IBRANI 2
2
Keselamatan de lai
1Do'oba sebabne ite harus sungguak-sungguak bepegong ngen ajaran-ajaran de ite temi'uk, supayo ite jibeak teminggea imen ite. 2Pesen-pesen de senapei malaikat ngen ninik puyang ite ternyato benea, tun de coa temotoa atau taat teadepne temimo hukuman de setimpal. 3Jano igai ngen keselamatan de lebiak lai kunei pesen-pesen o! Amen ite coa melei perhatian teadep keselamatan o, paset ite coa bakea bebas kunei hukuman. Sebab Tuhan suangba de pertamo sekilai melei namen keselamatan o, tun-tun de dute temi'ukne bi melei bukti kebenaranne ngen ite. 4Seluyen o, Allah kemuet saksai tun-tun o ngen menea kute mecem keajaiban ngen hal-hal de luea biaso serto magiak pelei kunei Roh Allah temurut kelok-Ne suang.
Meretes dalen bagiak manusio utuk senlamat
5Malaikat-malaikat coa dapet kuaso kunei Allah utuk meriteak dunio de gidong ite madeak yo. 6#Mzm. 8:5-7 Sebelekne, ade do bagian neak lem Kiteb Sucai tetulies awei yo,
“Manusio o jano, ya Allah, sehinggo Ko lok mingetne?
Manusio cuma manusio bae, tapi Ko melei perhatian ngen si!
7Utuk waktau de siket Ko jemijai si rendeak didik kunei malaikat.
Ko melei ngen si kedudukan de mulio ngen terhormat,
8serto jemijai si jijai penguaso das kute sesuaktau.”
Nah, amen nadeak bahwo Allah jemijai manusio “penguaso das kute sesuaktau”, do'o taine bahwo coa de sesuaktau kulo de coa neak beak kuaso manusio. Kunyau awei o, ite coa kemliak uyo manusio berkuaso das kute sesuaktau. 9Tapi ite bi kemliak Yesus berkuaso! Si jenijai rendeak didik kunei malaikat utuk waktau de siket, supayo das kebaikan atei Allah Si dapet matei utuk kute umat manusio. Ite kemliak Si uyo nelei penan de mulio ngen terhormat kerno Si bi menderita sapei matei. 10Memang bi sepatutne Allah – de menea kute sesuaktau utuk maksud-Ne su'ang – menea Yesus penyelamat de sempurno liwet penderitaan. Ngen o Allah dapet majok dau tun utuk turut diagungkan besamo Yesus. Sebab Siba meretes dalen bagiak tobo'o utuk dapet selamat.
11Yesus semucai manusio kunei duso-duso tobo'o; Si de semucai, serto tobo'o de senucai o, samo-samo temuan do Bapa. Do'oba sebabne Yesus coa selek makau tobo'o sebagai saudaro-saudarone. 12#Mzm. 22:23 Yesus madeak ngen Allah,
“Uku bakea melei namen ngen saudaro-saudaro-Ku tetang Ko.
Uku bakea mujai Ko neak lem pertemuan tobo'o.”
13 #
Yes. 8:17, 18 Yesus madeak kulo, “Uku bakea mpek harapan-Ku ngen Allah.” Si madeak kulo. “Dioba Uku, besamo anok-anok de sudo nelei Allah ngen Uku.”
14Kerno tun-tun de Si senbut anok o, adeba makhluk manusio de dapet matei, mako Yesus suang jijai serai ngen tobo'o, idup lem keadaan manusio. Si menea awei o, supayo ngen mateine Si dapet majua Iblis de kemuaso kematian. 15Ngen ca'o o Si mbebas tun-tun de seomor idupne jijai budok kerno saben ngen kematian. 16Nyatoba bahwo iso malaikat de tenulung-Ne, meluyen royot Abraham. 17Dio taine bahwo Si harus jijai serai ngen saudaro-saudaro-Ne lem kute hal. Ngen o Si dapet jijai Imem Lai de setia ngen penuak kasiak. Ngen pelayanan-Ne o duso manusio dapet napun. 18Ngen kerno Si suang perneak saro ngen cenubo, Si dapet temulung tun-tun de dapet cobaan.
Currently Selected:
IBRANI 2: REJ
Highlight
Copy
Compare
Share
Want to have your highlights saved across all your devices? Sign up or sign in
@ LAI 2011 Indonesian Bible Society (Lembaga Alkitab Indonesia)
