1 TESALONIKA 4
4
Hidup de semnang atei Allah
1Akhirne Saudaro-saudaro, keme sudo melei teladan ngen udi tetang awei ipe udi harus idup utuk semnang atei Allah. Memang udi bi idup awei o. Tapi uyo das kuaso Tuhan Yesus, keme minoi nien ngen udi, makso supayo udi lebiak berusaho igai lem hal o! 2Sebab udi bi namen petunjuk-petunjuk de sudo keme melei ngen udi das kuaso Tuhan Yesus. 3Dioba kelok Allah: supayo udi idup cuma utuk Si, sucai, me'uak kute plep kidek. 4Tiep smanei neak antaro udi harus namen awei ipe idup besamo ngenyanne ngen ca'o semnang atei Allah ngen manusio. 5Jibeak idup temotoa kelok hawa nafsu te'adep ngenyannu, awei de nea tun-tun de coa kemnal Allah. 6Lem hal awei o, jibeakba suang tun kulo menea saleak ngen Saudarone, atau mikene. Bel'o keme bi melei peringatan ngen udi, bahwa Tuhan bakea mukum tun-tun de menea saleak awei o. 7Allah menok ite, iso supayo ite idup cabul, meluyen supayo ite idup ngen ca'o de semnang atei-Ne. 8Tun de temulok ajaran iyo, iso temulok manusio, meluyen temulok Allah de melei Roh-Ne de sucai ngen udi.
9Coa perlu igai keme temulis ngen udi tetang awei ipe udi harus mengasihi Saudaro-saudaro do imen. Udi suang bi najea Allah utuk samo-samo mengasihi. 10Hal o bi udi nea kulo te'adep kute Saudaro do imen neak kuto wilayah Makedonia. Tapi, Saudaro-saudaro, keme minoi nien, supayo idupnu jijai lebiak baik igai. 11Berusahoba idup tenang, coa cemapua persoalan-persoalan tun luyen ngen bekerjo ngen tangen, awei de keme pesen ngen udi. 12Amen udi idup awei yo, udi coa begatung ngen api bae, tun-tun de coa pecayo ngen Kristus, bakea hormat ngen udi.
Tekone Tuhan
13Saudaro-saudaro, keme lok supayo udi namen de sebeneane tetang tun-tun de sudo ningea; supayo udi coa ibo awei tun-tun luyen de coa temuan harapan. 14Ite pecayo bahwo Yesus bi matei ngen idup igai. Do'o sebabne ite pecayo kulo bahwo Allah bakea midup igai kute tun de pecayo ngen Yesus de sudo ningea, supayo tobo'o idup besamo Si.
15 #
1Kor. 15:51-52
Tetang hal o, dioba ajaran Tuhan de keme lok semapei ngen udi: Pado waktau Tuhan Yesus teko, ite de masiak idup coa bakea demute tun-tun de sudo ningea. 16Be malaikat agung bakea menggang ngen sa'ei lek ngen terupet Allah sa'ei sebagai tando aba-aba. Lajau Tuhan Yesus suang bakea tu'un kunei surgo, ngen tun-tun de matei lem Kristus bakea lebiak dute idup igai. 17Sesudo'o, ite de masiak idup pado waktau o bakea besamo-samo naket ngen tobo'o lem embun-embun utuk temau ngen Tuhan neak udaro. Lajau ite bakea tinggea ngen Tuhan selamone. 18Kerno o, lokba udi samo-samo kemuet atei ngen kecek-kecek yo.
Currently Selected:
1 TESALONIKA 4: REJ
Highlight
Copy
Compare
Share
Want to have your highlights saved across all your devices? Sign up or sign in
@ LAI 2011 Indonesian Bible Society (Lembaga Alkitab Indonesia)
