2 KORINTUS 4
4
Hok kunei surgo neak lem penan de kunei pitok
1Keme menea kerjo yo kerno Allah baik. Do'o sebabne keme coa putus asa. 2Keme coa makei ca'o-ca'o de menea selek. Keme coa lok kerjo ngen ca'o licik atau menea coa benea kecek Allah. Keme melayan Allah ngen atei baik temurut kelok-Ne. Sebab o, keme minoi kute tun kemliak keme ngen baik neak lem ateine. 3Amen Bito Baik de keme semapei o masiak kulo coa naham, mako cuma tun-tun de gidong moi kehancuran baeba de coa paham. 4Tun-tun de coa pecayo, de pekeranne bi tetutup ngen ilah zaman yo, sehinggo tobo'o coa kemliak cahayo kunei Bito Baik o de adeba gambar Allah. 5Bito de keme semapei o isoba bito tetang dirai keme suang. Bito o adeba bito tetang Yesus Kristus; bahwo Si adeba Tuhan; ngen keme adeba hamba-hambanu kerno Si. 6#Kej. 1:3 Allah de madeak, “Lokba kunei kelem timboa te'ang,” Siba de menea te'ang-Ne becahayo neak lem ateite, supayo ite dapet te'ang kunei pengetahuan tetang kemulioan Allah de keten neak papea Kristus.
7Tapi hok rohani de baes o keme mbin pado dirai keme de coa bego yo de nea kunei pitok. Ngen awei o nyatoba bahwo laine kuaso o ade ngen Allah ngen iso ngen keme. 8Keme senrang kunei kute pihok, tapi keme coa terjepit; keme bingung tapi coa sapei putus asa. 9Dau de musuak ngen keme, tapi coa perneak keme tinggea suang dirai. Ngen kunyau cet kilai keme nokoa sapei us, tapi keme coa matei. 10Keme bogoa mbin mateine Kristus neak lem awok keme, supayo idup Yesus kulo jijai nyato neak lem awok keme. 11Sebab keme de masiak idup yo, bogoa senreak ngen maut kerno Yesus, supayo kulo idup Yesus jijai nyato neak lem awok keme de coa kekal yo. 12Ngen awei o, maut giat neak lem dirai keme ngen idup giat neak lem udi.
13 #
Mzm. 116:10
Neak lem Alkitab ade kecek awei yo, “Uku pecayo, do'o sebabne uku miling.” Ngen awei yo keme kulo pecayo ngen sebab o keme kulo miling. 14Keme yakin bahwo Allah de sudo midup igai Tuhan Yesus, bakea midup keme kulo ngen Yesus, ngen mbin udi ngen keme moi adep-Ne. 15Kutene o adeba utuk kepentingannu. Sebab tambeak dau tun meding kasih Allah, tambeak dau kulo du'o syukur de senapei ngen Allah; ngen awei o Allah mulio.
Idup ngen imen
16Do'oba sebabne keme coa putus asa. Kunyau manusio lahiriah keme tambeak merosot, tapi manusio batiniah keme jijai blau tiep bilai. 17Sebab penderitaan de coa sebrapo yo, bakea mbin asea bagiak keme kemulioan kekal de lebiak kunei kute-kutene, uak lebiak lai kunei pado penderitaan keme. 18Sebab keme coa kemliak hal-hal de keten, meluyen de coa keten, kerno de keten adeba sementaro, tapi de coa keten adeba kekal.
Currently Selected:
2 KORINTUS 4: REJ
Highlight
Copy
Compare
Share
Want to have your highlights saved across all your devices? Sign up or sign in
@ LAI 2011 Indonesian Bible Society (Lembaga Alkitab Indonesia)
