1 TESALONIKA 5
5
Bejago-jago
1Saudaro-saudaro, coa perlu keme temulis ngen udi tengen waktaune de tepat hal-hal o bakea tejijai. 2#Mat. 24:43; Luk. 12:39; 2Ptr. 3:10 Sebab udi suang namen ngen jelas bahwo Bilai tekone Tuhan o bakea teko awei pencuri teko pado bilai kelmen 3Amen tun madeak, “Kutene aman ngen tentram,” mako pado waktau o ba tetibo tobo'o bakea ditimpa kebinasoan, ngen coa suang tun kulo dapet lolos. Hal o bakea tejijai tetibo, awei suang selawei meding gis waktau lok melaher. 4Tapi udi, Saudaro-saudaro, udi coa idup neak lem kelem sehinggo bilai o tetibo magea ko awei suang risau. 5Saudaro kutene adeba tun de idup lem te'ang; udi adeba anok-anok te'ang ngen anok-anok lueng. Ite isoba tun-tun kelmen atau tun-tun kelem. 6Sebab o ite coa buliak tidua bae awei tun luyen. Ite harus waspada ngen pekeran te harus te'ang. 7Pado bilai kelmen tun tidua, ngen pado bilai kelmen kulo tun jijai mabuk. 8#Yes. 59:17; Ef. 6:13-17 Tapi ite, de adeba tun-tun lueng, sebab o pekeran ite harus te'ang. Ite harus tep pecayo ngen Tuhan ngen mengasihi tun-tun luyen serto ma'ep ngen yakin bahwo Allah bakea semlamat ite. Do'oba senatai de melindungi ite lem perjuangan melawen kelem. 9Allah miliak ite iso utuk nukum, tapi utuk senlamat-Ne liwet Tuhan te Yesus Kristus. 10Si matei utuk ite supayo pado waktau Si teko be – teak ite masiak idup, teak ite bi matei – ite dapet idup besamo Si. 11Kerno'o, lokba udi tep samo-samo ndukung ngen samo-samo melei semangat, serai de udi gidong menea uyo.
Nasehat
12Saudaro-saudaro, keme minoi nien supayo udi hormat ngen tobo'o de kerjo neak tengeak-tengeak udi; adeba tobo'o de niliak Tuhan utuk mipin ngen melei nasehat ngen udi. 13Meneaba tobo'o ngen sehormat-hormatne, ngen kasih kerno minget jano de tobo'o menea. Hidupba ngen damoi.
14Keme minoi kulo, Saudaro-saudaro, tena'okba bebaik tun de coa lok kerjo, hiburba atei tobo'o de saben, tulungba tun de perlu tenulung ngen sabarba te'adep kute tun. 15Jagoba supayo jibeak ade de males kejahatan ngen kejahatan. Berusahoba utuk menea baik, suang ngen de luyen ngen kute tun.
16Lokba udi bogoa riang, 17tepba bedu'o 18mucep syukurba lem kute hal, sebab do'oba de Allah kenlok kunei udi sebagai tun de idup jijai do ngen Kristus Yesus.
19Jibeakba madem Roh Allah. 20Jibeakba manggep cayeak bito-bito de nelei Roh Allah. 21Kute sesuaktau harus nujai, ngen de baik harus tenotoa. 22Neu'akba kute mecem kejahatan.
23Semoga Allah suang de melei ite sejahtera, jemijai udi tun de sungguak-sungguak idup cuma utuk Allah. Semoga Allah jemago dirainu kutene, baik roh, jiwo ataupun awoknu, sehinggo coa ade cacetne pado waktau Tuhan te Yesus Kristus teko igai. 24Allah de sudo menok udi, bakea menea hal o sebab Si setia.
25Denu'oba keme, Saudaro-saudaro!
26Semapeiba salam keme ngen kute Saudaro do imen seca'o mesra.
27Das kuaso Tuhan, uku minoi nien supayo udi mbaco su'et yo ngen kute Saudaro do imen.
28Anugerah Yesus Kristus, Tuhan te, semerto udi!
Hormat keme, Paulus
Currently Selected:
1 TESALONIKA 5: REJ
Highlight
Copy
Compare
Share
Want to have your highlights saved across all your devices? Sign up or sign in
@ LAI 2011 Indonesian Bible Society (Lembaga Alkitab Indonesia)
