O ULANGAN 27
27
Ma Jou Madutu Ai tita yatulihi o helewoika
1De ipaha kamamoi deʼ o Israeloka manga tutuda, o Musa wo hiädono o behehongo nënanga o hoana deʼ o berera ma nyawaika gënanga, ”Nihi ngounu hagala o pareta ngohi tohi döa-döaka nginika o wange nënanga. 2#Yos. 8:30-32 Mawangeoka ngini nia tobongo o Yordan ma Ngairi mangale niwohama o bereraika ma Jou nia Jou Madutu winihi döa-döaka nginika, kokiani ngini nia oko il̄e o helewo ma ago-agomo o gahumu muruono naga daha nia kapurika. 3Nia tulihi o helewo-helewoika gënanga o tita-tita nënanga mabetongo moi-moi.
Nako ngini niwohamoka o berera ikaya-kaya deʼ iboburereika winihi jajajioka ma Jou nia ete deʼ nia tohora manga Jou Madutu nginika, 4deʼ ngini o Yordan ma Ngairi mahomoaka nia ikaoka, kokiani ngini nioiki o Ebal mal̄okuika. Genangokadau kokiani ngini nia oko il̄e deʼ nia kapuru o helewo-helewo gënanga hokä ngohi tini hipoparetaka nginika o wange nënanga. 5#Kel. 20:25 O ngïoka gënanga kokiani nginiö nihigoko mangale ma Jou nia Jou Madutu o gahumu moi o huhuba mangï o helewo komaiwahi yatüku deʼ o pakakaha o behi, 6hababu moi-moi o huhuba mangï ihi goko mangale ma Jou nia Jou Madutu kokiani yadiai deʼ o helewo magahu-gahumu. O huhuba mangï mal̄okuoka gënanga kokiani ngini nihi huba o huhuba-huhuba yatö tuhu-tuhuku. 7Nihi hubali nia dame mahuhuba deʼ ni ol̄omo genangokadau inoli nimore-morene ma Jou nia Jou Madutu Ai himangoka. 8O helewo-helewo yakapu-kapurika mal̄okuoka gënanga kokiani ngini nia tulihi nia totararonuku ma Jou Madutu Ai tita mabetongo moi-moi.”
9De ipaha kamamoi deʼ o Lewi ma imam-imam, o Musa wätemo o Israel manyawaika mata-mata, ”Riadodoto nia tailako nihidodiai deʼ ni ihene! O wange nënanga ngini nidadioka ma Jou nia Jou Madutu Ai umati. 10Hababu gënanga niwihi ngounu ma Jou nia Jou Madutu deʼ nia diai mata-mata Ai pareta ngohi tohi döa-döaka nginika o wange nënanga.”
O lolai o nyawa ihi ngou-ngounikaua
11De o Musa wätemo o Israel manyawaika, 12#Ul. 11:29; Yos. 8:33-35 ”O Yordan ma Ngairi nia tobongo deʼ iböto, o Simon ai hoana, o Lewi, O Yehuda, o Isakhar, o Yusuf deʼ o Benyamin manga hoana kokiani ima okoino o Gerizim mal̄okuoka maöraha önanga yahetongo o barakati o hoana ma nyawaika nënanga. 13Maöraha yahetongo o lolai, o Ruben ai hoana, o Gad, o Asyer o Zebulon, o Dan ikali o Naftali manga hoana kokiani ima okoino o Ebal mal̄okuoka. 14O Lewi manyawa kokiani yahetongo o demo-demo nënanga deʼ manga ilingi yakua-kuatil̄e deʼ o Israel manyawa kokiani yö baluhu, ’Amin’.
15 #
Kel. 20:4, 34:17; Im. 19:4, 26:1; Ul. 4:15-18, 5:8 O Lewi manyawa: ’Yobodito o nyawa yododiai o dulada o helewo, o gota ekola o haaka deʼ o gurasi, deʼ yahuba kaima ngiu-ngiunu. Ma Jou wodohata yapuji-puji o gomanga!.’
O kawaha yongodumu: ’Amin!ʼ
16 #
Kel. 20:12; Ul. 5:16 ’Yobodito o nyawa yahoromatiua manga dimono deʼ yamal̄aika önanga yapaliaraua.’
’Amin!ʼ
17 #
Ul. 19:14
’Yobodito o nyawa yatotururu manga tonaka mabatingi imahi kokabatingi’
’Amin.’
18 #
Im. 19:14
’Yobodito o nyawa yahirö rehe-rehene o nyawa yopilo-piloko.’
’Amin.’
19 #
Kel. 22:21, 23:9; Im. 19:33-34; Ul. 24:17-18 ’Yobodito o nyawa yä ora o nyawa yotagi-tagino, o ngohaka o gohihi deʼ o bobao manga haku.’
’Amin!ʼ
20 #
Im. 18:8, 20:11; Ul. 22:30 ’Yobodito o nyawa wï hikauku ai ama karana ima röehe moi deʼ ai ama ngoi hekata momatengo ani.’
’Amin!ʼ
21 #
Kel. 22:19; Im. 18:23, 20:15 ’Yobodito o nyawa imako röehe moi deʼ o aiwani.’
’Amin.’
22 #
Im. 18:9, 20:17 ’Yobodito o nyawa imako roëhe moi de ngoi hiranga o ama moi deʼ o ayo moi, ekola amiranga ima ama moi deʼ ima ayo moi.’
’Amin!ʼ
23 #
Im. 18:17, 20:14 ’Yobodito o nyawa imako röehe moi deʼ ngoi toroa.’
’Amin!ʼ
24’Yobodito o nyawa yotoma ima ngiu-ngiünu.’
’Amin!ʼ
25’Yobodito o nyawa yototarima o tiwi o uru mabobokumu mangale yätoma o nyawa manga howono koiwaiwa.’
’Amin!ʼ
26 #
Gal. 3:10
’Yobodito o nyawa yatotomua ma Jou Madutu Ai tita deʼ Ai dodotoko deʼ manga manarama.’
’Amin!ʼ ”
Currently Selected:
O ULANGAN 27: TLB
Highlight
Copy
Compare
Share
Want to have your highlights saved across all your devices? Sign up or sign in
