Iraétanüxü̃arü muxchiga 24
24
1Natürü nüma ga Balaáü̃ rü marü nüxü̃ nicua̱xãchi rü Cori ya Tupana rü aixcüma mexü̃ Iraétanüxü̃maxã naxueguchaü̃. Rü yemaca̱x marü tama noxrirüxü̃ Baláxarü ngúchaü̃ca̱x nadau. Rü yema chianexü̃ ga Iraétanüxü̃ ípegüxü̃gu nadawenümare.
Ore i mexü̃ i Tupana Balaáü̃a̱xwa nüxü̃ ixuxü̃
2Rü yexguma nüxü̃ nadauyane ga yema Iraétanüxü̃ nax nügütanüxü̃chigüãcüma naxãpatagüxü̃, rü Tupanaãxẽ ya Üünexü̃ rü Balaáü̃na nangu rü namaxã inacua̱x.
3-4Rü yexguma ga Balaáü̃ rü nüxü̃ nixu ga ñaa ore nachiga ga Iraétanüxü̃, rü ñanagürü:
—Ñaa nixĩ i norü ore i Balaáü̃ i Beúx nane i aixcüma mea nüxü̃ cuácü i ngẽma nüxü̃ nadauxü̃,
rü nüxü̃ ĩnücü i ngẽma ore ya Tupana nüxü̃ ixuxü̃, rü nüxü̃ cuácü ya yimá Tupana ya Guxãétüwa Ngẽxmacü nagu rüxĩnüxü̃,
rü nüxü̃ cuácü i ngẽma Tupana nüxü̃ wéxü̃,
rü Tupanaãxẽ nüxna ngucü nax nango̱xetüxü̃ca̱x.
5Rü pemax, Pa Acóbutanüxü̃x rü nimexẽchi ya pepatagü.
Rü pemax, Pa Iraétanüxü̃x, rü namexẽchi i ngẽma ípengexmagüxü̃wa.
6Rü pepatagü rü ñoma cucugü i máxchimüxü̃xü̃rüxü̃ nixĩgü.
Rü ngẽma ípepegüxü̃wa rü ñoma ori̱xnecü i natüpechinügu togüxü̃rüxü̃ nixĩgü.
Rü pema rü ñoma naigü i mexẽchixü̃ i Tupanatama itogüxü̃rüxü̃ pixĩgü,
rü ñoma ocayiwagü i natüpechinüwa rüxügüxü̃rüxü̃ pixĩgü.
7Rü pemax, Pa Iraétanüxü̃x, rü tá pexü̃́ nangẽxma i taxü̃ i dexá nax nawa pexaxegüxü̃ca̱x rü penetügü namaxã pimegüxü̃ca̱x.
Rü perü ãẽ̱xgacü rü ngẽma ãẽ̱xgacü ya Agáxmaxã tá inacua̱x.
Rü nüma ya perü ãẽ̱xgacü rü guxãétüwa tá nangẽxma.
8Rü yimá norü Tupana nixĩ ga Equítuanewa ínanguxü̃xẽẽxü̃ namaxã ga taxü̃ ga norü pora i búfalo i düraxü̃arü poraxü̃ rüyexeraxü̃.
Rü pema i Iraétanüxü̃ rü tá penadai i guxü̃ma i nachixü̃anecüã̱xgü i perü uanügü ixĩgüxü̃.
Rü tá ipenapóü̃güchina̱xã, rü tá pexnemaxã penadai.
9Rü ngẽxguma ipecagügu nax pepeexü̃ca̱x rü ñoma wüxi i leóü̃ i pexü̃rüxü̃ pixĩgü rü taxúetama tügü ítarüpora nax pexü̃ ítaba̱i̱xgüxü̃ca̱x.
¡Rü mexü̃ tüxü̃ ngupetü ya yíxema mexü̃ pemaxã ueguxe,
Pa Iraétanüxü̃x, rü chixexü̃ tüxü̃ ngupetü ya yíxema chixexü̃ pemaxã ueguxe!
—ñanagürü ga Balaáü̃.
10Rü yemaxü̃ naxĩnügu ga Baláx rü poraãcü Balaáü̃maxã nanuxũchi, rü napéme̱xẽãcümaxã ñanagürü: —Choma rü cuxca̱x changema nax chixexü̃ namaxã cuxueguxü̃ca̱x i ngẽma chorü uanügü, natürü marü tomaepü̱xcüna nixĩ nax mexü̃ namaxã cuxueguxü̃.
11Rü narümemae nixĩ nax cuchiü̃ca̱x cutaeguxü̃. Choma rü marü ichaxuneta nax mexü̃maxã cuxü̃ chatachigaxẽẽxü̃, natürü nüma ya Cori ya Tupana rü tama nanaxwa̱xe nax ngẽma mexü̃ cumaxã chaxüxü̃ —ñanagürü.
12-13Rü nüma ga Balaáü̃ nanangãxü̃ rü ñanagürü: —Choma rü marü namaxã nüxü̃ chixu i curü orearü ngeruü̃gü rü woo ngẽxguma choxna cunaxãxgu i guxü̃ma i úiru rü diẽrumü i cupatawa ngẽxmagüxü̃ rü choma rü taxucürüwa ngẽmaca̱x tama naga chaxĩnü ya Cori ya Tupana, rü taxucürüwama chorü ngúchaü̃gagutama ta̱xacürü mexü̃ chaxü rüe̱xna ta̱xacürü chixexü̃ chaxü. Rü ngẽma Cori ya Tupana choxü̃ muxü̃xicatama nixĩ i nüxü̃ chixuxü̃.
14Rü name nax chauchixü̃aneca̱x chataeguxü̃, natürü naxü̃pa nax íchixũxü̃ rü tá cumaxã nüxü̃ chixu i ngẽma guxchaxü̃gü i tá curü duü̃xü̃güca̱x ínanguxẽẽgüxü̃ i ngẽma Iraétanüxü̃ —ñanagürü.
15-16Rü yexguma ga Balaáü̃ rü nüxü̃ nixu ga ñaa ore nachiga ga Iraétanüxü̃, rü ñanagürü:
—Ñaa nixĩ i norü ore i Balaáü̃ i Beúx nane i aixcüma mea nüxü̃ cuácü i ngẽma nüxü̃ nadauxü̃ rü nüxü̃ ĩnücü i ngẽma ore ya Tupana nüxü̃ ixuxü̃ rü nüxü̃ cuácü ya yimá Tupana ya Guxãétüwa Ngẽxmacü nagu rüxĩnüxü̃ rü nüxü̃ cuácü i ngẽma Tupana nüxü̃ wéxü̃ rü Tupanaãxẽ nüxna ngucü nax nango̱xetüxü̃ca̱x.
17Rü nüxü̃ chadau i ta̱xacü i yixcüra tá ngupetüxü̃, natürü taxũtáma paxa ínangu.
Rü Iraétanüxü̃tanüwa tá nango̱x i wüxi i ãẽ̱xgacü i ñoma woramacuri ngóxü̃rüxü̃.
Rü ngẽma ãẽ̱xgacü rü Moátanüxü̃xü̃ tá nadai rü tá inayanaxoxẽxẽ i guxü̃ma i Chéxtanüxü̃.
18Rü yimá ãẽ̱xgacü rü tá Edóü̃tanüxü̃xü̃ narüporamae rü norü uanü i Cheíanewa maxẽxü̃ i duü̃xü̃gümaxã tá inacua̱x.
Rü ngẽma Iraétanüxü̃ rü tá guxü̃ i norü uanügüétüwa naxü.
19Rü Acóbutanüxü̃wa tá nango̱x i wüxi i ãẽ̱xgacü i guxãxü̃tama rüporamaexü̃.
Rü tá nanadai i norü uanügü i ĩanewa yaxǘgüxü̃
—ñanagürü.
20Rü yemawena ga Balaáü̃ rü Amaréxarü ĩanexü̃ nadawenü rü nüxü̃ nixu i ta̱xacü tá namaxã ngupetüxü̃. Rü ñanagürü:
—Amaréx rü wüxi i nachixü̃ane i guxãxü̃ma rüporamaexü̃ nixĩ,
natürü nawa tá nangu nax iyanaxoxü̃
—ñanagürü.
21-22Rü yexguma nango̱xetügu ga Balaáü̃ rü Quenéutanüxü̃güxü̃ nadau, rü nüxü̃ nixu i ta̱xacü tá namaxã ngupetüxü̃. Rü ñanagürü:
—Pa Quenéutanüxü̃güx, rü woo yataixgu i perü cu̱xchicaxü̃gü,
rü woo máxpü̱xanexü̃gu pexãchiü̃gügu,
natürü yima pechiü̃gü rü tá ínagu i ngẽxguma Achíriaanecüã̱x pexü̃ igagügu
—ñanagürü.
23Rü yemawena rü nüxü̃ nixu i ngẽma tá yixcüra ngupetüxü̃, rü ñanagürü:
—Wüxi i taxü̃ i ngechaü̃ tá nixĩ tümaca̱x ya yíxema duü̃xẽgü ya maxẽxe i ngẽxguma Cori ya Tupana yanguxẽẽgu i guxü̃ma i ngẽma.
24Rü Chípreanewa tá ne naxĩ ya wapurugü,
rü guxü̃netáma ya Achíriaanearü ĩanegügu rü Ébeanearü ĩanegügu rü tá napogüe
—ñanagürü.
25Rü yemawena ga Balaáü̃ rü inaxũãchi, rü napataca̱x nataegu. Rü nüma ga Baláx rü ta rü napataca̱x nataegu.
Currently Selected:
Iraétanüxü̃arü muxchiga 24: tcaP
Highlight
Copy
Compare
Share
Want to have your highlights saved across all your devices? Sign up or sign in
© 2022, Wycliffe Bible Translators, Inc. All rights reserved.
