IBRANI 3
3
Yesus lebiak lai kunei Musa
1Saudaro-saudaro sesamo Kristen de sudo nok Allah! Cubo peker lem-lem tetang Yesus yo! Allah mutus Si khusus utuk jijai Imem Lai lem agamo de ite pegong. 2#Bil. 12:7 Si setia ngen Allah de sudo miliak si utuk kerjo o, awei Musa bel'o setia kemerjo tugasne neak Umeak Allah. 3Tapi Yesus patut dapet kehormatan lebiak lai kunei Musa. Kerno tun de temgok umeak harus dapet kehormatan lebiak lai kunei umeak o suang. 4Memang tiep umeak ade de meneane, tapi de menea kute sesuaktau adeba Allah suang. 5Musa setia sebagai pelayan neak Umeak Allah ngen semapei hal-hal de bakea nelei namen Allah pado maso de bakea teko. 6Tapi Kristus setia sebagai Anok de betanggung jawab das Umeak Allah. Ite adeba Umeak Allah, amen ite tep semangat ngen tep yakin utuk dapet jano de ite kenlok.
Istirahat utuk umat Allah
7 #
Mzm. 95:7-11
Kerno o, awei nadeak Roh Allah,
“Amen pado bilai yo udi temi'uk saei Allah,
8jibeakba ko telo ulau,
awei ninik puyangnu,
ketiko tobo'o brutak teadep Allah, ngen cemubo Allah neak padang gurun.
9‘Neak di ninik puyang cemubo Uku, ngen temrai Uku,’ nadeak Allah,
‘Padahal tobo'o bi kemliak perbuatan-Ku pat puluak taun keanne.’
10Do'oba sebabne Uku kembiak mengiak teadep tobo'o ngen Uku madeak,
‘Tobo'o bogoa coa setia,
ngen coa lok taat ngen periteak-periteak-Ku.’
11Uku mengiak ngen besupeak,
‘Tobo'o coa bakea masuk moi negrai o
utuk dapet istirahat besamo Uku.’ ”
12Saudaro-saudaro, teateiba jibeak sapei ade neak antaro udi de ateine kembiak kidek ngen coa ade imen, sehinggo si coa pecayo ngen me'uak Allah de idup! 13Jijai, supayo coa ade suang kulo kunei udi de keno pike ngen duso sehinggo melawen Allah, lokba udi saling melei nasihat tiep bilai selamo ite masiak idup lem zaman de senbut “Bilai Yo” lem Kiteb Sucai. 14Ite kute adeba kuat seperjuangan ngen Kristus, asal ite sapei akhir tep yakin de ite temuan pado mulone.
15 #
Mzm. 95:7-8
Dioba de tetulis lem Kiteb Sucai,
“Amen pado bilai yo udi temi'uk saei Allah,
jibeakba udi telo ulau, awei ninik puyangnu,
ketiko tobo'o mbrutak teadep Allah.”
16 #
Bil. 14:1-35
Nah, api tun-tun de temi'uk saei Allah lajau mbrutak teadep-Ne? Do'oba kute tun de nipin Musa keluea kunei Mesir, iso? 17Ngen teadep api Allah mengiak pat puluak taun keanne? Teadep tobo'o de beduso, de matei neak padang gurun, iso? 18Ketiko Allah besupeak awei yo, “Tobo'o coa bakea masuk moi negrai o utuk dapet istirahat besamo-Ku” – api kulo de Allah maksud? De maksud Allah adeba tun-tun de mbrutak teadep Allah, iso? 19Uyo ite ngertai bahwo tobo'o coa dapet masuk, kerno tobo'o coa pecayo ngen Allah.
Currently Selected:
IBRANI 3: REJ
Highlight
Copy
Compare
Share
Want to have your highlights saved across all your devices? Sign up or sign in
@ LAI 2011 Indonesian Bible Society (Lembaga Alkitab Indonesia)
