Iraétanüxü̃arü muxchiga 23
23
1Rü yexguma ga nüma ga Balaáü̃ rü ñanagürü nüxü̃: —¡Ẽcü 7 i ãmarearü guruxü̃ nuxã naxü! ¡Rü ínayauxü̃ i 7 i wocaxacügü rü 7 i carnérugü nax cha̱u̱xca̱x ínamemarexü̃ca̱x nax Tupanaca̱x chayaguxü̃! —ñanagürü.
2Rü nüma ga Baláx rü nanaxü ga yema Balaáü̃ namaxã nüxü̃ ixuxü̃. Rü wüxigu nügümaxã rü nayama̱xgü rü nayagugü ga wüxi ga wocaxacü rü wüxi ga carnéru ga wüxichigü ga ãmarearü guruü̃wa.
Balaáü̃ rü mexü̃ Iraétanüxü̃maxã naxuegu
3-4Rü ñu̱xũchi Balaáü̃ rü ñanagürü Baláxü̃: —¡Ẽcü nuxã ãmarearü guruü̃xü̃tagu rüxã̱ũ̱x! Rü choma rü yoxni tá íchayadau rü aixcüma cha̱u̱xca̱x ngéma naxũ ya Cori nax ngẽxma choxü̃ nanga̱xauxü̃ca̱x. Rü ñu̱xũchi tá cumaxã nüxü̃ chixu i ngẽma chomaxã nüxü̃ yaxuxü̃ —ñanagürü. Rü nüma ga Balaáü̃ rü wüxi ga ma̱xpǘne ga chianenewa naxũ, rü yéma nixĩ ga Tupana naxca̱x ngóxü̃. Rü nüma ga Balaáü̃ rü ñanagürü Tupanaxü̃: —Marü chanaxü i 7 i ãmarearü guruxü̃, rü wüxichigü i ngẽma guruü̃wa rü cuxca̱x chayagu i wüxi i wocaxacü rü wüxi i carnéru —ñanagürü.
5Rü yexguma ga Cori ya Tupana rü Balaáü̃maxã nüxü̃ nixu ga ore ga Baláxca̱x ixĩxü̃, rü ñanagürü nüxü̃: —¡Ẽcü nataegu i naxü̃tawa i Baláx rü namaxã nüxü̃ ixu i ngẽma ore i tá cumaxã nüxü̃ chixuxü̃! —ñanagürü.
6Rü nüma ga Balaáü̃ rü nataegu rü Baláxü̃ inayangau ga yexma ãmarearü guruü̃güxü̃tagu chigüxü̃ namaxã ga guxü̃ma ga ãẽ̱xgacügü ga Moáanecüã̱xgü.
7Rü nüma ga Balaáü̃ rü nüxü̃ nixu ga ñaa ore rü ñanagürü:
—Yeama yáxü̃wa ínama̱xpǘneanexü̃wa i Aráü̃wa choxü̃ ne naxũxẽxẽ ya Baláx ya Moáanecüã̱xgüarü ãẽ̱xgacü.
Rü ñanagürü choxü̃:
“¡Nua naxũ rü chixexü̃ namaxã naxuegu i ngẽma Iraétanüxü̃ nax ngẽmaãcü chixexü̃ namaxã ngupetüxü̃ca̱x i Acóbutanüxü̃!” ñanagürü choxü̃.
8¿Natürü ñuxãcü tá chixexü̃ namaxã chaxuegu i ngẽma duü̃xü̃gü ya Tupana tama chixexü̃ namaxã ueguxü̃?
¿Rü ñuxãcü tá chixexü̃gu namaxã charüxĩnü i ngẽma duü̃xü̃gü i Cori ya Tupana tama chixexü̃gu namaxã rüxĩnüxü̃?
9Rü nua daa ma̱xpǘnechitaeruwa rü meama nüxü̃ chadau i ngẽma Iraétanüxü̃.
Rü daa ma̱xpǘnetape̱xewa rü meama nüxü̃ chadawenü.
Rü chanangugü rü duü̃xü̃gü i nügütanüxü̃xicatama ixãchiü̃güxü̃ nixĩgü.
Rü tama togü i duü̃xü̃gümaxã nawüxigu erü tama togü i duü̃xü̃gümaxã nügü narüxücu.
10Rü ñoma ãte̱xexü̃rüxü̃ namuxũchi, ¿rü texé tá tüxü̃́ natauxcha nax tayaxugüxü̃?
¿Rü texé tá nüxü̃ cuáxü̃ i norü mu?
Chierüx ngẽma duü̃xü̃gü i mexü̃rüxü̃ chixĩxgu i choma ñu̱xmatáta chayu̱x.
Rü ngẽmawena rü chanaxwa̱xe nax Tupana ngẽma duü̃xü̃güxü̃ yaxuxü̃rüxü̃, choxü̃ yaxuxü̃
—ñanagürü.
11Rü yexguma ga Baláx rü Balaáü̃xü̃ naxca̱x nadexagü yerü ga Balaáü̃ rü tama nanaxü ga yema nüxna naxca̱x naca̱xaxü̃, rü ñanagürü: —¿Ta̱xacü nixĩ icuxüxü̃? Rü choma rü cuxca̱x nua changema nax chixexü̃ namaxã cuxueguxü̃ca̱x i ngẽma chorü uanügü, natürü i cuma rü mexü̃ namaxã cuxuegu —ñanagürü.
12Rü nüma ga Balaáü̃ rü nanangãxü̃ rü ñanagürü: —¿Tama ẽ̱xna nüxü̃ cucua̱x nax cumaxã nüxü̃ chixuxü̃ rü ngẽma Tupana chomaxã nüxü̃ ixuxü̃xicatama tá yixĩxü̃ i ngẽma nüxü̃ chixuxü̃? —ñanagürü.
13Natürü nüma ga Baláx rü Balaáü̃xü̃ nica̱a̱xü̃chigüama rü ñanagürü: —¡Ẽcü tóxnamana chowe rüxũ, rü ngéma tá nixĩ i naxpechinüguxica tátama cudauxü̃ i ngẽma ínangexmagüxü̃wa i ngẽma duü̃xü̃gü, natürü taxũtáma guxü̃gu cudauane i ngẽma ínangexmagüxü̃wa! Rü chanaxwa̱xe nax ngéma chixexü̃ namaxã cuxueguxü̃ —ñanagürü.
14Rü nüma ga Baláx rü wüxi ga naane ga dauxü̃taechica ga Chopíü̃gu ãégaxü̃wa nanaga ga ma̱xpǘne ga Pichátape̱xewa. Rü yexma nanaxü ga 7 ga ãmarearü guruxü̃. Rü wüxichigüwa nayagu ga wüxi ga wocaxacü rü wüxi ga carnéru.
15Rü yema nachicawa rü nüma ga Balaáü̃ rü ñanagürü Baláxü̃: —¡Ẽcü nua ñaa naxü̃na íguxü̃xü̃tagu rüxã̱ũ̱x! Rü choma rü tá yoxni Tupanamaxã charüdexa —ñanagürü.
16Rü nüma ga Cori ya Tupana rü yéma Balaáü̃ca̱x nango̱x, rü namaxã nüxü̃ nixu ga yema ore ga Baláxmaxã tá nüxü̃ yaxuxü̃. Rü ñanagürü nüxü̃: —¡Ẽcü nataegu naxü̃tawa i Baláx rü namaxã nüxü̃ ixu i ngẽma cumaxã nüxü̃ chixuxü̃! —ñanagürü.
17Rü nüma ga Balaáü̃ rü nataegu. Rü Baláxü̃tawa nangu ga naxü̃na íguxü̃xü̃tawa nanguxẽẽxü̃ namaxã ga namücügü ga ãẽ̱xgacügü ga Moáanecüã̱xgü. Rü nüma ga Baláx rü Balaáü̃na naca rü ñanagürü: —¿Rü ñuxũ ñaxü̃ cuxü̃ ya Cori ya Tupana? —ñanagürü.
18Rü yexguma ga nüma ga Balaáü̃ rü nüxü̃ nixu ga ñaa ore, rü ñanagürü:
—Pa Baláx ya Chipóx Nane Ixĩcüx ¡dücax, mea choxü̃́ irüxĩnü!
19Rü Tupana rü tama duü̃xü̃gü nagu rüxĩnüxü̃gu narüxĩnü, rü taguma nidora rü taguma nanaxüchicüxü i norü ĩnü.
Rü ngẽxguma ta̱xacüxü̃ yaxuxgu rü aixcümama nanaxü.
Rü ngẽxguma ta̱xacüca̱x inaxunetagu rü aixcümama nayanguxẽxẽ.
20Rü choxü̃ namu ya Tupana nax mexü̃ namaxã chaxueguxü̃ca̱x i ngẽma duü̃xü̃gü i Iraétanüxü̃ erü nümatama ya Tupana rü mexü̃ namaxã naxuegu rü ngẽmaca̱x i choma rü taxucürüwa chixexü̃ namaxã chaxuegu.
21Rü nüma ya Tupana rü tama nagu narüxĩnü i norü chixexü̃ i ngẽma duü̃xü̃gü i Iraétanüxü̃ i Acóbuarü duü̃xü̃gü ixĩgüxü̃.
Rü nüma ya Cori ya norü Tupana rü natanüwa nangẽxma, rü tama chixexü̃ namaxã naxüxchaü̃.
Rü nümagü rü norü ãẽ̱xgacüãcü nüxü̃ nacua̱xgü.
22Rü yimá norü Tupana nixĩ ga Equítuanewa ínanguxü̃xẽẽxü̃ namaxã ga taxü̃ ga norü pora i búfalo i düraxü̃arü poraxü̃ rüyexeraxü̃.
23Rü taxucürüwa i yuüxü̃arü poramaxã tanachixexẽxẽ i ngẽma Acóbuarü duü̃xü̃gü, rü taxucürüwama ta̱xacürü chixexü̃maxã tanachixexẽxẽ i ngẽma Iraétanüxü̃.
Rü ngẽmaca̱x i duü̃xü̃gü rü tá nüxü̃ nixugüe nax poraãcü Tupana nüxü̃ rüngü̃xẽẽxü̃ i ngẽma Iraétanüxü̃ i Acóbuarü duü̃xü̃gü ixĩgüxü̃, rü ñanagürügü tá:
“Tupana rü taxü̃ i norü poramaxã ínananguxü̃xẽxẽ nawa ga yema taxü̃ ga norü guxchaxü̃ ga nüxü̃́ yexmagüxü̃”, ñanagürügü tá.
24Rü ngẽma duü̃xü̃gü i Iraétanüxü̃ rü ñoma wüxi i leóü̃rüxü̃ nixĩgü.
Rü ngẽma leóü̃ i yauxẽü̃chaü̃xü̃ rü tama ínayachaxãchi ñu̱xmata nüxü̃ nanguxü̃ i ngẽma naeü̃ i yayauxchaü̃xü̃ nax nagüwa naxaxexü̃ca̱x
—ñanagürü.
25Rü yexguma ga Baláx rü ñanagürü Balaáü̃xü̃: —Ñu̱xma nax tama cuxü̃́ natauxchaxü̃ nax chixexü̃ namaxã cuxueguxü̃ i ngẽma Iraétanüxü̃, rü ngexrüma noxtacüma nax mexü̃ namaxã cuxueguxü̃ —ñanagürü.
26Rü nüma ga Balaáü̃ rü nanangãxü̃ rü ñanagürü: —¿Tama ẽ̱xna nagu curüxĩnü nax marü cumaxã nüxü̃ chixuxü̃ rü ngẽma Tupana chomaxã nüxü̃ ixuxü̃xicatama tá yixĩxü̃ i ngẽma nüxü̃ chixuxü̃? —ñanagürü.
27Rü yexguma ga Baláx rü ñanagürü nüxü̃: —¡Ẽcü, ngĩxã rü tóxnamana tá cuxü̃ chaga! Rü bexmana ega ngẽma nachicawa chixexü̃ namaxã cuxuegu̱xgu i ngẽma Iraétanüxü̃ rü taxũtáma nanu ya Tupana —ñanagürü.
28Rü yemaacü ga Baláx rü ma̱xpǘne ga Peúgu ãéganewa Balaáü̃xü̃ naga. Rü yéma nixĩ ga meama naétü idauxü̃ ga guxü̃ma ga yema chianexü̃.
29Rü yexguma ga nüma ga Balaáü̃ rü ñanagürü nüxü̃: —¡Ẽcü 7 i ãmarearü guruxü̃ nuxã naxü, rü ínayauxü̃ i 7 i wocaxacügü rü 7 i carnérugü nax cha̱u̱xca̱x ínamemarexü̃ca̱x nax Tupanaca̱x chayaguxü̃! —ñanagürü.
30Rü nüma ga Baláx rü nanaxü ga yema Balaáü̃ namaxã nüxü̃ ixuxü̃. Rü nayama̱x rü nayagu ga wüxi ga wocaxacü rü wüxi ga carnéru ga wüxichigü ga yema ãmarearü guruü̃wa.
Currently Selected:
Iraétanüxü̃arü muxchiga 23: tcaP
Highlight
Copy
Compare
Share
Want to have your highlights saved across all your devices? Sign up or sign in
© 2022, Wycliffe Bible Translators, Inc. All rights reserved.
