O ULANGAN 3
3
O Israel iwi hohihanga O Og Makoano
(Bil. 21:31-35)
1”De ipaha ngone hotagi o koremieuku hodumutu o Basan madaera. O Og, o Basan ma koano wotagi ai himangika deʼ yo ngodumu aitentara mangale inä parangi ngone imahi tigi-tigi o Edrei ma kotaika. 2Mä ma Jou wohitemo ngohino, ’Uha nï modongo unangika, Musa. Ngohi aha tonihidöaka ünanga, aitentara deʼ mata-mata ai daera ngonaika. Nihidapari ünanga hokä ngona nihi daparoka o Sihon o Amori ma koano wopopareta o Hasybon mabereraka.’
3Ho ma Jou tongone nanga Jou Madutuö wonahi döaka ma koano Og de ai kawaha ngoneino, deʼ önanga mata-mata ngone hahohihanga. 4O öraha gënanga ngone haora mata-mata ai kota kamoiö maha mal̄aikaua. Mata-mata naga o kota mori butanga ngone haora o Argob madaera ingodumu wapopareta ma Koano Og o Basanino. 5Mata-mata o kota gënanga yakuata deʼ o bebeno-bebeno o mehele magogurutil̄e, o ngorana ma ago-agomo deʼ o ngorana ma dudukuru mangale yabeno o ngorana ma ago-agomo gënanga. Mahomoa deʼ gënanga naga ma ngöe o kota ma homoa ma bebeno o mehelua. 6Mata-mata o kota gënanga ngone hawedere, deʼ mata-mata o nau-nauru, o ngo ngoheka, deʼ toönanga manga ngoha-ngohaka ngone hä toma, hokä ngone hihidapari ma Koano Sihon o Hesybon ino ai kota-kota. 7Toönanga manga gigini ngone ha l̄ë deʼ o kota-kota gënanga ngone haora.
8O öraha gënanga ngone hal̄ë o Amori ma koanoka yahinotö gënanga o Yordan ma Ngairi o wange ma hiwaroko madaera, deʼ o Arnon ma Ngairi hiädono o Hermon mal̄okuika. (9O Hermon mal̄oku o Sidon manyawa yahetongo o Siryon, deʼ o Amori manyawa yahetongo o Senir.) 10Ngone hal̄ë ma Koano Og o Basanino ai daera: ma kota-kota o tonaka i rata-rata ikokurutil̄eoka, o Gilead deʼ o Basan madaera, igila-gila o wange mahiwaroko ima tero magurutika o Salka deʼ o Edrei ma kota.”
(11Ma Koano Og ganga o Refaim manyawa mabobaha. Ai mayeti ma peti yadiai de o helewo magurutu o metere iata deʼ mangoata ngade o metere hinoto imoteke o duduga biaha. Hiadono öraha nënanga kaha makeohi o Raba mabereraka, o Amori manyawa manga kota.)
O hoana-o hoana yogogogere o Yordan ma Ngairi o wange ma hiwaroko madaera
(Bil. 32:1-42)
12”O tonaka gënanga idadioka tongone madutu deʼ iböto, ngohi tahi döaka o Ruben deʼ o Gad manga hoanika o Aroër makota o koremieuku madaera imahi tigi-tigika o Arnon ma Ngairika, deʼ o Gilead madaera deʼ mal̄oku-l̄oku o hidoku moi ihi deetongo deʼ ma kota-kota. 13O Manasye ai hoana mahonongaika ngohi tahi döaka o Gilead madaera mahou, o Basan madaeraö mahira o Og ai daera, enagënanga mata-mataika o Argob madaera.”
(O Basan yanako hokä o Refaim manyawa manga berera. 14O Yair o Manasye ai hoanino wal̄ë o Argob madaera mata-mataika, enagënanga o Basan madaeraka hiädono o Gesur deʼ o Maakha ma batingoka. Unanga wohiromanga o kapo-kapongo gënanga imoteke ai romanga mahirete, deʼ hiädono öraha nanga kayanakohi hokä o Yair ai kapongo.)
15”O Gilead madaera ngohi tahidöaka o Makhir ai ahaluku o Manasye ai hoanino. 16Deʼ o Ruben deʼ o Gad manga hoana ngohi tahidöaka o Gilead deʼ o Arnon ma Ngairimahi dogorona madaera. O Ngairi mahidogorona gënanga marupa toönanga manga batingi o koreharail̄e, hode o kore mieuku önanga imahika batingi, 17O wange madumuniha, toönanga manga daera itaurika hiädono o Yordan ma Ngairi, o Galilea ma Taaga o koremieuku hiädono o Honenge ma Ngöto o koreharail̄e, igila-gila hiädono o Pisga mal̄oku ma timiuku o wange ma hiwaroko.
18 #
Yos. 1:12-15
O öraha gënanga ngohi tohidöaka onangika o pareta nënanga: Ma Jou nia Jou Madutu winihidöaka nginika o Yordan ma Ngairi o wange mahiwaroko madaera mangale tingini nia ngï nigogere. Mä nia tentaraka kokiani deʼ manga däe deya tobo-ngo o Yordan ma Ngairi nïa hihira o Israeloka manga hoana maho-moa. 19Duga-duga nia ngohaka deʼ nia hekata ikali nia gigini ma ngöe-ngöe gënanga yakunu igogogere o kotaka naga tinihi döa-döakoka nginika. 20Nia riwo nia nyawa o hoana deʼ o berera moi hiädono önanga yogogogere o tonaka aha ma Jou nia Jou Madutu winihi döa-döaka onangika o Yordan ma Ngairi o wange madumuniha, deʼ hiädono ma Jou wahi gumal̄a önanga yowango irorahai dokengoka; hokä wodiaioka nginika nenangoka dau. Genanga deʼ iböto dahaö ngini yakunu nimakilioro nia tonaka madutuika ngohi tinihi döa-döakoka nginika.
21De ngohi tï temo o Yosuaika: Ngona na mäke oka hagala wa dodiai ma Jou nia Jou madutu o Sihon deʼ o Ogika, o koano yahinoto gënanga. Hoko genangö ngona aha nahidapari moi-moi o koano ngona na ora-ora manga tonaka. 22Uha nä modongo onangika, karana ma Jou ani Jou Madutu aha woparangi mangale ngona.”
O Musa iwi higumal̄aua wö ngohama o Kanaan
23 #
Bil. 27:12-14; Ul. 32:48-52 ”O öraha gënanga ngohi togahoko ma Jouika: 24Ya Jou Duru noko Kurutil̄e, ngohi tohi öriki nohimö mato-matoko ngohino nënanga marupa madodihiraka Ani manarama iloago-agomo deʼ ihera-heranga. Koiwa o gikiri mahomoa o dihangoka ka yaoa o duniaka hokä Ngona nakunu nodiai o hali-o hali yomodo-modongo. 25Nohihi gumal̄a ngohi tatobongo o Yordan ma Ngairi, ya Jou mangale tamake o berera iboburere doka mahonongaka, o daera deʼ mal̄oku-l̄okuoka ihohailoa deʼ o Libanon mal̄oku madoomu.
26Mä ngini nidadioka o hababu ma Jou wohingamo ngohino hiädono Unanga woluku watarima ahi gogahoko. I idulu yaino ma Jou wato, ’Yaoaka, Musa uha ngona nahetongoli o hali gënanga. 27Noiki o Piaga mal̄oku matubuil̄e deʼ napulono o koremie uku deʼ o korehara il̄e, o wange mahiwaroko deʼ o wange ma dumuniha. Na tailako nohidodiai okia ngona namö make-make gënanga, hababu ngona aha kona tobongua o Yordan ma Ngairi. 28Nohidöaka o hidumutu-hidumutu Yosuaika. Nohi kuata aihininga, hababu ünanga aha wä tuda o hoana deʼ o berera manyawa gënanga doka ma honongaika mangale yogogere o berera namö make-make gënanga.’
29De ngone hogogere waioka o Bet-Peor ma kota doka ma honongaka.”
Currently Selected:
O ULANGAN 3: TLB
Highlight
Share
Compare
Copy
Want to have your highlights saved across all your devices? Sign up or sign in
