O ULANGAN 12
12
Duga-duga nenangö moi o puji mangï
1”Nënanga o tita-tita kokiani ngini nihi ngounu ho nia umuru magurutu o bereraka ma Jou, nia Jou Madutu wahi döa-döaka nia ete deʼ nia tohoraika. 2Niwohama o bereraika gënanga deʼ iböto kokiani ngini nia wedere o puji mangï ol̄oku ma gogurutil̄eoka, o doporono-o doporonoka deʼ o gota mahoka irubu-rubu matimiuku, o hoana deʼ o berera manyawa genangokadau yogö gogere mangï yahuba toönanga manga gikiri. 3#Ul. 7:5 Nia ruba toönanga manga huhuba-huhuba mangï deʼ nia wede-wederuku o liate-liate o helewo naga önanga yapulono deʼ ya mao ikaramati. Nia tuhuku o Asyera ma nonako-nonako, deʼ nia wedere toönanga manga gomanga madulada, hiädono o gikiri-gikiri gënanga aha yahuba okaua o ngïoka gënanga.
4Maöraha ngini niwi huba ma Jou nia Jou Madutu, uha nimä duru o nyawa geönanga yahuba toönanga manga gikiri. 5Ingodumu o Israeloka manga hoa-hoana madaeraino ma Jou nia Jou Madutu aha wairiki moi o ngï hupaya tongone nanga hoana deʼ nanga berera manyawa yakunu yoboa Ai himangika deʼ iwi huba Unanga. 6O ngï ika gënanga kokiani ngini niao o huhuba-huhuba i tö tuhu-tuhuku ikali o huhuba-huhuba mahomoa, nia huhuba o regu ngimoi ikali nihi huba-huba mahomoa, o huhuba nia jaji mabobangu, o huhuba o hininga mahuka deʼ o hapi mangohaka deʼ nia kabingi deʼ nia duba madomoro. 7Genangoka dauö, ma Jou nia Jou Madutu Ai himangoka, ngini kamamoi deʼ nia hekata deʼ nia ngoha-ngohaka kokiani ni ol̄omo deʼ nia morene mangale hagala nia hidailako mahasili karana ma Jou nia Jou Madutu winihi barakati.
8Nako gënanga maöraha iboaka, ngini uhali nia diai hokä o öraha nënanga. Hiadono öraha nënanga ngini nipuji nia hininga mahuka, 9karana ngini niwohamowahi o bereraika ma Jou nia Jou Madutu nihi döa-döakoka nginika, o ngï ngini yakunu ni gogere kai rorahai. 10Ngini nia tobongo o Yordan ma Ngairi deʼ iböto, ma Jou nia Jou Madutu aha winï riwo ngini niö gogere deʼ nimä tau koni hawanua deʼ nia hininga irïdi. 11De ipaha ma Jou nia Jou Madutu aha wairiki moi o ngï kiaka Unanga kokiani niwihuba. Genangika kokiani ngini nioiki niao hagala tinihi poparetaka, enagënanga o huhuba yatö tuhu-tuhuku deʼ o huhuba-huhuba mahomoa, nihihö huba-huba o regu ngimoi deʼ nihihö huba-huba nia tinga-tingakoka naga nihi jajaji oka ma Jouika. 12Ni mörene ma Jou nia Jou Madutu Ai himangoka, kamamoi de nia ngoha-ngohaka, nia gogilaongo, deʼ o Lewi manyawa naga yo gogere nia kotaka, karana ma hababu o Lewi manyawa yamakeua o hidoku o tonaka nia bereraka. 13Ngini yakunua nihihuba nia huhuba o ngi sabarangika ngini mahirete nima ngiriki, 14mä duga-duga o ngï ma Jou wairi-irikoka moiani nia hoana manga daeraka. Genangokadau dika kokiani ngini nihihuba o huhuba yatö tuhu-tuhuku deʼ nia diai o hali mahomoa tinihi poparetaka nginika.
15Mä ngini nibebasi mangale nia tonaka nia aiwani o gigini deʼ nia ol̄omo ma akeme kiaka dika ngini nigogere. Ngini yakunu nia ol̄omo imatero mangöe de ma Jou nia Jou Madutu winihi döa-döaka nginika. O nyawa moi-nyawa moi, ka yaoa yotebi-tebini kayaoa yopese-peseke, yakunu ya ol̄omo o hiode ma akeme, gënanga, hokä ngini yakunu nia ol̄omo o maijanga ma akeme ekola o maijanga ma akeme. 16#Kej. 9:4; Im. 7:26-27, 17:10-14, 19:26; Ul. 15:23 Duga-duga ma awunu yakunua nia ol̄omo, ma kokiani yakopoa o tonakuku hokä o akere. 17O ngï nimä tau-tauoka ngini yakunu nia ol̄omo ihi huba-huba yaregu ngimoi nia gandum, nia angguru, nia zaitun maminya, o hapi ekola nia kabingi de nia duba madomoro, o huhuba nihi fangu-fangu nia jaji, o huhuba o hininga mahuka ekola o huhuba mahomoa. 18Ngini deʼ nia ngoha-ngohaka kamamoi de nia gogilaongo deʼ o Lewi manyawa yogogere nia kotaka, kokiani ya ol̄omo o huhuba gënanga ma Jou nia Jou Madutu Ai himangoka, o ngï wairi-irikoka ma Jou nia Jou Madutu. Deʼ o ngïoka gënanga kokiani ngini nimorene karana hagala nia hidailako. 19Nio goana uha hiädono o Lewi manyawa nia mal̄aika yohuha moiua yapaliara maöraha madekana ngini niwango o bereraka gënanga.
20Ma Jou nia Jou Madutu wawoatika nia berera mabatingi hokä Unanga winï jajioka de iböto, ngini yakunu niol̄omo o hiode ma akeme nia hininga mahuka. 21Nako o ngï wairi-iriki ma Jou nia Jou Madutu ikurutika holi de tingini nia ngï nigogere, ngini yakunu nia toaka o hapi o dutu moi, o duba ekola o kabingi ma Jou wini hi döa-döaka nginika, deʼ nia ol̄omo ma akeme nia ngï nigö gogeroka de nia hininga mahuka hokä ngohi ta heto-hetongoka nginika. 22O nyawa moi-nyawa moi, kayaoa yotebi-tebini kayaoa yopese-peseke yakunu yaol̄omo o hiode ma akeme gënanga hokä ngini yakunu nia ol̄omo o maijanga ma akeme ekola o maijanga ma akeme. 23#Im. 17:10-14 Mä o hiode ma akeme de ma awunokahi yakunua nia ol̄omo, karana o jiwa naga o awunu magoronaka, deʼ ngini yakunua nia ol̄omo majiwa kamamoi de ma akeme. 24Mä awunu hakali-kali yakunua nia ol̄omo, mä kokiani nia kopoa o tonakuku hokä o akere. 25Nako ngini nihingounu o pareta gënanga, ma Jou aha wo sanangi, deʼ ngini ikali nia difauku aha yohalamati. 26Hagala o huhuba deʼ ihihö huba-huba nihijä jajioka ma Jouika kokiani ngini niao mangï ika ma Jou waö iri-iriki. 27O huhuba yatö tuhu-tuhuku deʼ o huhuba ya ol̄o-ol̄omo o hiode ma akeme kokiani nihihuba o huhuba mangï gënanga mal̄okuoka. 28Nia tailako nihidodiai hagala tohi poparetaka nginika, done ngini nia diai ma oa-oa deʼ ma Jou nia Jou Madutu Ai hiningaika yadaene hiädono ngini deʼ nia difauku yohalamati deʼ manga hininga irïdi kahi ado-adonika.”
O ho hiningga o puji o gomanga maduladaika
29”Ma Jou nia Jou Madutu aha wä binaha hagala o hoana deʼ o berera manyawa yogö gogere o bereraka gënanga, hiädono ngini yakunu niö gögere deʼ nimä tau. 30Hagala o hoana deʼ o berera gënanga wä binaha deʼ iböto, nimahi dodiai uha hiädono ngini nimä duru önanga yahuba o gikiri mahomoa, hababu o manarama gënanga inï gao o bodito. 31Hagala o hoana deʼ o berera manyawa gënanga madodagi ya huba toönanga manga gikiri, uha nimä duru mangale niwi huba ma Jou nia Jou Madutu, hababu önanga yohuba deʼ yadiai o manarama-manarama ipese-peseke wodoha-dohata ma Jou. Maboboloi toönanga manga ngoha-ngohaka mahirete yatuhuku o huhuba mangï mal̄okuoka, o huhuba mangale toönanga manga gikiri.
32 #
Ul. 4:2; Him. 22:18-19 Nia diai hagala tinihi popareta nginika; uha niö dogo ekola nia kuranga.
Currently Selected:
O ULANGAN 12: TLB
Highlight
Share
Compare
Copy
Want to have your highlights saved across all your devices? Sign up or sign in
