O ULANGAN 7
7
Ma Jou Madutu Ai ngongikiri manyawa
(Kel. 34:11-16)
1 #
Kis. 13:9
”Ma Jou nia Jou Madutu aha winï ao ngini o bereraika aha ngini nio gogere, deʼ mangöe o hoana deʼ o berera de manyawa wä duhu genangokadau. Nia lako mahimangoka Unanga aha wä duhu tumidi o hoana deʼ o berera iholoi iago-agomo deʼ iholoi i kuata de ngini, enagënanga o Heti manyawa, o Girgasi, o Amori, o Kanaan, o Feris, o Hewi deʼ o Yebusi manyawa. 2Nako ma Jou nia Jou Madutu wohi döaka o hoana deʼ o berera gënanga nia kuaha magoronaka deʼ ngini niä hohihanga önanga, niä toma önanga mata-mata. Uha niä dora önanga nidiai o jaji dede önanga. 3Ngini yakunua nikawingi dede önanga, deʼ uha nia hi gumal̄a nia ngoha-ngohaka yokawingi dede önanga, 4hupaya önanga uha nia ngoha-ngohaka yahitingaka magurutika de ma Jou mangale yahuba o gikiri mahomoa. Nako ngini nia huba o gikiri mahomoa, ma Jou wongamo deʼ ngini aha de majapati winï binaha. 5#Ul. 12:3 Hababu gënanga, nia kilianga o hoana de o berera gënanga manga huhuba-huhuba mangï, nia wedere manga liate-liate o helewo önanga yapulono ikaramati, nia heleuru o Asyera manonako-nonako, deʼ nia tuhuku o gomanga madulada önanga yahuba-huba. 6#Kel. 19:5; Ul. 4:20, 14:2, 26:18; Tit. 2:14; 1Pet. 2:9 Nia diai mata-mata gënanga karana toma Jou nia Jou Madutu. Hagala o hoana deʼ o berera o dunia mal̄okuoka, ngini dika ma Jou nia Jou Madutu winï iriki mangale nidadi Ai umati womä dinga-dingakika.
7Ngini winï hininga deʼ winï iriki ma Jou koigoungua karana ngini iholoi ni amoko de o hoana de o berera mahomoa; igoungu ngini ganga o hoana de o berera duru ni eteke o dunia mal̄okuoka. 8Mä ma Jou winï iriki ngini karana Unanga winï dora ngini deʼ woigo watotomo o jaji wadodiai de nia ete de nia tohora. Ma hababu gënanga Unanga winï hihalamatoka ngini de o kuaha ma ago-agomo deʼ winihi bebasi ngini nigilaongo ma koano Mesirika. 9#Kel. 20:5-6, 34:6-7; Bil. 14:18; Ul. 5:9-10 Nio hohininga ma Jou nia Jou Madutu gënanga woma tengo-tengoka ma Jou Madutu, deʼ Unanga ma Jou Madutu wososetia. Ma Jou wohitö totomo Ai jaji deʼ wohi dumutu Ai dora kahirahi hiädono manga difauku iribuhu o nyawa iwï dora-dora Unanga, deʼ ihi ngounu Ai pareta-paretaika. 10Mä kowo taka-takaua Unanga wä hukumu önanga iwï doha-dohata Unangika. 11Ho, nihi ngounu mata-mata o tita ngohi tohi ado-adono nginika o wange nënanga.”
O barakati o nyawa i hi ngou-ngounika
(Ul. 28:1-14)
12 #
Ul. 11:13-17
”Nako ngini niohininga nihidodiai o pareta-pareta gënanga deʼ nia diai de nia setia, done ma Jou nia Jou Madutu ma aha wo setia o jajika wadodiai dede ngini. Unanga aha wohi matoko Ai dora kahirahi nginika hokä wojajaji nia ete deʼ nia tohoraika. 13Unanga aha winï dora deʼ winihi barakati ngini, hiädono nia ngohaka manga ngöe deʼ nia gegetongo kai dogo-dogo. Unanga aha wohi barakati nia dumule, hiädono ihi hasili o gandum, o anggur deʼ o zaitun ma minya. Unanga aha winihi barakati ngini hiädono nia hapi mangöe deʼ nia kabingi deʼ nia duba. Mata-mata o barakati gënanga aha nia tarima o bereraka ma Jou wi ni döa-döaka nginika, i moteke de ai jaji nia ete de nia tohoraika. 14Mata-mata o hoana de o berera o duniaka nënanga kamoiö makoiwa yamake o barakati hoko gënanga mangöe hokä ngini. Nginioka mata-mata komoiua aha koyo ngohakua deʼ hagala nia aiwani o gigini kamoiö ma aha koibolaua. 15Ngini aha ma Jou winï goana de hagala o panyake deʼ wini hitingakika hagala o bodito ngini nia hö hakihi o Mesiroka, mä o bodito-bodito gënanga aha wahitapal̄u nia haturu-haturu uku. 16Moi-moi o hoana deʼ o berera ma Jou nia Jou Madutu wohi döa-döaka nia kuahaika kokiani ngini niä binaha önanga: uha nia hidumutu o dora onangika. Uha nia huba toönanga manga gikiri, karana o manarama gënanga inï dotagao obodito nginika.
17Mudukua ngini nia pikiri o hoana deʼ o berera gënanga i holoi yowöe hiädono ngini niakunua niä duhu önanga. 18Mä uha niä modongo onangika: nio hohininga okianaga wa dodiaioka ma Jou nia Jou Madutu o Mesir manga koanoika deʼ yongo-dumu ai kawaha. 19Nio hohininga o bodito-bodito niö modo-modongo ngini mahirete nia hakihi, ihö hera-heranga, de o kuata ma amoko ma Jou nia Jou Madutu wapö pake-pake mangale winihi bebasi ngini. Hoko genangoli ma Jou nia Jou Madutu aha wadiai mata-mata o ho-ana de o bereraika niä modo-modongo. 20Maboboloioli ma Jou nia Jou Madutu aha wapuda o ruae toönanga manga hidogoronaka hiädono hagala o nyawa yaku-akunu ihi oara manga diri deʼ ima ngiungiunö aha yobinaha. 21Hoʼ uha niä modongo hagala o hoana deʼ o bereraika gënanga. Ma Jou nia Jou Madutu aha winï riwo ngini. Unanga gënanga ma Jou Madutu wolamo-amoko deʼ himö modo-modongo. 22Hagala o hoana deʼ o berera gënanga aha Wä duhu wä hutu-hutu nia himangoka. Ngini yakunua niä binaha önanga dema japati, hupaya o aiwani-aiwani madorou uha idogo iwöe deʼ idadi o momodongo nginika. 23Hoko gënanga ma Jou nia Jou Madutu aha wohi döaka nia haturu-haturu nginika. Unanga aha wä burakati önanga hiädono önanga yobinaha. 24Unanga aha winihi döaka manga koano nginika. Onanga aha ngini niä toma deʼ toönanga manga romanga aha iwohanga. Kai matemgo mamoiua yakunua inï himanga ngini; önanga mata-mata aha ngini nia binaha. 25Nia tuhuku manga gomanga ma dulada önanga ya huba-huba. Uha nio nahihu o haaka ekola o gurasi ya tau-taulika manga roë hoka deʼ uha nia l̄ë mangale nia diri mahirete. Nako ngini nia tilakuru o pareta gënanga ngini aha nihonenge, hababu ma Jou nia Jou Madutu wä dohata yahuba-huba o gomanga madulada. 26Uha nihi gogere o gahumu moi o gomanga madulada nia tau magoronaka, hupaya o lolai yatotapal̄u uha inï tapalu nginiö. O hali gënanga kokiani ngini niö dohata deʼ nia pulono okiaua yadaene, karana ma Jou walolai.”
Currently Selected:
O ULANGAN 7: TLB
Highlight
Share
Compare
Copy
Want to have your highlights saved across all your devices? Sign up or sign in
