O PETRUS MADODIHIRAKA 1
1
1-2O Roriadodoto ma Jou Madutu ai umati womä ngiri-ngirikoka, naga nimahi kokabarihika niö dagi-dagi o Pontus, o Galatia, o Kapadokia, o Asia deʼ o Bitinia madaeraka! Ngohi o Petrus, o Yesus Kristus ai rasul, tonganono tanu ma Jou Madutu winihidöaka o barakati deʼ o lolä nginika de maboboloi.
Ngini inï iriki nidadi ma Jou Madutu ai umati ima däene de ma Jou Madutu o Ama ai datoro. Deʼ ma Jou Madutu ai Womaha inihi dadioka ngini o umati itebi-tebini, maboboloi mangale ma Jou Madutu, hupaya ngini nihi ngounu o Yesus Kristusika deʼ inï tebini de Ai awunu.
O ngonganono ibitu-bitumu
3Niaino ngone hosukur ma Jou Madutuika, nanga Jou Yesus Kristus ai Ama! Una duruhë wonä dora ngone, mahababu gënanga Unanga wonahidöaka o wowango mahungi ngoneino, de wihiwango okali o Yesus Kristus o honenge mahi dogoronaka. Nënanga inahi döaka ngoneino o ngonganono ibitu-bitumu. 4Ngone hönganono la hal̄ë idadi tongone hagala o barakati ma Jou Madutu wasö sadiaka Ai umatika, enagënanga hagala o barakati igögogono o horogaka, hiädono yakunua ibodito, ekola idadi imëla ekola iaiki. 5Mata-mata gënanga mangale ngini, karana ngini ningaku ma Jou Madutuika. Ho ngini inï göana de ma Jou Madutu ai kuaha hupaya ngini nia tarima o halamati yasosadia damä ihi nyata o öraha mabobahaka.
6Karana gënanga kokiani ngini nia hininga imörene, ngarokö öraha nanga maöraha madodipoko ngini kokiani nia hininga i huha karana ngini nia öhana i rupa-rupa o cocoba. 7Madumutu enagangala ihi nyata igoungu boteka ngini igou-goungu niwi ngaku ma Jouika ekola kowali. O gurasi naga yakunu kai bodito, yataili de o uku. Aa, tingini nia ngongaku iholoi naga iragane de o gurasi, hoʼ kokiani yatailoli hupaya idadi ibitumu. Deʼ de hoko gënanga ngini aha inï higiriri deʼ inï horomati inoli inï tedeil̄e o Yesus Kristus ai böa ma wangeoka. 8Ngini niwïdora, ngarokö mahiraino ngini niwi mäkeua. Deʼ ngini niwingaku Unangika ngarokö öraha nënanga ngini niwi mäkeua. Mahababu gënanga ngini nimörene, deʼ nia mäo o mörene imomulia deʼ hohidemo hakunua. 9Hababu nia ngongaku madumutu namäkeoka, enagënanga nia jiwa mahalamati.
10O halamati nënanga doka ganga o nabi-nabi yatailako deʼ yatailako ihidodiai, deʼ onanga yamäke owahi ihi ngahuoka mangale o barakati ma Jou Madutu wohi döa-döaka nginika. 11Onanga yatailako ihidodiai sarakia deʼ muruonoka o hali gënanga aha idadi, ganga o Kristus ai Womaha madungutu naga manga diri magoronaka. O öraha gënanga ai Womaha kadema hirahi de hingahuoka onangika mangale hagala o huha de o hangihara ganga kokiani o Kristus waohana deʼ mangale Ai mulia aha iwi hiduru ipahaika de gënanga. 12O nabi-nabiika gënanga ma Jou Madutu wahi ngahuokia önanga yodiai koigoungua mangale önanga imahi akunu, duga-duga mangale ngini; enagënanga hagala o hali öraha nënanga ngini ni ihene de madodiai o Abari ma Oa ihingö ngahu-ngahuino mangale o Yesus Kristus. Onanga ihi ngahu hagala o hali gënanga nginika de ma Jou Madutu ai Womaha makuaha ihi dingo-dingoto o horogaino. Igoungu hagala o malaekat mayö nahihuoli ihi öriki o abari önanga ihingö ngahu-ngahu gënanga.
O gogahoko mangale o ngango i tebi-tebini
13Hababu gënanga, kokiani ngini nimä böbötoka. Nimahi dodiai nimä göana deʼ nio nganono iomanga o barakatika aha inihidöaka nginika maöraha o Yesus Kristus dahaö woböa. 14Niwihi ngounu ma Jou Madutuika, deʼ uha niwango nia moteke nia nahihu ihira-hira, maöraha ngini niwi nako uwahi ma Jou Madutu. 15I idulu yaino, kokiani ngini nitebini hagala moi-moi magoronaka naga ngini nia dodiai, imatero hokä ma Jou Madutu winï aho-ahoko ngini gënanga wotebini. 16#Im. 11:44-45, 19:2 Ma Jou Ai Demo ma Buku magoronaka i tulihi, ”Kokiani ngini nitebini, hababu Ngohi totebini.”
17Ngini niwi hëtongo ma Jou Madutu gënanga o Ama maöraha ngini nimä niata Unangika. Aa, ma Jou Madutu gënanga wahihakimi o nyawa imadäene de moi-moi manga manarama de woiri-irikua o nyawa. Hababu gënanga madëkana de magurutu ngini kanagahi o duniaka nënanga, kokiani ngini niwi himulia ma Jou Madutu nia wowango magoronaka. 18Ngini nihi öriki okia ihi fanguoka mangale inï lapahi ngini de o wowango ipöparahaja ini hipuhakäka nia ete de nia tohora. Mabobangu koigoungua okianaga moi ibobodito hokä o haäka ekola o gurasi, 19duga-duga okia naga moi duruhë dema ijaka; enagënanga o Kristus ai diri mahirete, womadadi hokä o duba ihi huba-huba ma Jou Madutuika koiwa manabo ekola itorou. 20Ma Jou Madutu wï iriki o Kristus ihira de o dunia nënanga ihi dadi. Deʼ ma wange yododagika o öraha o dunia mabobaha, Unanga woböa o duniaino hupaya ngini wini hihalamati. 21Madodagi de Unanga ngini niwi ngaku ma Jou Madutuika wihi wango okali o honenge mahi goronaka deʼ wihimulia. Hoʼ ma Jou Madutu ngini niwi ngaku deʼ ma Jou Madutu ikaoli ngini nima hinganono.
22Karana ngini nihingounu o dodotokika ma Jou Madutuino, hongini nia tebini nia diri deʼ ngini niä dora hagala o nyawa o ngongaku moi de nia hininga itebini. Hababu gënanga, kokiani ngini nima kodora moi de moi de nia hininga iomanga-omanga. 23Hababu madodagi de ma Jou Madutu ai demo iwö wango-wango deʼ i kokakali gënanga, ngini inihi dadioka o nyawa mahungi ko o nyawaua inihi ngohaka, duga-duga o Ama wokokakalino. 24#Yes. 40:6-8 Ma Jou Ai Demo ma Buku magoronaka itulihi hoko nënanga,
”Mata-mataika o umati hokä o momo,
deʼ hagala mahoromati hokä o momo mahuri.
O momo imaai, mahuri ma irero;
25mä ma Jou ai demo kahi ado-adonika ikakali.”
O demo gënanga o Abari ma Oa i hi ngahu-ngahuoka nginika.
Currently Selected:
O PETRUS MADODIHIRAKA 1: TLB
Highlight
Copy
Compare
Share
Want to have your highlights saved across all your devices? Sign up or sign in
