Iraétanüxü̃arü muxchiga 9
9
Üpetüchiga
1Rü wüxi ga taunecü nawena nax Equítuanewa ínachoxü̃xü̃ ga Iraétanüxü̃, rü gumá nüxíraü̃cü ga tauemacügu rü nüma ga Cori ya Tupana rü Chinaíarü chianexü̃wa Moichémaxã nidexa, rü ñanagürü nüxü̃:
2-3—Ngẽma Iraétanüxü̃ rü name nixĩ nax naxüchigagüãxü̃ i ngẽma Üpetüchiga i ngẽxguma doma tauemacüarü 14 i ngunexü̃arü yáuanexü̃wa nanguxgu. Rü chanaxwa̱xe nax ngẽma cumaxã nüxü̃ chixuxü̃ãcü naxüchigagüãxü̃ i duü̃xü̃gü —ñanagürü.
4Rü nüma ga Moiché rü Iraétanüxü̃xü̃ namu nax naxüchigagüãxü̃ ga Üpetüchiga.
5Rü nüma ga Iraétanüxü̃ rü Chinaíarü chianexü̃wa nanaxüchigagü ga Üpetüchiga ga guma tauemacüarü 14 ga ngunexü̃arü yáuanecü. Rü yema Cori ya Tupana Moichéxü̃ muxü̃ãcü nanaxüchigagü ga Üpetüchiga.
6Natürü natanüwa rü nayexma ga ñuxre ga Iraétanüxü̃ ga ixãũãchixü̃ yerü yuetaxü̃ ningõgügü. Rü yemaca̱x taxuacüma nanaxüchigagü ga Üpetüchiga ga yema ngunexü̃gu. Rü yemaca̱x yematama ga ngunexü̃gu Moichéxü̃tawa rü Aróü̃xü̃tawa naxĩ.
7Rü yema ñuxre ga Iraétanüxü̃ rü Moichéxü̃ ñanagürügü: —Toma rü nüxü̃ tingõgü i wüxi i yuxü̃, rü ngẽmaca̱x tixãũãchi. ¿Rü nüxü̃ tacuáxchaü̃ rü namexü̃ nax ngẽma ngunexü̃ i nüxü̃ quixuxü̃gu Tupanana tanaxãxü̃ i torü ãmaregü naxrüxü̃ i ngẽma togü i Iraétanüxü̃? —ñanagürügü.
8Rü yexguma ga nüma ga Moiché rü nanangãxü̃ rü ñanagürü: —¡Choxü̃ ípeyangu̱xuxẽxẽ! Rü Cori ya Tupanana tá chaca rü ta̱xacüxü̃ tá chomaxã yaxu i pechiga —ñanagürü.
9Rü Tupana rü Moichéxü̃ ñanagürü:
10-11—Namaxã nüxü̃ ixu i Iraétanüxü̃: “Rü name nax naxüchigagüãxü̃ i ngẽma Üpetüchiga. Rü ngẽxguma texé yuxexü̃ ingógügu rüe̱xna to i nachica i yáxü̃wa taxũxgu rü ngẽmagü rü tá ta nanaxüchigagü i ngẽma üpetüchiga yimá norü taxre ya tauemacüarü 14 i ngunexü̃arü yáuanecü. Rü tá nanangõ̱xgü i ngẽma carnérumachi íguxü̃ i maxẽ ya üxücümaxã ãéü̃xü̃. Rü namaxã tá nanaxübüxü̃ i paũ i ngearü pu̱xẽẽruü̃ã́xü̃.
12¡Rü taxuxü̃táma i namachi ínayaxüxẽxẽgü norü moxü̃ãcüruxü̃ rü taxunetáma ya naxchina̱xã nipuxẽxẽgü! Rü ngẽma cumaxã nüxü̃ chixuxü̃rüxü̃ tá nanaxüchigagü i ngẽma üpetüchiga.
13Natürü yíxema Tupanape̱xewa mexẽ rü tama ũanewa ũxẽ natürü tama Üpetüchiga üchigaxe rü tama ngẽma ngunexü̃gu tümaarü ãmare Tupanana ãxe, rü tá tüxü̃ ípetaxüchi i petanüwa. Rü ngẽmaãcü tümaarü pecadugagu tá tapoxcu.
14Rü ngẽxguma nangẽxmagu i duü̃xü̃gü i to i nachixü̃anecüã̱xgü i petanüwa maxẽxü̃, rü nümagü rü ta name nax naxüchigagüãxü̃ i ngẽma Üpetüchiga ngẽma pexü̃ chamuxü̃ãcütama. Rü ngẽma mu i Iraétanüxü̃ca̱x ixĩxü̃ rü ngẽmatama mu nixĩ i naxca̱x i ngẽma to i nachixü̃anecüã̱xgü i duü̃xü̃gü i petanüwa maxẽxü̃” —ñanagürü ga Tupana.
Caixanexü̃ ga Tupanapataétügu írüxĩxü̃chiga
(Éx. 40.34-38)
15Rü yexguma yanguxgu ga guma Tupanapata, rü yema ngunexü̃gu rü wüxi ga caixanexü̃ naétügu ínarüxĩ. Rü yáuanecü rü naétüwa nango̱xoxü̃ ga üxüemarüxü̃ ixĩxü̃. Rü yéma nayexmaecha ñu̱xmata yangóonexü̃mare.
16Rü guxü̃guma yemaacü nixĩ. Rü yexguma nangunegu rü yema caixanexü̃ rü naétügu írüxĩxü̃ ga guma Tupanapata. Rü chütacü rü naétüwa nango̱xoxü̃ ga ñoma üxüemarüxü̃ ixĩxü̃.
17Rü yexguma guma Tupanapataétüwa iyachü̱xüãchixü̃gu ga yema caixanexü̃, rü nüma ga Iraétanüxü̃ rü inaxĩãchixü̃ ga nax inaxĩxü̃. Rü yema íyachaxãchixü̃wa ga yema caixanexü̃, rü yéma nayachaxãchitanü, rü yexma napegü.
18Rü yexguma Cori ya Tupana namaxã nüxü̃ ixuxgu ga nax inaxĩãchixü̃ rü inaxĩãchi. Rü yexguma namaxã nüxü̃ yaxuxgu ga nax ínachoxü̃ rü yexma narücho. Rü yexguma yema caixanexü̃ Tupanapataétüwa yexmaechagu rü tama inaxĩ.
19Rü yexguma muxü̃ma ga ngunexü̃ Tupanapataétügu nachü̱xü̱xgu ga yema caixanexü̃, rü nüma ga Iraétanüxü̃ rü ínayachaxãchitanü nax naxügüã̱xü̃ca̱x ga Tupanaarü puracü.
20Rü yexguma ñuxretama ga ngunexü̃ Tupanapataétügu nachü̱xü̱xgu ga yema caixanexü̃ rü nüma ga Iraétanüxü̃ rü ínayachaxãchitanü. Rü yexguma yachü̱xüxãchigu rü inaxĩãchi.
21Rü ñuxguacü ga yema caixanexü̃ rü chütacüxicatama ínayachaxãchi rü pa̱xmama rü nayachü̱xüxãchi. Rü yexguma ga nüma ga Iraétanüxü̃ rü nawe nixĩxü̃tanü. Rü woo chütacü rüe̱xna ngunecü yaxũxgu ga yema caixanexü̃, rü nüma ga Iraétanüxü̃ rü inaxĩãchi.
22Rü yexguma ñuxre ga ngunexü̃ rüe̱xna wüxi ga tauemacü rüe̱xna wüxi ya taunecü Tupanapataétüwa yachaxãchigu ga yema caixanexü̃ rü nüma ga Iraétanüxü̃ rü yéma nayexmagü rü tama inaxĩ. Natürü yexguma íyachü̱xãchigu ga yema caixanexü̃ rü nawe nixĩxü̃tanü.
23Rü yexguma Tupana inaxũãchixẽẽgu ga yema caixanexü̃, rü nümagü ga Iraétanüxü̃ rü ta inaxĩãchi. Rü yexguma Tupana íyachaxãchixẽẽgu ga yema caixanexü̃, rü nümagü ga Iraétanüxü̃ rü ta ínayachaxãchitanü, rü yexma napegü. Rü yemaacü naga naxĩnüe ga yema mu ga Cori ya Tupana Moichémaxã nüxü̃ ixuxü̃.
Currently Selected:
Iraétanüxü̃arü muxchiga 9: tcaP
Highlight
Copy
Compare
Share
Want to have your highlights saved across all your devices? Sign up or sign in
© 2022, Wycliffe Bible Translators, Inc. All rights reserved.
