O ULANGAN 13
13
1Nako o nabi womatengo ekola ai biaha wonä nanere winihi jaji moi o mujizat ekola ihö hera-heranga 2deʼ madungutu hupaya ngini nia huba deʼ nima higilaongo hagala o gikirika komaiwahi ngini nia nako, ngarokä okianaga winihi jajaji gënanga igou-goungu idadi, 3uha niwi domataga unangika. Ma Jou nia Jou Madutu wï pake o nyawa geunanga mangale winï taili ngini, mangale watailako botekä igou-goungu ngini niwï hininga ma Jou deʼ nia hininga ma gahumu ekola kowali. 4-5O nyawa marupa hoko gënanga kokiani iwi hukumu iwi ho honenge, karana womau winihi rehene ngini o ngekomo ma Jou nia Jou Madutu winihi popareta nginika. Unanga ganga o nyawa ma dorou karana winï huloko ngini niwilawani ma Jou nia Jou Madutuika winihi bebebasi ngini o Mesiroka, o ngï ngini imä gilaongo. Ho, ünanga kokiani niwitoma, hupaya o dorou gënanga nia hohihanga. Mä ngini kokiani niwinïki ma Jou nia Jou Madutu deʼ niwi horomati, deʼ niwihingounu Unanga, deʼ nia diai hagala Ai pareta. Kahirahi nisetia deʼ nimahi gilaongo Unangika.
6-7Nako ani dodoto ekola ani ngohaka o nauru ekola o ngoheka, ekola ngoni hekata nomï dora-dora ekola ani dodiawo maoa womahi bongonika deʼ wonibaja mangale nahuba o gikiri mahomoa ngona kona nakoua deʼ ani ete deʼ ani tohora mayanakoua, hagala o hoana deʼ o berera manyawa yotigi-tigino deʼ yokokurutika manga gikiri, 8uha nihi gihenika ünanga deʼ uha nohigumal̄a wonibaja. Uhali nïdora ekola nïriwo o nyawa geunanga. 9-10Unanga kokiani niwi kaweli deʼ o helewo hiädono wohonenge. Kokiani ngona ihira nomulaenge nikaweli, deʼ yongodumu o kawaha imahi moteke. O nyawa wahowo-howono gënanga kokiani niwitoma, hababu ünanga womau winihi tingaka ngini deʼ nia Jou Madutu ino ima gilaongo o Mesiroka, deʼ wonahi bebasi ngone. 11Done yongodumu o Israel manyawa aha yoihene hagala o doma gënanga deʼ idadi yohawana, hiädono kao nyawa moiö ma, yodiai okaua itotorou gënanga.
12Nako ahaö ngini nio gogere o kota-kota ma Jou nia Jou Madutu winihi döa-döaka nginika, yakunu idadi o abari yodogilianga 13naga yamuruono naga o nyawa madorou nia hoana deʼ nia bereraino yahirehenoka o kota manyawa mangale yahuba o gikiri ngini konia nako-nakoua. 14Nako ni ihene ima kokuhudu hoko gënanga, niatailako nihidodiai. Nako igou-goungu o dorou gënanga idadioka, 15done yongodumu o kota manyawa gënanga kamamoi deʼ manga gigini kokiani yatoma. O kota gënanga kokiani yabinaha kama moi-uku. 16Ingodumu o kota manyawa gënanga manga arata kokiani ya toomu deʼ yatoporonil̄e o tonaka ilua-luasoka, daha o kota deʼ hagala manga arata kokiani yatuhuku hokä o huhuba ma Jou nia Jou Madutuika. Genanga mata-mata deʼ iböto kokiani niamal̄aika idadi okia honanga mangedere deʼ yakunua ihi gokoli. 17O bara-baranga yalololai gënanga yakunua nia gogono mangale nia diri mahirete, ma kokiani nia binaha kama moiuku. Done ma Jou Ai dohata aha iogoro deʼ Unanga aha wohi matoko o dora deʼ o hayanga nginika. Unanga aha ai hininga imura nginika deʼ winihi dadi ngini o hoana deʼ o berera ma ago-agomo hokä wo jä jajioka nia ete deʼ nia tohoraika, 18iti yakunu ngini nihi ngounu hagala Ai pareta ngohi tohi ado-adono nginika o wange nënanga, deʼ nia diai hagala Ai mau.”
Currently Selected:
O ULANGAN 13: TLB
Highlight
Share
Compare
Copy
Want to have your highlights saved across all your devices? Sign up or sign in
