O ULANGAN 14
14
O haharu madodagi yö duhu-duhunu
1 #
Im. 19:28, 21:5 ”Ngini nënanga ma Jou nia Jou Madutu Ai umati. Hoʼ maöraha ngini nihaharu mangale o nyawa yohone-honenge, uha nia röehe nia l̄abo ekola nia kori nia häeke mahimangino, hokä ya dodiai o hoana deʼ o berera mahomoa manyawa. 2#Kel. 19:5-6; Ul. 4:20, 7:6, 26:18; Tit. 2:14; 1Pet. 2:9 Ngini nanga toma Jou nia Jou Madutu; hagala o hoana deʼ o berera o dunia mal̄okuoka, ngini dika ma Jou Madutu winï iriki mangale nidadi Ai umati.”
O aiwani ihoharamu deʼ ihohalali
(Im. 11:1-47)
3”Uha nia ol̄omo o aiwani ma Jou wohi nyö nyata-nyata iharamu. 4Ngini yakunu nia ol̄omo o aiwani-o aiwani nënanga: o hapi, o kabingi, 5o maijanga o duba o honganika, o kabingi o honganika 6deʼ mata-mata o aiwani makuliti i bela-belaka deʼ ma inomo yawedere yogilio mahohinoto. 7Ngini yakunua nia ol̄omo o aiwani makuliti ibelakua deʼ ma inomo yawedere yogilioua mahinoto. Uha nia ol̄omo o unta, o kelinci ekola o marmot. O aiwani gënanga iharamu, karana ngaroka mainomo yawedere yogilio mahinoto, mä hohinoto, mä kuliti ibelakua. 8Uha nia ol̄omo o ode. O aiwani gënanga iharamu karana ngarokä makuliti ibelaka, enanga ma inomo yawedere yogilioua mahinoto ma akeme yakunua nia ol̄omo, mahonenge yakunua nia peke.
9Ngini yakunu nia ol̄omo hagala o nawoko dema ëboka deʼ ma unahoka. 10O aiwani iwö wango-wango o akeroka ma ëbe koiwa deʼ ma ünaha koiwa ganga iharamu, hoʼ yakunua nia ol̄omo.
11Ngini yakunu nia ol̄omo hagala rupa o totaleo iho haramua. 12-18Mä naga o totaleo o rupa muruono naga yakunua nia ol̄omo, enagënanga: o rajawali, o goroko, o wuku, hagala i rupa o kawihi, o kol̄oba, o wogono, o totaleo o unta, o ula-ula, o blekok deʼ hagala i rupa o huweko, o undan, o totaleo o kasa deʼ o manoko.
19Mata-mata o aiwani ma alu-aluhu deʼ mago gahuhuoka gënanga iharamu, hoʼ yakunua nia ol̄omo. 20O aiwani deʼ mago gahuhuoka ihoharamua yakunu nia ol̄omo.
21 #
Kel. 23:19, 34:26 O aiwani ihonenge mahirete yakunua ngini nia ol̄omo, mä o nyawa o dagi-dagino naga yogogogere tingini nia hidogoronaka yakunu ya ol̄omo, ekola niä bukunu o nyawa dagi-dagino. Ngini ganga o umati inï tinga-tingakoka mangale ma Jou nia Jou Madutu.
O duba mangohaka ma akeme ekola o kabingi mangohaka yakunua nihi dohakai deʼ ma ayo mahuhu mateongo.”
O datoro mangale ihihö huba-huba o regu ngimoi maregu moi
22 #
Im. 27:30-33; Bil. 18:21 ”O taongo ihi getongo kokiani ngini nia tingaka o regu ngimoi o regu moi mata-mata nia tonaka mahasilino. 23Ma Jou nia Jou Madutu Ai himangoka, o ngï Wairi-irikoka ko kiani ngini nia ol̄omo ihihö huba-huba o regu ngimoi maregu moi o gandum, o angguru mateongo, o zaitun maminya deʼ ikali o hapi ma ngohaka deʼ nia kabingi deʼ nia duba mangohaka madomoro. Nia diai o hali gënanga hupaya mangale salalu ngini nimadotoko niwi horomati ma Jou nia Jou Madutu. 24Nako o ngï ma Jou nia Jou Madutu wairi-iriki ikurutikaholi deʼ nia tau, hiädono o regu ngimoi, maregu moi nia tonaka mahasilino ma Jou nia Jou Madutu winihi döa-döaka yakunua ngini niao genangika dau, done 25nia hukunu nia tonaka ma hasilino gënanga ma hidoku deʼ niao matiwi o ngï ma Jou nia Jou Madutu wairi-irikika. 26Nihi ija o tiwi gënanga mangale okia dika ngini nioigo –o hapi ekola o kabingi deʼ o duba, o angguru mateongo ekola o sopi– deʼ mangïoka gënanga, ma Jou nia Jou Madutu Ai himangoka ngini deʼ nia ngohaka deʼ nia hekata kokiani nia ol̄omo kamamoi deʼ nimahi sosanangi.
27Uha nia mal̄aika o Lewi manyawa yogogogere nia bereraka yohuha moiua yapaliara; nio hohininga önanga gënanga manga tonaka mahirete koiwa. 28Mabobaha o taongo mahangeoka ihi geto-getongo, kokiani ngini niao o regu ngimoi maregu moi nia tonaka ma hasilino deʼ nia toomu nia bereraka. 29O inomo gënanga mangale o Lewi manyawa karana önanga koiwa manga tonaka, deʼ mangale o nyawa o dagi-dagino, o gohihi ma ngohaka deʼ o bobobao yowö wango-wango nia bereraka. Onanga yakunu yaino deʼ ima l̄ë hagala önanga yopoparalu. Nako ngini nia diai hoko gënanga, done ma Jou nia Jou Madutu aha Wohi barakati hagala nia usaha.”
Currently Selected:
O ULANGAN 14: TLB
Highlight
Share
Compare
Copy
Want to have your highlights saved across all your devices? Sign up or sign in
