IBRANI 13
13
Awei ipe semnang atei Allah
1Lokba udi tep mengasihi do ngen de luyenne sebagai tun-tun Kristen de besaudaro. 2#Kej. 18:1-8, 19:1-3 Jibeak segan temimo neak umeaknu tun-tun de ati udi kenal. Sebab ngen menea de awei o, perneak tun, coa sadar, bi temimo malaikat neak umeakne. 3Ingetba tun-tun de neak lem sel, seolah-olah udi ade neak lem sel besamo tobo'o. Ngen tun-tun de nea sekelokne bae, lokba udi inget ngen tobo'o seolah-olah udi kulo nea awei o.
4Kute tun harus kemten sikep hormat teadep perkawinan, do'o sebabne lokba maten-ngenyan setia do ngen de luyen. Tun de cabul ngen tun de berzinah bakea nhukum Allah.
5 #
Ul. 31:6, 8; Yos. 1:5 Jibeakba idupnu kenuaso caci, tapi lokba udi pues ngen jano de ade. Sebab Allah bi madeak, “Uku coa bakea munyau atau bakea teminggea ko.” 6#Mzm. 118:6 Sebab o ite binai madeak,
“Tuhan adeba penulungku,
uku coa saben.
Jano de dapet manusio nea teadepku?”
7Jibeakba coa tinget ngen pemipin-pemipinnu de semapei pesen Allah ngen ko. Kemliakba awei ipe tobo'o idup ngen awei ipe tobo'o matei, contohba imen tobo'o. 8Yesus Kristus tep serai, baik bel'o, uyo, sapei selamo-lamone. 9Jibeakba munyau kute mecem ajaran de seseleh semset udi. Atei ite harus kenuet ngen kebaikan atei Allah, do'oba de baik; jibeak ngen peraturan-peraturan tetang kembuk. Tun-tun de bel'o taat ngen peraturan-peraturan o coa dapet utungne.
10Ite temuan debueak mezbah utuk melei kurban ngen Allah. Ngen imem-imem de jijai pelayan neak lem Kemah Tuhan, coa ade hok mbuk kurban de ade neak das mezbah o. 11#Im. 16:27 Daleak benatang de nelei sebagai kurban utuk mapun duso, nembin Imem Lai moi Ruang Mahasucai, tapi bukei benatang o suang nembem moi luea kemah. 12Do'oba sebabne Yesus kulo matei neak luea gerbang kota utuk semucai umat-Ne kunei duso ngen daleak-Ne suang. 13Kerno o, maroba ite lalau ngen-Si moi luea kemah ngen milau hino tun besamo Si. 14Sebab neak bumei coa ade penan tinggea de kekea utuk ite; ite mesoa penan tinggea de bakea teko. 15Sebab o, liwet Yesus, lokba ite bogoa mujai-mujai Allah; do'o adeba kurban syukur ite ngen-Si, de ite melei liwet ucapan bibia utuk memuliakan gen-Ne. 16Ingetba utuk menea baik ngen saling temulung, sebab dioba kurban-kurban de semnang atei Allah.
17Totoaba periteak pemipin-pemipinnu, hormatba ngen tobo'o. Sebab tobo'o bogoa kemliak jiwonu, tobo'o harus betanggung jawab ngen Allah. Amen udi taat ngen tobo'o, tobo'o dapet kerjo ngen senang atei; amen coa, mako tobo'o bakea kerjo ngen atei ibo, do'o coa mbin utung utuk udi.
18Terusba bedu'o utuk keme. Keme yakin atei nurani keme sucai, sebab lem kute hal keme bogoa lok menea jano de benea. 19Khususne uku minoi nien, supayo udi demu'o uku supayo Allah segro mbin uku belek igai ngen ko.
Du'o penutup
20Allah bi midup Tuhan ite Yesus kunei matei. Kerno matei-Ne o Si uyo jijai Gembala Agung bagiak ite, adeba bebirai-bebirai-Ne. Kematian-Ne o kulo mbin igai perjanjian kekal de nea Allah ngen ite. 21Semoga Allah sumber sejahtera o mlekep udi ngen kute de baik de udi perlu utuk menea kelok-Ne. Semoga liwet Yesus Kristus, Allah kemerjo neak lem ite, jano de kenlok-Ne. Lokba Kristus nujai selamo-lamone! Amin.
Penutup su'et
22Uku minoi supayo udi temi'uk nasihat-nasihat uku yo ngen sabar, sebab su'et yo coa kembiak panjang. 23Lokba udi namen bahwo saudaro ite Timotius bi bebas kunei sel. Amen si bi moi penan ite yo, uku bakea mbinne waktau uku semulau udi sudoyo.
24Semapeiba salam keme ngen kute umat Allah. Temimoba kulo salam kunei saudaro-saudaro neak Italia.
25Semoga Tuhan memberkati Saudaro kutene.
Currently Selected:
IBRANI 13: REJ
Highlight
Copy
Compare
Share
Want to have your highlights saved across all your devices? Sign up or sign in
@ LAI 2011 Indonesian Bible Society (Lembaga Alkitab Indonesia)
