O PETRUS MADODIHIRAKA 3
3
O hekata de o rokata
1 #
Ef. 5:22; Kol. 3:18 Hoko genangö ngini, o heka-hekata, kokiani ngini nia himoteke nia rokata manga pareta hupaya nako to ona manga hidogoronaka naga yongakua o abari ma Jou Madutuino, nia kalakuanga yakunu yadiai önanga idadi yongaku. Deʼ i paralua ngini nihi demo-demo okianaga onangika, 2hababu önanga yamäke nia kalakuanga naga itebini deʼ o agamaika nitomoteke. 3#1Tim. 2:9 Uha nia hailoa duga-duga o hailoa kamaporetino, hokä hohiade nia tadauru nihidiai, ekola nia päke o päke-päke, ekola nimahi pakeanga ihö hali-hali. 4I idulu yaino, kokiani nia hailoa ipuda nia hininga magoronail̄e, nia jako ibö bole-bole deʼ nïrïdi; gënanga doka o hailoa ikokakali duru de maraganeoka imoteke ma Jou Madutu ai lo legaka. 5De madodagi hoko nënanga o öraha mahiraino o ngongoheka de manga agamaka naga imahingö ngano-nganono ma Jou Madutu ika ya hailoa manga diri de ya moteke to önanga manga rokata manga pareta. 6#Kej. 18:12 O ngo Sarah mahoko genangoli, münanga mihi ngounu o Abrahamika deʼ mihëtongo ünanga ami tuanga. Ria dodoto öraha nanga ganga o ngo Sarah ami ngoha-ngohaka, nako ngini niadiai o hali maoa-oa deʼ okia naga ö mä nio modongua.
7 #
Ef. 5:25; Kol. 3:19 Deʼ nginiö, o roka-rokata, kokiani niwango de nia mangarati ioma-omanga nia hekatika, deʼ de nia mamäo önanga ganga o doomu yobö bole-bole. Nia hidiai önanga de mahoromati, hababu önanga nimakomoteke dede ngini, aha nia tarima o ngongike o ngango madutu, ma Jou Madutuino. Niadiai nënanga, hupaya koiwa naga yatätatoko nia hubayanga.
Hatagongo o huha de o hangihara karana hodiai madiai
8Hatipoko ino ena gënangala: kokiani Roriadodoto ka o demo moi de o higaro moi deʼ o mamäo moi. Kokiani ngini nima kokahayangi hokä o nyawa niroriadodoto. Deʼ kokiani ngini nima kokahayangi de nimä kodora deʼ nia jako nia hininga ipöpoluluku. 9Uha nia balahi o dorou de o dorou, ekola o döa-döana de o döa-döana; i idulu yaino nia balahi de niä gahoko o barakati ma Jou Madutuino. Hababu ma Jou Madutu winï ahoko ngini imoteke madiai hupaya ngini nia tarima o barakati Unangino. 10#Mzm. 34:13-17 Ma Jou Ai Demo ma Buku magoronaka yatulihi hoko nënanga,
”O nyawa yomau yajame o ngango
de yomau yamäo o wange maoa-oa,
kokiani yögöana manga uru hupaya ihi ade-adeua o hali i totorou
de o hali ielu-eluku ihidemoua.
11Onanga kokiani imahi tingaka itotorou de yadiai o oa-oa;
kokiani önanga yomanarama yagou-goungu la yamäke o dame.
12Hababu ma Jou wätö tailako hoko genangika o nyawa Ai mau yamö mote-moteke,
deʼ ma Jou hoko genangika wohigihene toönanga manga hubayanga; mä ma Jou wälawani o nyawa o dorou yadodiai.”
13O nagona yomau yodiai o dorou nginika, nako ngini nisanangi o oa-oa nidiai? 14#Mat. 5:10 #Yes. 8:12-13 Mä ngarokö ngini kokiani nia tagongo o huha de o hangihara karana nidiai o hali maoa-oa, ngini niutumu! O nagonaika naga mäuha niä modongo deʼ uha nihawatere. 15Mä nia hininga magoronaka kokiani ngini nihidöaka o Kristusika o horomati duru kagenangö naga imadäene de to una ai gogere hokä ma Jou. Deʼ kokiani ngini salalu nimä sosadia la nihidöaka o bobaluhu moi-moi o nyawaika yolö leha-leha mangale yakorona o ngonganono naga nginioka. 16Mä nia diai gënanga de nia hininga ibole-bole deʼ mahoromati. Deʼ kokiani nia hininga madobote i tebini, hupaya nako ngini o romanga madorou inidiai karana ngini niwango yaoa hokä o Kristus iwinö ninïki, done o nyawa o romanga madorou inï dodiai gënanga aha idadi önanga mahirete yämal̄eke. 17Iholoi yaoa nia tagongo o huha de o hangihara karana nidiai o oa – nako gënanga nagala ma Jou Madutu ai mau – imahowono nia tagongo o huha de o hangihara karana nidiai itotorou. 18Hababu o Kristus mahirete wohonenge duga-duga kamamoi dika, mangale kahi ado-adonika karana o nyawa manga baradoha – o nyawa womatëngo wahowonua, wohonenge mangale o nyawa yahowo-howono. O Kristus wodiai hoko gënanga hupaya ünanga wakunu winïtuda ngini ma Jou Madutuika. Unanga iwi toma cara o röehe, mä wowangokali cara rohani. 19O womaha madodagi magoronaka ünanga woiki wohi abari o abari ma Jou Madutuino hagala o womahika ibui-buiika: 20#Kej. 6:1–7:24 enagënanga hagala o nyawa mawomaha ihi ngou-ngounua ma Jou Madutuika, o Nuh ai orahoka. O öraha gënanga ma Jou Madutu wotamä de Ai sabari madëkana dema gurutu o Nuh wodiai ai kapa. Duga-duga o nyawa naga o kapaka dika – mata-mata yatufange – yahihalamati de o nguihi ma amo-amoko gënanga. 21Aa, idödädadi gënanga marupa o hitero o gohiki itebi-tebini naga öraha nënanga inï hihalamati ngini. O gohiki itebi-tebini nënanga koigoungua moi o agama yadodiai yatebini o röehe de o peseke mata-mata, duga-duga marupa nia jaji ma Jou Madutuika nia hininga madobote maoa-oaino. O gohiki itebi-tebini gënanga inï hihalamati ngini karana o Yesus Kristus wo wango okali o honengino, 22deʼ wo döaka o horoga il̄e. Oraha nënanga Unanga wokuaha imanïki de ma Jou Madutu, deʼ wapareta o malaekat mata-mata, yokokuaha mata-mata inoli de o kuata mata-mata.
Currently Selected:
O PETRUS MADODIHIRAKA 3: TLB
Highlight
Copy
Compare
Share
Want to have your highlights saved across all your devices? Sign up or sign in
