GALATIA 6
6
Samo-samo temulung
1Saudaro-saudaro, amen suang tun menea duso, lokba udi de idup temurut Roh Allah, melei nasihat tun o belek moi dalen de benea. Tapi udi harus menea o ngen lemah lembut, ngen jagoba jibeak sapei udi suang tergoda kulo. 2Lokba udi tulung temulung temanggung beban tun! Ngen awei o udi taat ngen periteak Kristus. 3Amen suang tun madeak diraine peting, padahal si samo sekilai coa peting, si mike diraine suang. 4Tiep tun harus merikso diraine suang jano plepne baik jano coa. Amen baik, si buliak bangga das hal o. Tapi jibeakba si mbandingne ngen jano de nea tun luyen. 5Sebab tiep-tiep tun harus temanggung tanggung jawabne suang.
6Tun de temimo ajaran Kristus, lokba magiak ngen gu'aune kute de baik de ade ngen si.
7Jibeak seset! Allah coa munyau dirai-Ne keno pike. Kerno jano de tenanem tun, do'o kulo de bakea si dapet. 8Sebab api de temanem temurut tabiat manusione, si bakea dapet kematian kunei tabiatne o. Tapi, api de temanem temurut pipinan Roh Allah, si bakea dapet idup kekal kunei Roh Allah o. 9Jibeakba ite bosan menea baik, kerno amen bi sapei waktaune, ite bakea dapet asea, amen ite coa jijai lemah. 10Kerno o, selamo masiak ade kesempatan bagiakte, maroba ite menea baik ngen kute tun, tapi terutamo ngen saudaro-saudaro do imen.
Peringatan ngen salam
11Keliakba, awei ipe laine huruf-huruf de uku temulis ngen ko ngen tangenku suang. 12Tun-tun de lok kemten dirai ngen hal-hal lahiriah, tobo'oba de berusaho makso udi utuk sunat, maksudne cuma, supayo tobo'o coa senikso kerno salib Kristus. 13Sebab tobo'o de semunat diraine kulo, coa kemerjo hukum agamo. Tapi tobo'o lok supayo udi senunat, supayo tobo'o dapet ombong das keadaannu de lahiriah. 14Tapi uku samo sekilai coa lok ombong tetang jano bae, seluyen tetang Tuhante Yesus Kristus de sudo matei senalib. Sebab justru kerno Si bi matei senalib, mako dunio coa igai ade taine bagiak uku. Ngen teadep dunio yo, uku kulo seolah-olah bi matei. 15Senunat atau coa, coa ade taine, De peting adeba jijai manusio blau. 16Bagiak tun-tun de idup ngen pendirian o, awei o kulo bagiak kute umat Allah, uku ma'ep Allah bakea melei damoi sejahtera ngen rahmat das tobo'o ngen das Israel de Allah temuan.
17Selanjutne jibeakba ade tun de menea uku saro, sebab neak awokku ade tando-tando bahwo uku penotoa Yesus.
18Tuhante Yesus Kristus semerto Saudaro-saudaro! Amin.
Hormat keme, Paulus
Currently Selected:
GALATIA 6: REJ
Highlight
Copy
Compare
Share
Want to have your highlights saved across all your devices? Sign up or sign in
@ LAI 2011 Indonesian Bible Society (Lembaga Alkitab Indonesia)
