Iraétanüxü̃arü muxchiga 10
10
Cornétagü ga diẽrumünaxca̱x
1Rü Cori ya Tupana rü Moichémaxã nidexa rü ñanagürü:
2—¡Diẽrumü i martiyumaxã meama ipoochixü̃wa naxü ya taxre ya cornétagü! Rü yima cornétagümaxã tá nixĩ i duü̃xü̃güca̱x cungemaxü̃, rü ñu̱xũchi yimamaxã tá nixĩ i duü̃xü̃gümaxã nüxü̃ quixuxü̃ ega ipexĩãchichaü̃gu.
3Rü ngẽxguma tá yacuegüãgu ya yima taxre ya cornétagü, rü guxü̃ma i duü̃xü̃gü rü tá cuxü̃tagu nangutaque̱xegü i chopataca̱x íxücuxü̃wa.
4Natürü ngẽxguma wüxitama ya cornéta icuexgu, rü ngẽma Iraétücumügüarü ãẽ̱xgacügüxicatama tá cupe̱xegu nangutaque̱xegü.
5Rü ngẽxguma yima cornétagü poraãcü yacuegügu rü ngẽma duü̃xü̃gü i chopataarü éstecüwagu ãpatagüxü̃ rü tá inaxĩãchi.
6Rü ngẽxguma wena yacuegüãgu rü ngẽma duü̃xü̃gü i chopataarü súrcüwagu ãpatagüxü̃ rü tá inaxĩãchi. Rü ngẽxguma poraãcü yacuegüãgu ya yima cornétagü rü ngẽma tá nixĩ i norü cua̱xruxü̃ nax inaxĩãchixü̃ca̱x i duü̃xü̃gü.
7Natürü ngẽxguma tama poraãcü yacuegüãgu ya yima cornétagü rü ngẽma tá nixĩ i norü cua̱xruxü̃ i duü̃xü̃gü nax wüxiwa naxĩxü̃ca̱x.
8Rü ngẽma chacherdótegü i Aróü̃ nataagü tá nixĩ i cornétagügu icuegüxü̃. Rü ngẽma tá nixĩ i wüxi i mu i guxü̃gutáma peyanguxẽxẽxü̃.
9Rü ngẽxguma perü uanügü perü naanewa pexca̱x íyaxü̃ãchigu, rü pema rü naxca̱x peyayixgu nax namaxã pegü pedaixü̃ca̱x, rü name i peyacue ya yima cornétagü rü ñu̱xũchi tagaãcü aixta pexüe. Rü ngẽmaãcü i choma ya Cori ya perü Tupana nax chixĩxü̃, rü tá pexna chacua̱xãchi rü tá pexü̃ íchapoxü̃ i perü uanügüme̱xẽwa.
10Rü name i peyacue ya yima cornétagü nagu i ngẽma ngunexü̃gü i petaãẽgüxü̃ rü penaxüchigagüxü̃ ya ngexwaca ixücucü ya tauemacü. Rü ngẽxgumarüxü̃ tá ta peyacue i ngẽxguma choxna penaxãxgu i perü ãmaregü i ngüxmüxẽẽruü̃gü i cha̱u̱xca̱x piguxü̃. Rü ngẽmaãcü i choma rü tá pexna chacua̱xãchi. Rü Choma nixĩ i Cori ya perü Tupana chixĩxü̃ —ñanagürü.
Iraétanüxü̃ rü Chinaíwa inaxĩãchi
11Rü yexguma gumá norü taxre ga taunecüarü taxre ga tauemacüarü 20 ga ngunexü̃wa nanguxgu rü yema caixanexü̃ ga Tupanapataétüwa yexmaxü̃ rü inayachü̱xüxãchi.
12Rü yema Iraétanüxü̃ rü inaxĩãchi ga Chinaíarü chianexü̃wa ñu̱xmata Paráü̃arü chianexü̃wa nangugü. Rü nüma ga caixanexü̃ rü yéma nayachaxãchi.
13Rü yexguma Chinaíwa inaxĩãchigu rü yexguma nixĩ ga inaxügüxü̃ nax yema caixanexü̃we naxĩxü̃, yema Cori ya Tupana Moichémaxã nüxü̃ ixuxü̃rüxü̃.
14Rü yema nape̱xegu ĩxü̃ nixĩ ga yema churaragü ga Yudátanüxügüarü wonera ingegüxü̃. Rü yema namaxã icuáxü̃ nixĩ ga Nachóü̃ ga Aminadá nane.
15Rü yema Ichacátanüxü̃arü churaragümaxã icuáxü̃ nixĩ ga Natanaé ga Chuá nane,
16Rü yema Chaburóü̃tanüxü̃arü churaragümaxã icuáxü̃ nixĩ ga Eriá ga Eróü̃ nane.
17Rü inanagügü ga guma Tupanapata rü namaxã inaxĩãchi ga yema Guerchóü̃tanüxü̃ rü Merarítanüxü̃, yerü yemagü nixĩ ga naxme̱xwa nayexmagüxü̃ nax yangegüãxü̃ca̱x ga guma Tupanapata.
18Rü yemawena rü inaxĩãchi ga yema churaragü ga Rubéü̃tanüxü̃arü wonera ingegüxü̃. Rü yema namaxã icuáxü̃ nixĩ ga Erichú ga Chedeú nane.
19Rü yema Chimeóü̃tanüxü̃arü churaragümaxã icuáxü̃ nixĩ ga Cherumié, ga Churichadái nane.
20Rü yema Gáxtanüxü̃arü churaragümaxã icuáxü̃ nixĩ ga Ereachá, ga Reué nane.
21Rü yemaweama inaxĩãchi ga yema Queáxtanüxü̃ ga yanaxü̃ ga nawechigü ga üünexü̃. Rü yexguma yema Queáxtanüxü̃ nawa ngugügu ga yema nachica ga nagu yapegüxü̃, rü guma Tupanapata rü marü nitexechi.
22Rü yemawena inaxĩãchi ga yema churaragü ga Efraíü̃tanüxü̃arü wonera ingegüxü̃. Rü yema namaxã icuáxü̃ nixĩ ga Erichamá, ga Amiúx nane.
23Rü yema Manachétanüxü̃arü churaragümaxã icuáxü̃ nixĩ ga Gamarié, ga Pedachú nane.
24Rü yema Bẽyamíü̃tanüxü̃arü churaragümaxã icuáxü̃ nixĩ ga Abidáü̃, ga Yedeoní nane.
25Rü norü gu̱xwa ügüxü̃ nixĩ ga yema churaragü ga Dáü̃tanüxü̃arü wonera ingegüxü̃. Rü yema namaxã icuáxü̃ nixĩ ga Aiéche, ga Amichadái nane.
26Rü yema Achétanüxü̃arü churaragümaxã icuáxü̃ nixĩ ga Paguié, ga Ocráü̃ nane.
27Rü yema Netarítanüxü̃arü churaragümaxã icuáxü̃ nixĩ ga Airá, ga Enáü̃ nane.
28Rü yemaacü nixĩ ga nügü iyanuxü̃ ga yema Iraétanüxü̃arü churaragü ga yexguma inaxĩxgu.
Moiché rü norü ãmacüna naxu nax íyaxümücüãxü̃ca̱x
29Rü wüxi ga ngunexü̃ rü nüma ga Moiché rü norü ãmacü ga Obáx ga Reué ga Madiáü̃tanüxü̃ nanemaxã nidexa, rü ñanagürü nüxü̃: —Toma rü ngẽma Cori ya Tupana tomaxã ueguxü̃ i nachixü̃anewa tá taxĩ. ¡Ngĩxã, rü towe rüxũ, rü mea tá cumaxã itacua̱x! Erü nüma ya Cori ya Tupana rü marü toma Iraétanüxü̃maxã nanaxuegu nax mea tá tomaxã inacuáxü̃ —ñanagürü.
30Natürü nüma ga Obáx rü nanangãxü̃ rü ñanagürü: —Taxũtáma cuwe charüxũ erü ngẽma choma chanaxwa̱xexü̃ nixĩ nax chautanüxü̃ ingexmagüxü̃ca̱x chataeguxü̃ —ñanagürü.
31Rü nüma ga Moiché rü nüxna nicachigüama rü ñanagürü: —¡Taxṹ i ngéma cuxũxü̃! Erü cuma rü meama nüxü̃ cucua̱x i ngẽma nachicagü i mexü̃ nax nagu rüpegüxü̃ i ngẽma ínachianexü̃wa. Rü cuma rü tá toxü̃́ cume nax tomaxã nüxü̃ cucuáxü̃ca̱x i ngẽma nachicagü.
32Rü ngẽxguma towe curüxũxgu rü tá cumaxã tangau i ngẽma mexü̃gü i Cori ya Tupana toxna ãxü̃ —ñanagürü.
33Rü yemaacü guma Cori ya Tupanaarü ma̱xpǘne ga Chinaíwa inaxĩãchi rü tomaepü̱x ga ngunexü̃ inaxĩ. Rü yema baú ga Cori ya Tupanaarü mugüpane nagu üxü̃ rü nape̱xegu nayangegü. Rü yemaacü wüxi ga nachica ga mexü̃ nax nagu napegüxü̃ca̱x nadaugü.
34Rü noxri yangóonegu rü inaxĩãchigu nax namagu naxĩxü̃, rü yema Cori ya Tupanaarü caixanexü̃ rü marü naétügügu nachü̱xüxü̃.
35Rü yexguma yema baú ga Cori ya Tupanaarü mugüchixü̃maxã inaxĩãchigu, rü nüma ga Moiché rü ñanagürü: —¡Pa Corix, tomaxã napora! ¡Rü ngẽma curü uanügü rü tá cuxcha̱xwa nügü nawoone! ¡Rü ngẽxguma ngẽma cuxchi aiexü̃ cuxü̃ daugügu, rü cuxcha̱xwa tá nibuxmü! —ñanagürü.
36Rü yexguma yachiãchitanügu ga yema duü̃xü̃gü ga yema baú ga Cori ya Tupanaarü mugüchixü̃ ingegüxü̃, rü nüma ga Moiché rü ñanagürü: —¡Pa Corix, naxca̱x nataegu i ngẽma muxũchixü̃ma i Iraétanüxü̃ i duü̃xü̃gü! —ñanagürü.
Currently Selected:
Iraétanüxü̃arü muxchiga 10: tcaP
Highlight
Copy
Compare
Share
Want to have your highlights saved across all your devices? Sign up or sign in
© 2022, Wycliffe Bible Translators, Inc. All rights reserved.
