FILIFI 1
1
Salam
1 #
Kis. 16:12
Saudaro-saudaro umat Allah kutene de tinggea neak Filifi, ngen de sudo jijai do ngen Kristus Yesus! Kulo Saudaro-saudaro pemipin serto pembantu jemaat!
Uku, Paulus, besamo Timotius, hambo-hambo Kristus Yesus, 2ma'ep semoga Allah Bapa ite ngen Tuhan Yesus Kristus melei berkat ngen sejahtera ngen udi.
Du'o Paulus utuk jemaat
3Tiep kilai uku tinget ngen udi, uku mucep syukur ngen Allah. 4Ngen tiep kilai uku bedu'o utuk udi kutene, uku bedu'o ngen atei riang. 5Uku mucep syukur ngen Allah kerno sejok bilai pertamo sapei uyo, udi bi temulung uku melei namen Bito Baik kunei Allah. 6Allah suang de muloi menea baik o ngen udi, ngen uku yakin Si bakea temrus pekerjaan o sapei selesei pado Bilai Kristus Yesus teko igai. 7Memang bi sepatutne uku bepeker awei o tetang udi kutene, sebab udi ade neak lem ateiku. Kulo kerno udi kutene milau temimo besamo-samo uku, anugerah de Allah nelei ngen uku; baik pado waktau uku nasuk sel atau pado waktau uku mbela ngen mempertahankan Bito Baik o. 8Allah namen bahwo uku sungguak indau ngen udi ngen perasaan kasih mesra kunei Kristus Yesus suang.
9Dioba du'oku utuk udi: semoga udi tambeak mengasihi Allah ngen sesamo lem pengetahuan de benea ngen pandangan de bijaksana. 10Ngen awei o udi namen miliak jano de baik, supayo udi sucai ngen coa ade cacet sapei bilai Kristus teko igai. 11Idupnu bakea penuak ngen plep de sungguak-sungguak baik de cuma dapet kunei Yesus Kristus suang; mako Allah bakea dimuliakan ngen nujai.
Idup utuk Kristus
12Uku lok udi namen, bahwo hal-hal de sudo tejijai ngen uku justru menea lebiak dau tun temi'uk ngen pecayo ngen Bito Baik o. 13#Kis. 28:30 Akibatne, kute pengawal istana ngen tun-tun luyenne neak kota o namen bahwo uku nasuk sel kerno uku melayan Kristus. 14Ngen kerno uku nasuk sel, dau kunei tun-tun Kristen neak kota yo jijai lebiak yakin igai ngen Tuhan, sehinggo tobo'o tambeak binai melei namen pesen Allah.
15Memang ade kekedau neak antaro tobo'o de melei namen Kristus kerno iri ngen lok tekea, tapi de luyenne melei namen Kristus kerno ade maksud de baik. 16Tun-tun yo meneane kerno tobo'o mengasihi Allah ngen uku, sebab tobo'o namen bahwo Allah bi melei tugas ngen uku utuk melei bukti bahwo Bito Baik o benea. 17Tapi tun luyen melei namen Kristus ngen maksud de coa baik; tobo'o melei namen utuk kepetinganne suang. Ngen o tobo'o ma'ep dapet menea uku lebiak saro neak lem sel.
18Tapi coa bokne! Sebab awei ipe kulo, baik o nea ngen maksud de benea atau ngen maksud de saleak, tapi Kristus nelei namen kulo; jijai uku senang. Ngen uku bakea tep meding awei o, 19sebab uku namen bahwo ngen du'o-du'onu ngen batuan kunei Roh Yesus Kristus, uku bakea bebas. 20De uku kebiak lok ngen ma'ep adeba supayo jibeak sapei uku gagal lem tugasku. Sebelekne uku ma'ep supayo tiep saat, terutamo sekilai uyo, uku dapet bersikap binai sehinggo ngen segenep jiwo ragaku – baik uku idup atau matei – Kristus dimuliakan. 21Kerno bagiak ku, tujuan idupku adeba Kristus! Ngen matei taine utung. 22Tapi amen uku harus idup neak dunio yo, uku dapet menea pekerjaan de lebiak beguno, mako uku coa namen ipe de harus uku miliak. 23Uku desok kunei duai pihok. Uku lok nien teminggea dunio yo utuk lalau tinggea ngen Kristus, sebab do'oba de kebiak baik; 24tapi, utuk kepetingannu, adeba lebiak baik amen uku tep tinggea neak dunio. 25Uku yakin tetang hal o. Do'o sebabne uku namen uku bakea tep tinggea ngen Saudaro kutene, supayo dapet temulung udi jijai tambeak kuet ngen tambeak senang lem pecayo ngen Tuhan. 26Sebab o, amen be uku belek igai ngen ko, udi de sudo jijai do ngen Kristus Yesus bakea temuan lebiak dau igai alasan utuk ombong das diraiku.
27Nah, de peting uyo adeba bahwo udi idup sesuoi ngen jano de tenuntut Bito Baik tetang Kristus o. Ngen awei o, teak uku dapet temau ngen ko jano coa, uku bakea temi'uk bahwo udi tep jijai do ngen berjuang besamo-samo utuk do maksud ngen do kelok; adeba utuk kepercayaan de sesuoi ngen Bito Baik kunei Allah o. 28Lokba udi bogoa binai; jibeak saben te'adep lawen-lawennu. Ngen awei o udi melei bukti bahwo tobo'o paset bakea aleak, ngen udi bakea menang, kerno Allah suangba de melei kemenangan ngen udi. 29Sebab Allah bi melei anugerah ngen udi iso cuma utuk pecayo ngen Kristus, tapi kulo utuk saro bagiak Kristus. 30#Kis. 16:19-40 Uyo udi kulo milau ngen uku lem perjuangan de serai; adeba de udi perneak kemliak uku berjuang bel'o, ngen de masiak uku tep berjuang sapei uyo, awei de udi uyo bi temi'uk.
Currently Selected:
FILIFI 1: REJ
Highlight
Copy
Compare
Share
Want to have your highlights saved across all your devices? Sign up or sign in
@ LAI 2011 Indonesian Bible Society (Lembaga Alkitab Indonesia)
