O ULANGAN 4
4
O Musa wahititila o Israeloka hupaya ihingounu
1De o Musa wätemo o hoana deʼ o berera manyawaika gënanga, ”Nihingounu mata-mata o tita naga ngohi tinï doto-dotokoka nginika hiädono nö gogere o tonaka aha ma Jou nia ete deʼ nia tohora manga Jou Madutu, winihidöaka nginika. 2#Him. 22:18-19 Okianaga ngohi tohipopareta, kamahuhutulö mauha nio dogo ekola nia kuranga. Nihingounu ma Jou nia Jou Madutu Ai pareta-pareta ngohi tinihi döa-döaka nginika. 3#Bil. 25:1-9 Ngini mahirete nia make okianaga ma Jou nia Jou Madutu wa dodiai o Peor mal̄okuoka. Moi-moi o nyawa yahö huba-huba o Baal genangokadau yabinaha, 4ena hioko ngini ihirahi nisetia ma Jou nia Jou Madutuika kani wangohi hiädono o öraha nënanga.
5O tita gënanga mata-mata ngohi tinï dotoko nginika hokä ma Jou ahi Jou Madutu wohipopareta. Nihingounu mata-mata gënanga o bereraka aha ngini niö ngohama deʼ niö gogere gënanga. 6Nia diai gënanga de nia setia. Nako ngini nidiai hoko gënanga, done nia sawaro idadi inyata o hoana deʼ o berera ma nyawa mahomoaika. Nako önanga yo ihene mangale o tita-tita gënanga, önanga aha yotemo, ’Duruhe yobarija deʼ manga sawaro o hoana de o berera ma ago-agomo manyawa gënanga!ʼ
7O hoana deʼ o berera ma ago-agomo kiaka naga deʼ manga gikiri hoko gënanga mamohi digino nako yöparalu hokä ma Joua tongone nanga Jou Madutu womahitigi ngoneino? Unanga wonä baluhu o öraha okia dika ngone homahi böaka hogahoko o roriwo Unangika. 8Deʼ o hoana deʼ o berera ma ago-agomo kiaka naga deʼ manga tita-tita hoko gënanga ma adili hokä o tita-tita ngohi tinï doto-dotoko nginika o wange nënanga? 9Nia tailako nihidodiai deʼ niohininga nihidodiai, hupaya nia wowango ma umuru ngini konia wohangua okianaga ngini mahirete nia hakihi. Nihijarita nia ngohaka de nia danongika 10mangale o wange gënanga maöraha ngini nima okoino ma Jou nia Jou Madutu Ai himangoka o Sinai mal̄okuoka. O öraha gënanga Unanga wohitemo ngohino, ’Na toomu o hoana gënanga. Ngohi tö igo önanga ihi gihene okianaga tomau Tohiadono, hupaya önanga imä dotoko ihingounu Ngohino manga umuru magurutu, deʼ hupaya önanga yadotoko toönanga manga ngoha-ngohaka mangale ihihi ngounu Ngohino.’
11 #
Kel. 19:16-18; Ibr. 12:18-19 Nihi jarita nia ngoha-ngohakika sarakia ngini niaino deʼ nima okoino ol̄oku matimioka yahawo-hawoino o nofo mahohuhutu hokä o lobi ipiri-pirini deʼ ma uku itoka-tokara hiädono di hangil̄e. 12De ipaha o ukuino ma Jou winï temo nginika deʼ ngini ni ihene Ai ilingi, mä niwi makeua o rupa madüku okia dika. 13#Kel. 31:18 Dokengoka Unanga winihi ngahu nginika okianaga kokiani ngini niadiai mangale nia totomo o jaji Wadodiai dede ngini. O Tita Ngimoi watuli-tulihoka o helewo yatuli-tulihi o belaka hinoto gënanga kokiani ngini niadiai. 14#Kel. 21:1 Ma jou wohi huloko ngohi tinï dotoko nginika o tita mata-mata kokiani nihi ngounu o bereraka dahao ngini nio ngohama deʼ nio gogere gënanga.”
O hohininga hupaya uha nia huba o gikiri mahomoa
15”Nio hohininga nihidodiai! Maöraha ma Jou o uku ma goronaka o Sinai mal̄okuoka winï temo nginika, ngini okia-kia ua nia make. 16#Kel. 20:4; Im. 26:1; Ul. 5:8, 27:15 Hoʼ nimä goana hupaya ngini uha hiädono nibaradoha karana nimadiai mangale nia diri mahirete o dulada la nia huba o rupa madüku okia dika magoronaka, o nauru ekola o ngoheka, 17-18#Rm. 1:23 o totaleo ekola o nawoko, o aiwani ima tahe-tahe ekola o aiwani mahomoa. 19Uha nibaradoha karana nia huba deʼ nigilaongo okianagaika ngini niamö make-make o dihangoka: O wange malako, o mede deʼ o murumu. Ma Jou nia Jou madutu wahigumal̄a hagala o hoana deʼ o berera manyawa mahomoa yahuba o bara-baranga gënanga. 20#Kel. 19:5; Ul. 7:6, 14:2, 26:18; Tit. 2:14; 1Pet. 2:9 Mä ngini ganga o hoana winihi hohalamatoka o Mesirino, o ngï ngini nia tagongo o huha deʼ o hangihara deʼ duru kohagiria. Ngini winï ao nihupu o bereraino gënanga, hupaya nidadi Ai hoana mahirete hokä nia mao deʼ nia make o öraha nënanga.
21 #
Bil. 20:12
Mä ma Jou nia Jou Madutu wohingamo ngohino hababu karana ngini, deʼ Unanga wokoboto ngohi aha tatobongua o Yordan ma Ngairi deʼ mangale towohama o tonaka iboburereika aha winihi döa-döaka nginika. 22Itedekanokaua ngini aha nia tobongo deʼ nio gogere o tonaka iboburere gënanga; mä ngohi tonïkua, hababu ngohi aha tohonenge nenangoka dau. 23Niohininga nihi dodiai! Uha nia wohanga mangale o jaji ma Jou nia Jou Madutu wadodiai dede ngini. Nihi ngounu Ai pareta; uha hakali-kali nimadiai mangale nia diri o dulada marupa o düku okia dika mangale nia huba, 24#Ibr. 12:29 hababu ma Jou nia Jou Madutu hokä o uku ituhu-tuhuku. Unanga woluku iwihi tero deʼ okia dika.
25De ikali nako ngini ahao ngini madekanoka nigogere o bereraka gënanga deʼ ningohaka deʼ nidanongoka, uha ni baradoha karana nimadiai mangale nia diri mahirete o dulada ma rupa o duku okia magoronaka. O manarama gënanga o dorou moi ma Jou nia Jou Madutu Ai lakoka deʼ aha yadiai Unanga wongamo. 26Tanu o wange nënanga o dihanga deʼ o dunia idadi o hakihi nako ngini nihi ngounu ngohino, o tonaka nio gogogeroka o Yordan ma Ngairi ma honongaka gënanga, ngini aha itaiti nihihanga. Ngini aha koi tedekanua nigogere gënangoka dau; ngini aha nibi-naha kama moiuku. 27#Ul. 28:36 Ma Jou aha winihi kokitingakoka o hoana de o berera ma homoa manyawa manga hidogoronaka deʼ duga-duga nia huhutulu hirahi niwango nia hidogoronaka. 28Genangokadau ngini aha nipuji o giki-gikirika yadodiai deʼ o nyawa manga giama, o giki-gikiri o gota deʼ o helewo yakunua imahi öriki ekola ima hihene, yakunua iol̄omo ekola iame. 29#Yer. 29:13 Daha ngini aha niwi lingiri ma Jou nia Jou madutu, deʼ nako ngini niwi lingiri deʼ nia hininga magahumu, ngini aha ni wi make Unanga. 30Nako ngini inï bänga o bodito mata-mata gënanga deʼ ngini naga o huha magoronaka, done ngini aha nima kilioro ma Jou nia Jou Madutuika deʼ niwihi ngounu Unangika. 31Ma Jou nia Jou Madutu ganga ma Jou madutu duru deʼ ai dora deʼ Ai hayangi. Unanga aha winï mal̄aua ekola winï binahaua ngini, ekola wawohanga Ai jaji wadodiai mahirete deʼ nia ete de nia tohora.
32Nia tailako nihi dodiai o öraha ipaha-pahaika, madeka-dekanuku ngini nimakil̄au owahi, imulaenge mawange maöraha ma Jou Madutu wodiai o nyawa o duniaka nënanga. Nia lingiri yamode-modekika o dunia mal̄okuoka nënanga? Mamoi iböto o hali homodo-modongo idadi mahiraino? Mamoi iböto naga o nyawa yoihene mangale idö dadadi hokä hoko nënanga? 33Mamoi iböto naga o hoana de o berera manyawa yoihenoka moi o gikiri o ukuoka deʼ itemo-temo onangika deʼ kahirahi yo-wango hokä ngini nia mao deʼ nia make? 34Mamoi iböto naga moi o gikiri ibarani yal̄ë moi o hoana deʼ o berera manyawa naga o hoana deʼ o berera moioka deʼ yadiai önanga ma umati mahirete hokä ma Jou nia Jou Madutu wa dodiai mangale ngini o Mesiroka? Ngini nia make mahirete sarakia ma Jou Madutu deʼ o kuata ma ago-agomo wä dotagao obodito deʼ o parangi, wa karajanga ihö hera-heranga deʼ wadia wadiai hagala o hali homö modo-modongo. 35#Mark. 12:32 Mata-mata gënanga ma Jou wohi dumutu nginika mangale wohi nyata igoungu duga-duga o Jou gënanga ma Jou Madutu, deʼ koiwa naga mahomoa. 36O dihanguku Unanga wohitoihene Ai ilingi nginika mangale winï dotoko ngini: o duniaka nënanga Unanga wohi matokoka nginika Ai uku homö modo-modongo deʼ o ukuino gënanga Unanga wo temo-temo nginika. 37Karana Unanga wädora nia ete deʼ nia tohora, done ngini Winï irikoka; deʼ Ai kuaha ma ago-agomo ngini Winï aoka o Mesir mabereraka deʼ nihupu. 38Hagala o hoana deʼ o berera iholoi ilago-agomo deʼ iholoi yo kuata Wä duhu nia himangoka, mangale winingotaka ngini toönanga manga bereraika Winïhi döa-döaka nginika, o berera öraha nënanga idadi tingini madutu. 39Hababu gënanga nimanako o wange nënanga deʼ uha nia wohanga; ma Jou duga-duga womatengo ma Jou madutu o dihangoka deʼ o duniaka; koiwa naga mahomoa. 40Nihi ngounu mata-mata o tita ngohi tinihi döa-döaka nginika o wange nënanga, done ngini deʼ nia difauku aha yo halamati deʼ ihigila yowango o bereraka ma Jou nia Jou Madutu winihi döa-döaka, idadi tingini madutu kahi ado-adonika.”
O roriwo ma kota-kota o Yordan ma Ngairi o wange mahiwaroko
41 #
Yos. 20:8-9
De o Musa watumutu o kota o gahumu hange o Yordan ma Ngairi o wange mahiwaroko, 42idadi o roriwo ma kota, o ngï o nyawa yakunu wohihalamati halamati ai diri nako ünanga kowohangajaua wä toma ko ai haturu ua. Unanga yakunu wohi oara ai diri o kota moika gënanga hupaya iwi tomaua. 43Mangale o Ruben ai hoana yasadia o Bezer ma kota o tonaka irata-rata o tonaka ikakahaka; mangale o Gad ai hoana o Ramot ma kota o Gilead madaeraka, deʼ mangale o Manasye manyawa o Golan ma kota o Basan madaeraka.
O Israel manyawa yahi döaka ma Jou Ai tita
44De o Musa wohi döaka ma Jou Madutu Ai tita-tita deʼ o datoro-o datoro o Israel manyawaika. 45-46O hali gënanga wadiai önanga o Mesir mabereraka deʼ yohupu ipahaika deʼ önanga naga o Yordan ma Ngairi o wange mahiwaroko ma waioka, imari himanga deʼ o Bet-Peor ma kota. O daera gënanga mahira o Sihon ai daera, o Amori manyawa manga koano, mahira wopareta o Hesybon makotaka. O Musa deʼ o Israel manyawa iwi hohihanga ünanga maöraha önanga o Mesir mabereraka deʼ yohupu. 47Onanga yogogere ma Koano Sihon ai tonakoka gënanga, ikali ma koano Og o Basanino ai tonaka womatengo o Amori manga koano mahomoa wogogere o Yordan ma Ngairi o wange mahiwaroko. 48O tonaka gënanga itaurika o Aroër makotaka o Arnon ma Ngairi madatekoka, igila-gila o koremieuku hiädono o Siryon mal̄okuika enagënanga o Hermon mal̄oku, 49de o Yordan ma Ngairi o wange mahiwaroko madaera mata-mataika deʼ o koremie harail̄e hiädono o Honenge ma Ngöto o Pisga mal̄oku matimiuku.
Currently Selected:
O ULANGAN 4: TLB
Highlight
Share
Compare
Copy
Want to have your highlights saved across all your devices? Sign up or sign in
