O PETRUS MADODIHIRAKA 2
2
O helewo i wöwango-wango deʼ o hoana de o berera manyawa yotebi-tebini
1Hababu gënanga, nia umo nia dirioka hagala itotorou; uhaoli nielu-eluku, deʼ uha nimadodiai. Uha o hininga nimä kogogono, deʼ uha nia hikauku o nyawa mahomoa. 2Kokiani ngini nidadi hokä o ngohaka gënanga dahaö ima kil̄auino, hoko genangika nia kiriti madudungu o huhu rohani ma dutu. De hoko gënanga ngini aha niwango nihero deʼ ini hihalamati. 3#Mzm. 34:9 Ma Jou Ai Demo ma Buku magoronaka yatulihi hoko nënanga, ”Ngini nia mäoka mahirete hokokia Ma Jou Ai oa.”
4Hababu gënanga niböa ma Jouika. Unanga hokä o helewo i wango-wango, o helewo yaümo-ümo o nyawa karana yapulono koiwa mafaidä; mä ma Jou Madutu wairikoka hokä o helewo dema ijaka. 5Ngini hokä o helewo-helewo iwö wango-wango. Hababu gënanga kokiani ngini nio modeke inï päke mangale nihigoko ma Jou Madutu ai tau irorohani. De hoko gënanga ngini nidadi o imam-imam niwango mangale kato ma Jou Madutu, deʼ mangëkomo de o Yesus Kristus nihihuba ma Jou Madutuika o huhuba rohani ma Jou Madutu ai hininga yadö däe-däene. 6#Yes. 28:16 Karana Ma Jou Ai Demo ma Buku magoronaka yatulihi hoko nënanga,
”Ngohi tairikoka o helewo gahumu moi dema ijaka,
takelengaka o Sionoka hokä o helewo duru maoa-oa;
deʼ o nyawa yongaku-ngaku enangika önanga aha manga hininga i huhaua.”
7 #
Mzm. 118:22
O helewo gënanga duru dema ijaka mangale ngini ningö ngaku-ngaku. Mä o nyawa yongaku-ngakua, imadadi Ma Jou Ai Demo ma Buku maregu nënanga,
”O helewo yapö päke-päkeua o tau yododiai gënanga
i nyata imadadi o helewo duru maoa-oa,”
8 #
Yes. 8:14-15
deʼ
”Gënanga doka mahelewo yadiai o nyawa yopeleke,
o helewo idodiai önanga yoruba.”
Onanga yopeleke hababu önanga yangakua ma Jou Madutu ai demo. Hoko gënanga ma Jou Madutu wohitantuoka yäkorona önanga.
9 #
Kel. 19:5-6; Ul. 4:20, 7:6, 14:2; Yes. 9:1, 43:20, 21; Tit. 2:14 Mä ngini naga o hoana de o berera manyawa yäiri-iriki, o imam-imam niwilö leleani ma koano, o hoana de o berera manyawa yotebi-tebini, ma Jou Madutu womä dinga-dingakoka, ma Jou Madutu ai umati mahirete. Ma Jou Madutu winï iriki ngini deʼ winï ahoko ngini o huhutuino nihupu la niwohama Ai dararono i totararono magoronaika, de madungutu hupaya ngini nihibarihi o abari mangale hagala Ai manarama kabiahaua. 10#Hos. 2:23 Mahira ngini ma Jou Madutu ai umatua, mä oraha nënanga ngini nagala ma Jou Madutu ai umati. Mahira ngini ma Jou Madutu winï doraua, mä oraha nënanga ngini nia tarima Ai dora de Ai hayanga.
Ma Jou Madutu ai gogilaongo
11O Roriadodoto tinï hohininga! Ngini naga o nyawa mahomoaino deʼ o dagi-dagino o duniaka nënanga. Hababu gënanga ngohi togahoko de magiria hupaya ngini uha nio domoteke o nyawa mahininga manahihu hoko genangika ya parangi yalawani o jiwa. 12O nyawa iwi näko-näkoua ma Jou manga hidogoronaka nia kalakuanga kokiani duruhë yaoa, hiädono maöraha okia önanga inï diai o romanga madorou ngini hokä o nyawa madorou, önanga marai kokiani ihi goungu nia manarama maoa-oa, hiädono önanga aha iwihigiriri ma Jou Madutu ai böa ma wangeoka.
13Karana ma Jou, kokiani ngini nimaponu moi-moi o nyawa yokokuahaika: yaoa ma Kaisarika wodadi yokokuaha ikokurutil̄e, 14inoli magubernurika ma Kaisar wïtumutu la wähukumu o nyawa yododiai o dorou deʼ mangale yähoromati o nyawa yododiai maoa-oa. 15Hababu ma Jou Madutu womau de hagala nia manarama maoa-oa ngini nia tamunu o nyawa manga uru yotemo-temo ibö bodo-bodo. 16Kokiani ngini niwango hokä o nyawa yololapahi, mauhali nia päke nia lapahi gënanga la nia tamunu o dorou, duga-duga niwango hokä ma Jou Madutu ai gilaongo. 17Nia horomati o nyawa mata-mata, nia dora nia roriadodoto nimahiteke ho Haranioka. Ma Jou Madutuika niwï modongo deʼ ma Kaisarika niwi horomati.
O Kristus ai huha de ai hangihara hokä o dulada
18O Roriadodoto nidö dädadi yolö leleani, nimaponu niälö leleanika duruhë de mahoromati; koigoungua duga-duga manga hininga yaoa-oa deʼ ini dodiawo irorahaika, mä onanga yohohateraikaö. 19Ma Jou Madutu aha winihi barakati ngini, nako ngini karana nimamäo mangale ma Jou Madutu ai mau, nisabari nia tagongo ini hidiai i adi-adilua. 20Hababu okia mahigiriri nako ngini nisabari nia moku o hukumanga kokiani ngini nia tagongo karana nia howono? Mä nako ngini de nia sabari nia tagongo o huha de o hangihara inï totapal̄u karana niadiai o diai, done ma Jou Madutu aha winihi barakati. 21Mangale gënanga ma Jou Madutu winï ahoko. Hababu o Kristus mahirete watagongoka o huha de o hangihara mangale ngini, deʼ de gënanga Unanga winihidöaka nginika moi o dulada, hupaya ngini nia nïki ai l̄ou ma aguru mario. 22#Yes. 53:9 Unanga komaiwa o baradoha wodiai, deʼ komaiwa o nyawa moiö de yoihene Unanga woeluku. 23#Yes. 53:7 Maöraha Unanga iwi döa-döana, Unanga kowabalahua de o döa-döana. Maöraha Unanga watagongo o huha de o hangihara, Unanga womä riwoua; Unanga duga-duga wohilapahi Ai parakara ma Jou Madutuika o Hakimi woadi-adili gënanga. 24#Yes. 53:5-6 O Kristus mahirete wa moku tongone nanga baradoha Ai dirioka o salib magotaka, hupaya ngone holapahi de o baradoha makuaha, deʼ howango imoteke ma Jou Madutu ai mau. O Kristus ai nabo-nabo ganga inahi togumu ngone. 25Mahira ngini hokä o duba yamäkeokaua o ngëkomo, mä oraha nanga ngini ini higiliokali la niwi nïki o Gogöana de nia jiwa wa Pöpaliara.
Currently Selected:
O PETRUS MADODIHIRAKA 2: TLB
Highlight
Copy
Compare
Share
Want to have your highlights saved across all your devices? Sign up or sign in
