O ULANGAN 26
26
Ihi huba-huba o gugutuku ma hasilino
1”Nako ngini niwohamoka o bereraika ma Jou nia Jou Madutu winihi döa-döaka deʼ nio gogeroka genangokadau, 2#Kel. 23:19 done mahasili madodihiraka hagala okianaga nia totoomu nia tonakino kokiani ngini niö noa o karaja moiuku, deʼ ngini niao mangï ika ma Jou nia Jou Madutu wairi-irikika. 3Nioiki ma imamika womomanarama o öraha gënanga deʼ nia hetongo unangika, ’Ngohi tohi nyata ma Jou ani Jou Madutuika ngohi towohamoka o bereraika Wahi jajaji nanga ete deʼ nanga tohoraika mangale wonahi döaka ngoneino.’
4Ma imam aha watarima o karaja gënanga ani giamoka deʼ wa kelenga ma Jou ani Jou Madutu Ai huhuba mangï mahimangoka. 5De ipaha ma Jou ani Jou Madutu Ai himangoka kokiani ngona na hetongo o demo-demo nënanga: ’Ya Jou, tongohi ahi ete deʼ ahi tohora o Aram manyawa womatengo wonö niarara. Unanga wä ao aingohaka deʼ ai hekata o Mesirika mangale wogogere dokengoka hokä o nyawa imahi rehe-rehenika. Maöraha yoiki dokengika önanga duga-duga ka manga huhutulu, mä önanga yodadi o hoana deʼ o berera ma ago-agomo deʼ yokuata. 6O Mesir manyawa imï hidiai ngomi mahayanga koiwa deʼ imï pakisä ngomi mikarajanga hokä o gilaongo. 7De ngomi mimahi böaka migahoko o roriwo Ngonaika, Jou, mia ete deʼ mia tohora manga Jou Madutu. Ngona noihene to ngomi mia böaka deʼ napulono mia tago-tagongo, tongomi mia huha deʼ mia hangihara. 8De o kuaha deʼ o kuata ma amoko o Mesiroka Ngona nomihi bebasi ngomi. Ngona nodiai o nonako ihera-heranga deʼ okianaga ihera-heranga deʼ napuda idö dadadi mia haturu yomodo-modongo. 9De ipaha Ngona nomi ao ngomi nenangino deʼ nomihi döaka o tonaka ikaya-kaya deʼ iboburere nënanga ngomino. 10Hababu gënanga, ya Jou, nenangoka dau ngohi tohihuba o tonaka Nohihi döa-döakoka ngohino mahasili madodihiraka.’
Daha nakelenga o karaja gënanga ma Jou Madutu Ai himangoka, deʼ nïhuba Unanga. 11No sukur mangale hagala o rijiki ma Jou ani Jou Madutu wo nihi döa-döaka ngonaika deʼ ani hekata deʼ ani ngohakika. Nahigaro o Lewi manyawa deʼ o nyawa yotagi-tagino yogogogere ti-ngini nia hidogoronaka yonïki o rameanga gënanga magoronaka.
12 #
Ul. 14:28-29
O taongo mahangeoka mahigetongo kokiani ngini nihihuba o regu ngimoi maregu moi, nia tonaka mahasili o regu ngimoi o regu moi o Lewi ma imamika, o nyawa yotagi-tagino, o ngohaka o gohihi deʼ o bobao, hiädono nia kota yogetongo ma goronaka önanga yamake o inomo yopoparalu. Nako iböto, 13nitemo ma Jou nia Jou Madutuika, ’O regu ngimoi maregu moi ahi tonaka mahasili kokiani tohihuba Ngonaika, Jou, kamahuhutulö ma koiwa mahou ahi tauoka; mata-mata ngohi tohi döa-döaka o Lewi manyawaika o nyawa yotagi-tagino, o ngohaka o gohihi deʼ o bobaoika hokä nohi poparetaka Jou ahi Jou Madutu ngohino. Ani paretaino Jou mangale ihi huba-huba o regu ngimoi maregu moi koiwa naga ngohi tatilakuru. 14Ihi huba-hubaino gënanga kama huhutulö ma ngohi taol̄omua. Maöraha ngohi magogiria o haharu mapakeanga tapake, ekola tao tohihupu ahi tauoka maöraha ngohi topesekuku, ekola ngohi tohi doaka hokä o inomo ihi nia-niata o nyawa yohone-honengika. Ngohi tonihi ngounoka Ngonaika, ya Jou; hagala nohi popareta ngohi tadiaioka. 15Ani ngï itebi-tebinoka o horogaka nömodeke Ngona näpulono deʼ nahi barakati Ani umati o Israeloka; nohi barakatiö o berera ikaya-kaya deʼ iboburere Nomihi döa-döakoka ngomino imamoteke deʼ Ani jaji tongomi mia ete deʼ mia tohoraika.’ ”
Ma Jou Ai ngongiriki manyawa
16”O wange nënanga ma Jou nia Jou Madutu winï hipareta ngini mangale nia diai hagala o pareta gënanga; nia diai mata-mata deʼ nia setia deʼ nia jiwa deʼ nia röehe magahumu. 17O wange nënanga ngini niwihi gounu ma Jou hokä nia Jou Madutu. Ngini nijaji aha niwihigounu Unangika deʼ nia diai hagala Ai tita deʼ Ai pareta. 18#Kel. 19:5; Ul. 4:20, 7:6, 14:2; Tit. 2:14; 1Pet. 2:9 O wange nënanga ma Jou winitarima ngini hokä Ai umati mahirete, hokä winihi jajaji nginika, deʼ Unanga winihi pareta ngini mangale nia diai hagala Ai pareta. 19Ma Jou aha winï diai ngini iholoi niamoko deʼ hagala o hoana deʼ o berera manyawa mahomoa Wahi dädadioka, deʼ ngini aha inï higiriri deʼ inï horomati. Ngini nidadi ma Jou nia Jou Madutu Ai umati hokä Wo jajajioka.”
Currently Selected:
O ULANGAN 26: TLB
Highlight
Copy
Compare
Share
Want to have your highlights saved across all your devices? Sign up or sign in
