YAKOBUS 1
1
1 #
Mat. 13:55; Mrk. 6:3; Kis. 15:13; Gal. 1:19 Saudaro-saudaro umat Allah kutene de tesebea neak kute dunio! Salam kunei uku, Yakobus, hamba Allah ngen hamba Tuhan Yesus Kristus.
Imen ngen perbuatan
2Saudaro-saudaro! Amen udi meding memecem cobaan, lokba udi meding utung. 3Sebab udi namen, bahwo amen udi tep pecayo ngen Tuhan pado waktau meding cobaan, akibatne adeba: udi jijai sabar. 4Jagoba supayo ketabahan ateinu o berkembang sapei udi jijai sungguak-sungguak sempurno serto coa kuang lem hal jano bae. 5Amen ade tun neak antaro udi de kuang bijaksana, lokba si minoine kunei Allah, mako Allah bakea melei kebijaksanaan ngen udi; sebab ngen tiep tun, Allah melei ngen mu'eak atei ngen asai ibo. 6Tapi tun de minoi, harus pecayo; si coa buliak reragau. Sebab tun de reragau adeba awei umbok neak laut de kembus angin moi ipe bae. 7-8Tun de awei o coa tep pekeranne; si coa dapet mok keputusan jejano lem kute sesuaktau de neane. Kerno o, jibeak kulo si ma'ep utuk dapet jejano kunei Tuhan.
Peset ngen kayo
9Tun Kristen de peset lokba meding riang amen Allah melekatne. 10#Yes. 40:6-7 Ngen tun Kristen de kayo lokba meding riang kulo, amen Allah merendeakne. Sebab tun kayo bakea nyep awei bungai dukut. 11Pado waktau matai bilai terbit ngen panesne tenget, mako dukut o bakea jijai leu sehinggo guguaba bunggaine ngen nyepba kulo kebaesne. Awei'oba kulo ngen tun de kayo; si bakea ajua pado waktau si gidong maneu usahone.
Cobaan ngen godaan
12Riangba tun de sabar pado waktau si cenubo. Sebab sesudo si berasea taen lem cobaan o, si bakea temimo upeakne, adeba idup de sudo jenanjai Allah ngen tun-tun de cito ngen Allah. 13Amen su'ang tun tergoda ngen cobaan de awei o, jibeakba si madeak, “Godaan yo tekone kunei Allah,” sebab Allah coa dapet tegoda ngen kejahatan, coa kulo menggoda suang tun kulo. 14Tapi tun tergoda amen si tenarik ngen tepiket ngen kelokne su'ang de coa baik. 15Sesudo o, amen kelok de coa baik o tenotoa, mako laherba duso; amen duso bi lai, mako akibatne adeba matei.
16Jibeakba udi keno pike, Saudaro-saudaroku de tecito! 17Tiep pelei de baik ngen hadiah de sempurno tekone kunei surgo, tenu'un Allah, Pencipto kute te'ang neak lenget. Siba Allah de coa bubeak, coa kulo jijai sembab tiep kelem. 18Das kelok-Ne su'ang Si jemijai ite anok-anok-Ne liwet Firman-Ne de benea. Si menea o supayo ite dapet penan de utamo neak antaro kute makhluk ciptaan-Ne.
Temi'uk ngen menea
19Kemliakba dio bebaik, Saudaro-saudaro de tecito! Tiep tun harus gacang utuk temi'uk, tapi cendok utuk miling ngen mengiak. 20Tun de mengiak coa dapet menea de baik, de semnang atei Allah. 21Sebab o, nuangba tiep kebiasaan de coa baik ngen kidek. Temimoba ngen rendeak atei firman de nea Allah neak lem ateinu, sebab firman o temuan kekuatan utuk semlamat udi.
22Lokba udi menea jano de nadeak Allah, jibeak cuma temi'uk bae, sehinggo ngen awei o udi mike dirai suang. 23Tun de temi'uk Firman Allah, tapi coa kemerjone adeba awei tun de gidong kemliak papeane de sebeneane neak adep kaco. 24Sesudo si kemliak bebaik, si kulo lalau ngen langsung coa tinget awei ipe betuk papeane o. 25Hukum Allah sempurno ngen temuan kekuataan utuk mbebas manusio. Tun de semlidik ngen kemliak bebaik serto kemerjo hukum-hukum o, iso temi'uk bae lajau coa mingetne, tun o bakea diberkati Allah lem kute hal de neane.
26Amen ade su'ang tun de meding diraine de taat beragamo, tapi si coa jemago bibiane, mako si mike diraine suang; ibadahne coa ade gunone. 27Ketaatan beragamo de sucai ngen sejati temurut pandangan Allah Bapa adeba: temulung anok-anok yatim ngen rando-rando de saro, jemago dirai su'ang supayo jibeak nusak dunio yo.
Currently Selected:
YAKOBUS 1: REJ
Highlight
Copy
Compare
Share
Want to have your highlights saved across all your devices? Sign up or sign in
@ LAI 2011 Indonesian Bible Society (Lembaga Alkitab Indonesia)
