IBRANI 5
5
1Tiep Imem Lai niliak kunei antaro umat, naket utuk mlayan Allah sebagai wakea tobo'o. Tugasne adeba melei persembahan ngen Allah pelei ngen kurban utuk pengampunan duso. 2Imem Lai o suang lemah lem dau hal, kerno'o si dapet lemah lembut teadep tun-tun de coa namen jejano ngen de sesat dalenne. 3#Im. 9:7 Ngen kerno si suang lemah, mako si harus melei persembahan kurban, iso bae kerno duso-duso umat, tapi kulo kerno duso-dusone suang. 4#Kel. 28:1 Coa ade suang kulo de maket diraine suang jijai Imem Lai. Allah suangba de maket Si. Awei de sudo tejijai ngen Harun.
5 #
Mzm. 2:7
Awei o kulo Kristus. Si coa maket dirai suang jijai Imem Lai. Allah suangba de maket Si. Allah madeak ngen-Si,
“Koba Anok-Ku;
pado bilai yo Uku jijai Bapa-Nu.”
6 #
Mzm. 110:4
Neak penan luyen Allah madeak kulo,
“Ko adeba Imem selamo-lamone,
awei imem Melkisedek atau de termasuk lem royot Melkisedek.
7 #
Mat. 26:36-46; Mrk. 14:32-42; Luk. 22:39-46 Pado waktau Yesus idup neak dunio yo, Si bedu'o, bekinoi ngen sungguak-sungguak pado Allah, de sanggup semlamat-Ne kunei matei. Ngen kerno Si tunduk ngen Allah seca'o hormat, mako Si teni'uk. 8Yesus adeba Anok Allah, tapi kunyau awei o, Si belajea jijai taat liwet penderitaan-Ne. 9Mako sesudo Si jenijai penyelamat de sempurno, Si jijai sumber keselamatan de kekal bagiak kute tun de taat ngen-Si, 10Allah kulo madeak Si sebagai Imem Lai, awei Imem Melkisedek atau de termasuk lem royot Melkisedek.
Peringatan
11Tetang penan Yesus sebagai Imem Lai, ade dau de perlu keme melei namen ngen ko, tapi saro utuk tem'angne sebab udi cendok ngertai. 12#1Kor. 3:2 Sebeneane bi waktaune bagiaknu utuk jijai gu'au, tapi nyatone udi masiak perlu belajea kunei tun luyen tetang syari'ah ajaran Allah. Udi dapet temimo kembuk de telo; udi masiak harus mbuk susu bae. 13Tun de masiak mbuk susu, taine si masiak titik; si ati ade pengalaman tetang jano de benea ngen jano de saleak. 14Kembuk de telo adeba utuk tun lai de kerno pengalaman, bi dapet mbeda ipe de baik ngen coa.
Currently Selected:
IBRANI 5: REJ
Highlight
Copy
Compare
Share
Want to have your highlights saved across all your devices? Sign up or sign in
@ LAI 2011 Indonesian Bible Society (Lembaga Alkitab Indonesia)
