GALATIA 5
5
Jagoba Kebebasan
1Ite uyo bi bebas, kerno Kristus bi mbebas ite. Kerno o, jagoba kebebasannu, ngen jibeak lok jijai bodok igai. 2Sesungguakne, uku, Paulus, madeak ngen ko: Amen udi semunat dirainu, Kristus samo sekilai coa bakea beguno bagiaknu. 3Debat igai uku madeak ngen tiep tun de semunat diraine bahwo si wajib kemerjo kute hukum agamo. 4Udi lepas kunei Kristus, amen udi ma'ep pembenaran liwet hukum agamo; udi ade neak luea anugerah. 5Sebab ngen roh, ngen kerno imen, ite mbot pembenaran de ite ma'ep. 6Sebab bagiak tun-tun de ade neak lem Kristus Yesus hal sunat coa temuan tai, cuma imen de bekerjo ngen kasih.
7Bel'o udi berjuang ngen baik. Uyo getai udi coa taat igai ngen kelok Allah? Api sudo majung udi? 8Paset de menea o iso Allah de menok udi. 9#1Kor. 5:6 Didik agai bi menea adonan jijai ngembang. 10Kunyau awei o uku masiak pecayo bahwo udi coa bakea temuan pendirian luyen kunei dio, sebab ite bi jijai do ngen Kristus. Ngen uku yakin bahwo api bae de kemacau pekerannu, bakea nukum Allah.
11Tetang uku, saudaro-saudaro, getai uku terus bae jijai musuak amen uku masiak melei namen bahwo peraturan sunat o perlu? Amen memang uku melei namen awei o, mako bito de uku semapai tetang salib Kristus coa jijai persoalan. 12Lebiak baik tun-tun de kemacau pekerannu o langsung bae keluea sekaligus kunei jemaat!
13Saudaro bi nok utuk jijai tun de bebas. Tapi jibeakba makei kebebasannu o utuk bogoa menea jano bae de udi lok nea. Sebelekne, udi harus samo-samo mengasihi ngen samo-samo melayani. 14#Im. 19:18 Kute hukum agamo ade lem periteak de do yo, “Lokba udi mengasihi sesamonu manusio awei udi mengasihi dirainu suang.” 15Tapi amen udi saling nget ngen saling temlen, awas, be udi samo-samo ajua.
Kelok Roh Allah ngen kelok manusio
16Maksudku adeba: Kunyauba Roh Allah mbimbing udi ngen jibeakba idup temurut kelok manusio. 17#Rm. 7:15-23 Sebab kelok manusio belawen ngen kelok Roh Allah – kerno keduaine belawen – sehinggo udi coa dapet menea jano de udi kenlok. 18Tapi, amen Roh Allah mipin udi, mako udi coa kenuaso hukum agamo.
19Plep manusio bi nyato, adeba: cabul, ngei, ngen hawo nafsu, 20nyembeak patung, selisiak, iri atei, gacang mengiak, peting ngen dirai suang, musuak, perpecahan, 21dengki, bogoa mabuk, poya-poya ngen sebagaine. Te'adep kutene o uku minget udi – awei de sudo uku nea bel'o – bahwo api bae de menea hal-hal awei o coa bakea jijai anggota umat Allah.
22Sebelekne, amen tun-tun nipin Roh Allah, aseane adeba: Tobo'o samo-samo mengasihi, riang, atei tenang, sabar ngen baik budi, baik te'adep tun luyen, setia, 23rendeak atei, sanggup kemuaso dirai. Coa ade hukum agamo de temtang hal-hal o. 24Api bae de sudo jijai de Kristus Yesus temuan, si bi munuak plep manusione ngen kute hawo nafsu ngen kelokne. 25Amen ite idup ngen Roh, baikba idupte kulo nipin Roh, 26ngen jibeakba ombong, jibeakba ite saling belawen ngen iri atei.
Currently Selected:
GALATIA 5: REJ
Highlight
Copy
Compare
Share
Want to have your highlights saved across all your devices? Sign up or sign in
@ LAI 2011 Indonesian Bible Society (Lembaga Alkitab Indonesia)
