoaino naga yogogere de tongone nanga hoana de nanga berera deʼ wahi döaka önanga o inomo deʼ o pakeanga. 19Done nginiö nihidumutu nia dora o nyawa o berera mahomoaino gënanga, hababu mahira nginiö ma o berera mahomoaino manyawa o Mesiroka. 20Niwi horomati ma Jou nia Jou Madutu deʼ nipuji Unangika. Kokiani ngini kahirahi nisetia Unangika deʼ nikoboto de Tounanga ai romanga dika. 21Niwi puji Unanga hababu Unanga nia Jou madutu. De nia lako mahirete nia make hagala o manarama ipoputurungu deʼ hö modo-modongo Wadodiai mangale ngini. 22#Kej. 15:5, 22:17, 46:27 Maöraha nia ete de nia tohora yoiki o Mesirika, önanga manga ngöe duga-duga yamoritumidi. Mä ma Jou nia Jou madutu wadiaioka manga ngöe hokä o murumu o dihangoka.”
Currently Selected:
O ULANGAN 10: TLB
Highlight
Share
Compare
Copy
Want to have your highlights saved across all your devices? Sign up or sign in
