O YOHANIS MADODIHIRAKA 5
5
Ngone hautumu mangale o dunia
1O nyawa yongaku o Yesus ganga o Koano Wohihohalamati ma Jou Madutu wohi jäjajioka, o nyawa ganga ma Jou Madutu ai ngohaka. O nyawa iwi hininga womatëngo o ama, wihininga ai ngohakö. 2De mangëkomo nenangala ngone hohiöriki, ngone hahininga ma Jou Madutu ai ngoha-ngohaka: Ngone hihininga ma Jou Madutu deʼ hohingounu Ai pareta-paretaika. 3#Yoh. 14:15 Hababu hihininga ma Jou Madutu mamangarati hohingounu Ai pareta-paretaika. Deʼ Ai pareta-pareta itubuhoua mangale ngone, 4hababu ma Jou Madutu ai ngohaka moi-moi yakunu yahihanga o dunia itotorou nënanga. Deʼ ngone hahihanga dunia de tongone nanga ngongaku. 5O nagona yakunu yahihanga o dunia? Duga-duga o nyawa yongaku o Yesus ganga ma Jou Madutu ai Ngohaka.
O hakihi mangale o Yesus Kristus
6O Yesus Kristus woböa o duniauku de o gohiki madebi-debini ma akere deʼ Ai honenge ma awunu. Unanga woböaua duga-duga de o akere dika, mä de o akere deʼ o awunu. Deʼ ma Jou Madutu ai Womaha mahirete ihi döaka o hakihi gënanga itiai, hababu o Womaha komaiwahi ieluku. 7Naga o hakihi hange: 8Ma Jou Madutu ai Womaha, o akere deʼ o awunu – hangeö ihi döaka o hakihi kaimatero. 9Ngone hangaku o nyawa manga hakihi ika, mä ma Jou Madutu ai hakihi iholoi ikuatoli. Deʼ o hakihi gënanga ma Jou Madutu wohidoakoka mangale ai Ngohaka. 10Hababu gënanga, o nyawa yongaku ma Jou Madutu ai Ngohakika, yatarimaka o hakihi gënanga manga hininga magoronaka; mä o nyawa iwi ngakua ma Jou Madutu, iwi pulonoka matero-tero ma Jou Madutu woelu-eluku, hababu ünanga wongakua okia ma Jou Madutu wotemo mangale ai Ngohaka. 11#Yoh. 3:36 Nenangala o hakihi gënanga: ma Jou Madutu wonahidoakoka ngoneino o ngango madutu deʼ ikakali, deʼ ai Ngohaka gënanga o ngango matiti. 12O nyawa toma Jou Madutu ai Ngohaka to önanga, o ngango gënanga to önanga; deʼ o nyawa to onangua ünanga, o ngango gënanga to onangua.
O ngango madutu deʼ ikakali
13Ngohi totulihi nginika niwi ngaku-ngaku ma Jou Madutu ai Ngohakika, laʼ ngini nihiöriki tingini de maenangoka nia ngango madutu deʼ ikakali. 14Deʼ ngone hobarani hihimanga ma Jou Madutu, karana ngone hongaku Unanga woihene tongone nanga niata, nako ngone hogahoko okia dika imadäene de Ai mau. 15Karana ngone hohiöriki Unanga wonagihene ngone, nako ngone homagahoko Unangika, mangoneö hohiöriki Unanga wonahidöaka okia ngone hogahoko Unangino.
16Nako ngini nia mäke o nyawa imatëngo nimahiteke ho Haranioka yodiai o baradoha mabahaka o nyawa gënanga yahihangua manga ngango madutu deʼ ikokakali, ngini kiani nia niata ma Jou Madutuika; deʼ ma Jou Madutu aha wahidöaka o ngango gënanga onangika. Nënanga imadäene de to önanga manga baradoha mabaha yahihangua to önanga manga ngango gënanga. Mä naga o baradoha mabaha yahihanga o nyawa gënanga manga ngango. Mangale o hali gënanga ngohi totemoua ngini kiani nima niata ma Jou Madutuika. 17Mata-mata o manarama ihohowo-howono ganga o baradoha, mä naga o baradoha koiwa mabahaka ihihanga o nyawa manga ngango ma dutu deʼ ikakali gënanga.
18Ngone hohiöriki o nyawa mata-mata yodadioka ma Jou Madutu ai ngoha-ngohaka, kahoko genangikaua yodiai o baradoha, hababu ma Jou Madutu ai Ngohaka wahohongino, de Iwi to Torou okia-kiaua yakunu idiai onangika.
19Ngone hohiöriki ngone toma Jou Madutu mahirete, ngaroka o dunia nënanga i Wi to Torou ai kuaha matimioka.
20Ngone hohiöriki ma Jou Madutu ai Ngohaka woböaka deʼ wonahidoakoka o mangarati ngoneino, laʼ ngone hinako ma Jou Madutu wotiai. Ngone howango kamoi de ma Jou Madutu wototiai, deʼ howango kamoi de ai Ngohaka o Yesus Kristus. Nenangala ma Jou Madutu wotototiai, deʼ nenangala o ngango madutu deʼ ikakali.
21Ahi ngoha-ngohaka, nimahikurutika nia diri de o goma-gomanga!
Currently Selected:
O YOHANIS MADODIHIRAKA 5: TLB
Highlight
Copy
Compare
Share
Want to have your highlights saved across all your devices? Sign up or sign in
