O ULANGAN 8
8
O tonaka nio gogogere o tonaka maoa
1”Mata-mata o tita tohi döa-döaka nginika o wange nënanga kokiani ngini nia diai de nia setia, hupaya ngini kahirahi niwango nidogo nia ngöe deʼ niö gogere o tonaka wahi jajaji ma Jou nia ete de nia tohoraika. 2Nio hohininga! O taongo moruata madekana ma Jou nia Jou Madutu winï tuda ngini o dodagi magogurutika magoronaka nia nonu o tonaka ikokakaha. O dodagi gënanga ma Jou Ai dungutu mangale winï taili ngini, hupaya Unanga yakunu wamake okianaga igogo-nika nia hininga magoronaka deʼ boteka ngini aha nihingounu Ai pareta. 3#Mat. 4:4; Luk. 4:4 Unanga winï mal̄aika ngini inï hahini, daha ngini winihi hi döaka o manna mangale nia inomo. Ihira de ngini deʼ nia ete de nia tohora komaiwa nia ol̄omo o inomo gënanga. Ma Jou wodiai hoko gënanga mangale winï dotoko ngini o nyawa howango kade o inomua dika, duga-duga de hagala moi-moi ma Jou wahö heto-hetongo. 4Madekana o taongo moruata nia pakeanga nia röehoka ibabitua, deʼ nia l̄ou il̄obohua. 5Nio hohininga ma Jou nia Jou Madutu winï dotoko ngini hokä womatengo o ama wä dotoko ai ngoha-ngohaka. 6Hoʼ nia diai wohi popareta ma Jou nia Jou Madutu. Ni wango imoteke Ai tita-tita deʼ niwi horomati Unanga. 7Ma Jou nia Jou Madutu winï ao ngini o berera iboburereika; o berera ma ngairi iwöe deʼ ma akere malako, o akere mahahuru o tonaka magoronaka yoduguihi o doporono deʼ o wai-waiuku. 8O berera gënanga mahasili irupa-rupa o gandum, o anggur, o ara ma hohoko, o delima mahohoko, o zaitun ma utu deʼ o madu. 9Genangokadau ngini aha inï hahinua ekola nikuranga. Ma o helewo o nuha naga dema behi, deʼ ma doporono-doporonino ngini yakunu nihaiti o tabaga. 10Ngini aha ni ol̄omo nia hininga mahuka, deʼ ni syukur ma Jou nia Jou Madutuika mangale o tonaka iboburere winihi doä-döaka nginika.”
O hohininga hupaya uha iwi wohanga ma Jou
11 #
Hos. 13:5-6
”Nimä goana nihidodiai uha hiädono ngini niwi wohanga ma Jou nia Jou Madutu; mata-mata Ai tita tohi döa-doäka nginika o wange nënanga kamoiö mauha nia haduliua. 12Nako ngini niol̄omo kania hininga mahuka deʼ nimahi gokoka nia tau ma oa-oa mangale nia ngï nigogere, 13deʼ nako nia hapi idogo mangöeoka deʼ o kabingi de nia duba, o haaka deʼ o gurasi, ikali hagala nia arata mahomoa, 14nimä goana nihidodiai ngini nidadiua niedenge deʼ niwi wohanga ma Jou nia Jou Madutu winihi bebasi ngini o Mesiroka o ngï ngini imagilaongo. 15Ma Jou winï tuda ngini nia nonu o tonaka ikokakaha ilua-luasi deʼ homodo-modongo o dodiha ibiha-biha mangöe deʼ makoka-katama. O tonaka madü dudungu ma akere koiwa Unanga wadiai o akere ihahuru o helewoino, hupaya ngini yakunu niokere nia hininga mahuka. 16O tonaka ikokakahaka Unanga winihi döaka o manna mangale nia inomo, o inomo yanö nako-nakoua nia ete deʼ nia tohora. Ma Jou wodiai gënanga mangale winï taili ngini deʼ wohi tipokouku nia hininga, hupaya mabobahaka Unanga yakunu wodiai o oa nginika. 17Ho, uha hakali-kali nia pikiri de nia hidailako deʼ nia kuata mahirete ngini idadi nikaya. 18Nio hohininga ma Jou nia Jou Madutu dika winihi döaka o kaya gënanga nginika. O hali gënanga wodiai karana hiadono o wange nënanga Unanga kawosetiahi o jajika Wadodiai de nia ete deʼ nia tohora. 19Uha niwiwohanga ma Jou nia Jou madutu deʼ uha nima idulu o gikiri mahomoaika mangale nipuji deʼ nimahi gilaongo enangika. O wange nënanga ngohi tinihidöaka o hohininga nako ngini kania-diai dika, maraioka ma Jou winï binaha ngini. 20Nako ngini niwihi ngounua ma Jou nia Jou Madutuika, ngini ma aha winï binaha, hokä hagala o hoana de o berera Wäbinaha nia lako mahimangoka.”
Currently Selected:
O ULANGAN 8: TLB
Highlight
Share
Compare
Copy
Want to have your highlights saved across all your devices? Sign up or sign in
