O YOHANIS MAHINOTOKA 1
1
1O ngo Ayoika ma Jou Madutu womi iri-irikoka, deʼ o ngo Ayo ami ngoha-ngohakika. O hurata nënanga ngohioka, o jemaat matutuda igou-goungu tinihininga ngini. Kangohiua dika, mä mata-mata o nyawa iwi näko-näko ma Jou Madutu wototiai, inihininga nginiö. 2Hababu ma Jou Madutu wogogere tongone nanga hininga magoronaka, deʼ aha hoko genangika naga dede ngone kahi ado-adonika.
3Tanu wonahidöaka Ai barakati, Ai hayanga de Ai dora deʼ o lolä ma Jou Madutu o Ama, deʼ o Yesus Kristus o Ama Ai Ngohaka gënanga. Tanu mata-mata gënanga katongone de nanga hininga iriko-rikoto deʼ o dora.
O diai deʼ o dora
4Ngohi duru tomörene, tohiöriki naga o ngo Ayo ami ngoha-ngohaka yowango imamoteke ma Jou Madutu ai do dötoko, hokä ma Jou Madutu o Ama wohiparetaka ngoneino. 5#Yoh. 13:34, 15:12, 17 Hababu gënanga, Ayo, ngohi togahoko de kahagiria ngone mata-mata homateke hininga. Ngohi tohitihira nënanga o pareta moi mahungiua; o pareta nënanga inahidoakoka ngoneino maöraha madodihiraka ngone hongaku. 6Homakodora mamangarati howango imamoteke ma Jou Madutu ai pareta. Deʼ o pareta ngini ni ihe-ihenoka maöraha madodihiraka enagënanga ngini kiani niwango de nimakodora moi de moi.
7Yototipu-tipu kamanga ngöe ima hikabarihoka o dunia ingodumu. Onanga ganga o nyawa ihi goungua o Yesus Kristus woböa o duniaka hokä womatëngo o nyawa. O nyawa manga rupa gënanga ganga yotipu-tipu, deʼ o Kristus ai Haturu. 8Hababu gënanga, nio göana uha hiädono nginioka ihihanga okia ngomi mihidodailakoka mangale ngini. Nihidailako hupaya ngini nia tarima nia hewa ingodu-ngodumu ma Jou Madutuino.
9O nyawa imahijojöua o Kristus ai dodotokika, mä yorehene de okia o Kristus wodoto-dotokoka, o nyawa gënanga koiwa toönanga manga Jou Madutu. O nyawa yotatapu o Kristus ai dodötoko magoronaka, mamangarati toönanga yaoa ma Jou Madutu o Ama yaoa o Ngohaka. 10Karana gënanga, nako naga o nyawa yoböa deʼ ihi ngahu nginika o dodötoko o Kristusua wodoto-dotoko, uha nia tarima o nyawa gënanga nia tau magoronaka ekola nia tabea onangika. 11Hababu o nyawa yatabea o nyawaika hokä hoko gënanga yamotekeö ima kinïki de o nyawa gënanga yodiai o manarama i totorou magoronaka.
Ma demo-demo mabobaha
12Duru kohangöe iparalu ngohi tinihi ngahu nginika, mä tamäo iholoi yaoa ngaro uha de o hurata. Ngohi tonganono yakunu ti ni lega deʼ ho ma teke ade-ade mahirete de de ngini, laʼ tongone nanga hininga igou-goungu imörene.
13O ngoha-ngohaka o ngo Ayo o ngoheka ngomi dodotino ö ma Jou Madutu wini iriki, ihi dingoto manga tabea o ngo Ayoika.
Currently Selected:
O YOHANIS MAHINOTOKA 1: TLB
Highlight
Copy
Compare
Share
Want to have your highlights saved across all your devices? Sign up or sign in
