TITO 1

1Inzi Paolo, umutumikiri wa Nyasaye kandi mutumwa wa Yeso Kristo ng'oda ibarwa yiyi. Inzi ndaatovolwa nukutumwa kokonya lisuuvira lia avandu vatovole va Nyasaye, kandi kuvimilira ku agiligali gi dini yitu yigizaa. 2Agiligali yaga gaveeye ku musingi gwi lisuuvirizwa lie livamwoyo litahera mba. Nyasaye utanyala koveha yakusuuviriza livamwoyo yilio mihiga minyingi ijavita, 3na mu zing'inga izindahi zia yatovola, yalolekiza likuva lilie havulavu. Likuva yili liahevwa inzi nzilwaze kolondekana ni lilaga lia Nyasaye, Muhonyi wiitu.

4Ng'oderaa ivi Tito, Mwana wange wiligali mu lisuuvira lia kusanga kwosi harara.

Nyasaye Baba na Kristo Yeso muhonyi wiitu vayanze vahane ku ivi zimbavasi nimirembe.

Miyinzi ja Tito mu Kerete

5Kivuni chagira ningoleka mu Kerete, keveeye ndi ivi uduuki kulungikiza vindu viosi via gehera, nu kuviika avakulundu vi likanisa mu madaala goosi kuli nda kulaga. 6Mukulundu wi likanisa kuduuka ave musaza utaveeye nimbara kuye. Kuduuka ave musaza wu mukali mulala, kandi kuduuka avana veve vave avasuuviri avataveeye ni kirage anoho vatatizaa malago; 7Muheenzi wi likanisa aveeye mulindi wi miyinzi ja Nyasaye; gamudukira ave mundu utaveeye nimbara. Atava mutindi, anoho wuvutima vwa vwangu; atava muhambiki, anoho mukubani, atava mukayirwi, utaveeye musuuvirifu ku mabese anoho mwimani mba. 8Gamudukira ave mwingirizi wa vageni kandi uyanzaa gaveeye malahi. Gamudukira ave mwilindi wuvulungi, umutakatifu, kandi wi miima milahi. 9Gamudukira agimiri vudinyu likuva lia Nyasaye liu uvusuuvirifu liliegizwa lihambanaa na amigizu gi dini kunangwa aduuki kuva unyala kuzuva avandi mu amigizu giligali, nu ku lungikiza yavo avahing'anaa na amigizu yago.

10Vaveeye ho avandu avanyingi ligali, mbitilira aviganiri kutura mu dini ya Avayuda, avibaaraa nukugaada avandu vandi namakuva gaavo guvusiru. 11Kuduuka amakuva gaavo gagaywi, vakiring'ane kigira vadiviza vandu avizinyumba vosi na amigizu gaavo ga vigiza ivindu vitaduukanaa kwigiza; kigira lienya vaavo litaveeye lisuuvirifu liu kwenyolera mabese. 12Mulala kuvo, muporofeti wavo aveene ya moloma agiligali ndi:

“Avakerete, kazozo vaveeye avavehi.

Ving'ang'a vidamanu, avahuvali, avagata!”

13Lilolekiza yili liveeye lieligali. Kigira yaga, gakuduukiraa uvagondokere vululu, kunangwa vaduuki kuva valungi mu lisuuvira. 14Kandi vavuli kuzizagilira kuhuliriza izing'ano zia kale zia vuzwa zia Avayuda anoho amalago ga avandu avavuraa kolonda agiligali. 15Ku yavo valungi, vindu viosi viveeye vilungi, navuzwa ku yavo vadamanu na ava vula kusuuvira, sihaveeyeho ni kindu kinifu kuvo mba. Kali ndio ovogeri vwavo ni zing'anagani zie mioyo jaavo, viombi vigwiyi vidamanu. 16Avandu kuli yava veevoola vene vamanya Nyasaye, navuzwa vu vikolwa viavo, vamwambakanaa. Vaveeye avukuvihiririza, vatahulira kandi avataduukanaa ku miyinzi josi milahi.

Amigizu giligali

Currently Selected:

TITO 1: LOGOOLI

Highlight

Copy

Compare