Iraétanüxü̃arü muxchiga 8
8
Aróü̃ nayanaixẽxẽ ga Tupanapataarü omügü
1Tupana rü Moichéxü̃ ñanagürü:
2—¡Namaxã nüxü̃ ixu i Aróü̃ rü ngẽxguma nangixã̱xgu i ngẽma 7 i omügü rü nanaxwa̱xe nax ngẽma naxpawerupe̱xeguama nabáixgüxü̃! —ñanagürü.
3Rü nüma ga Aróü̃ rü yema Tupana Moichémaxã nüxü̃ ixuxü̃ãcü inanaxü ga yema omüpaweru nax nape̱xeguama nabáixgüxü̃ca̱x.
4Rü yema omüpaweru rü nachipatüwa inaxügü rü ñu̱xmata nape̱xewa nangu rü martiyumaxã ipomüxü̃ ga úiruwa naxü. Rü yema Cori ya Tupana Moichéxü̃ wéxü̃ ga naxchicüna̱xããcü nanaxü.
Tupanaarü puracüca̱x nayamexẽxẽ ga Lebítanüxü̃
5Rü Cori ya Tupana rü Moichéxü̃ ñanagürü:
6—¡Yamugachitanü i ngẽma Lebítanüxü̃ natanüwa i ngẽma togü i Iraétanüxü̃! ¡Rü yamexẽxẽgü nax chorü puracüca̱x yamexü̃ca̱x!
7¡Rü dexá i üünexü̃maxã yamaxcuétügü! ¡Rü ñu̱xũchi tá nügü nidüxta̱xaxü̃negü rü tá nügü niyauxchirugü! Rü ngẽmaãcü tá chope̱xewa nime.
8Rü ngẽmawena rü ngéma tá nanagagü i wüxi i wocaxacü i yatüxü̃, rü ngéma tá nanangegü i íxraxü̃ i arína i rümemaexü̃ i chíxü̃maxã i ñumüxü̃ i chorü ãmareruxü̃. Rü naétü rü ngéma tá nanaga i wüxi i to i wocaxacü i yatüxü̃ norü pecaduarü ütanüruxü̃.
9Rü ngẽmawena i cuma rü tá ngẽma Lebítanüxü̃maxã nüxü̃ quixu nax Tupanapatawa naxĩxü̃ca̱x. Rü tá naxca̱x cungema i guxü̃ma i ngẽma togü i duü̃xü̃gü i Iraétanüxü̃ nax ngéma naxĩxü̃ca̱x.
10Rü tá cunamu i ngẽma Lebítanüxü̃ nax chope̱xewa naxĩxü̃ca̱x. Rü ngẽma Iraétanüxü̃ rü tá naerugu naxǘxme̱xgü.
11Rü nüma i Aróü̃ rü ngẽma Iraétanüxü̃égagu tá choxna nanamugü i ngẽma Lebítanüxü̃ chorü ãmareruxü̃ i ngẽma Iraétanüxü̃ choxna mugüxü̃. Rü ngẽmaãcü i ngẽma Lebítanüxü̃ rü choxrügü tá nixĩgü nax choxü̃́ napuracüexü̃ca̱x.
12Rü ngẽmawena i nüma i Lebítanüxü̃ rü tá ngẽma wocaxacügüerugu naxǘxme̱xgü. Rü wüxi i ngẽma wocaxacü i yatüxü̃ rü pecaduarü ütanüruxü̃ tá nixĩ. Rü ngẽma to i wocaxacü i yatüxü̃ rü tá cha̱u̱xca̱x peyagu nax ngẽmaãcü chope̱xewa yamexü̃ca̱x i ngẽma Lebítanüxü̃.
13Rü ñu̱xũchi i cumax, Pa Moichéx, rü tá Aróü̃pe̱xewa rü nanegüpe̱xewa cunagagü i ngẽma Lebítanüxü̃ rü tá choxna cunamugü nax chorü ãmaregü yixĩgüxü̃ca̱x.
14Rü ngẽmaãcü natanüwa i ngẽma Iraétanüxü̃ rü tá nüxü̃ cuxuneta i ngẽma Lebítanüxü̃ nax ngẽmaãcü choxrügü yixĩgüxü̃ca̱x.
15Rü ngẽmawena rü chopatawa tá naxĩ nax ngéma yapuracüexü̃ca̱x. Rü cumax, Pa Moichéx, rü ngẽmaãcü tá nixĩ i chope̱xewa cuyamexẽxẽgüxü̃ i ngẽma Lebítanüxü̃ nax choxna cunamugüxü̃ca̱x chorü ãmareruxü̃.
16Rü guxü̃ma i ngẽma Iraétanüxü̃tanüwa rü ngẽma Lebítanüxü̃ rü choxrügü nixĩgü. Rü choma rü marü chanade nachicüxü i guxü̃ma i ngẽma Iraétanüxü̃ nanegü i nüxíra buexü̃.
17Erü choxrügü nixĩgü i guxü̃ma i ngẽma Iraétanüxü̃ nanegü i nüxíra buexü̃, rü ngẽxgumarüxü̃ ta i ngẽma nüxíra buexü̃ i naxü̃nagü. Rü yexguma chanadaixgu ga yema nüxíra buexü̃ ga Equítuanecüã̱x nanegü, rü choma rü chaugüxü̃́ íchayaxügüxẽxẽ ga yema nüxíra buexü̃ ga Iraétanüxü̃ nanegü.
18Natürü yema nanegü ga nüxíra buexü̃chicüxü rü chanade i ngẽma Lebítanüxü̃.
19Rü choma rü guxü̃ma i ngẽma Iraétanüxü̃tücumüwa rü chanade i ngẽma Lebítanüxü̃. Rü Aróü̃me̱xẽgu rü nanegüme̱xẽgu chanamu i ngẽma Lebítanüxü̃ nax ngẽma Iraétanüxü̃égagu naxügüãxü̃ca̱x i ngẽma puracü i chopatawa ngẽxmaxü̃. Rü nümagü tá nixĩ i chope̱xewa nangegüãxü̃ i Iraétanüxü̃arü ãmaregü nax nüxü̃́ nüxü̃ charüngümaxü̃ca̱x i ngẽma norü chixexü̃gü. Rü ngẽmaãcü i nüma i Iraétanüxü̃ rü taxũtáma chopatana nangaicamagü rü ngẽmaãcü taxũtáma ta̱xacü nüxü̃ nangupetü —ñanagürü ga Tupana.
20Rü nüma ga Moiché rü Aróü̃ rü guxü̃ma ga Iraétanüxü̃ rü nayanguxẽxẽ ga yema ore ga Cori ya Tupana Moichémaxã nüxü̃ yaxuxü̃ ga Lebítanüxü̃chiga.
21Rü nüma ga Lebítanüxü̃ rü Tupanape̱xewa nügü nimexẽẽgü, rü nügü niyauxchirugü. Rü yemawena ga nüma ga Aróü̃ rü Tupanape̱xewa nanagagü nax nüxna yamugüãxü̃ca̱x. Rü Aróü̃ rü Tupanaca̱x nayagu ga wüxi ga ãmare nax yemaacü yanaxoxẽẽãxü̃ca̱x ga yema Lebítanüxü̃arü pecadugü.
22Rü yemawena ga nüma ga Lebítanüxü̃ rü Tupanapatagu nachocu nax naxügüxü̃ca̱x ga norü puracü. Rü guxü̃ma ga yema Lebítanüxü̃ rü Aróü̃me̱xẽwa rü Aróü̃ nanegüme̱xẽwa nayemagü. Rü yemaacü nayanguxẽxẽ ga guxü̃ma ga yema Cori ya Tupana Moichémaxã nüxü̃ ixuxü̃ ga Lebítanüxü̃chiga.
Ñuxre ya taunecü tá napuracüe i Lebítanüxü̃
23Rü Tupana rü Moichéxü̃ ñanagürü:
24—Ngẽma Lebítanüxü̃ rü tá inanaxügü nax chopatawa napuracüexü̃ i ngẽxguma 25 ya taunecü nüxü̃́ ngẽxmagügu.
25Rü ngẽxguma 50 ya taunecü nüxü̃́ ngẽxmagu rü tá inarüngü̃.
26Rü ngẽxguma marü 50 ya taunecü nüxü̃́ ngẽxmaguwena rü name nax namücügüxü̃ nangü̃xẽẽgüxü̃ i Tupanapataarü puracüwa, natürü taxũtáma guxü̃gu nanaxü i ngẽma puracü. Rü ngẽmaãcü tá cuyanu i ngẽma Lebítanüxü̃arü puracü —ñanagürü ga Tupana.
Currently Selected:
Iraétanüxü̃arü muxchiga 8: tcaP
Highlight
Copy
Compare
Share
Want to have your highlights saved across all your devices? Sign up or sign in
© 2022, Wycliffe Bible Translators, Inc. All rights reserved.
