TITO 2

1Navuzwa gakuduukiraa wigizi vindu viduukana na amigizu malahi. 2Wigizi avakulundu vave avadukanu, avokohevwa luyali, avilindi, avovogeri, vi lisuuvira, vu vuyanzi, kandi vu kwikuzira.

3Wigizi kandi avakeere vave nuluyali lulahi mu miima jaavo; vatava avahuzirizi, anoho avayaanzaa amalwa. Gavadukiraa vigizi agaveeye amalahi. 4Kandi vaduuki kwigiza avakali avang'erere vayanze avasaza vaavo, kandi avana vaavo, 5vave avilindi, kandi valungi, avalindaa amakuva gu mu izinyumba ziavo aveene, vave avahocha kandi avegehiziraa avasaza vaavo aveene, kunangwa likuva lia Nyasaye livuli konyegwa.

6Wigizi avasoleri vang'erere vave avilindaa aveene. 7Mu vindu viosi ivi umwene wimanyie kuva oveeye chokololera ku miima milahi; ove musuuvirifu kandi mugulu mu liegiza liilio. 8Livoora liilio live lilahi vugira chokwikigitaliza, kunangwa umuhing'ani aduuki koleganywa havulavu, kigira siaveeye nichavoola ku kunyi kidamanu mba.

9Wigizi avatugwa vegehizi ku avanene vaavo, vavayaanzizi mu vindu viosi, vatava na mahangali mba; 10vatiiva kutura kuvo, navuzwa vamanyie uvusuuvirifu, kunangwa vaduuki kuhaana luyali ku amigizu ga Nyasaye Muhonyi wiitu ku vindu viosi.

11Nyasaye umali kumanyia zimbavasi zizie zio ovohonyi ku avandu vosi. 12Izimbavasi yizio ziegizaa kunyi kuduuki koleka liiva liu uvudamanu nilikayirwa lie vindu vie lirova; kandi komenye liiva liu kwilinda aveene, liuvulungi kandi liuvunyasaye mu lirova yili, 13lwa kulindiliraa lidiku liu uvugasu, lia kwasuuvirizwa liu vukumi vwa Nyasaye munene kandi Muhonyi wiitu Yeso Kristo liliduuka. 14Yihaana mwene kigira kunyi, aduuki kukutuliza mu vudamanu vwosi, kandi kokokola kove avandu valungi, avaveeye aveeve mwene kandi, vaveeye ni lienya kokora uvulahi.

15Wigizi vindu yivi; utumikiri vunyali vuvwo vwosi lwa wigiza kandi lwa uvadinyirizaa. Utaleka mundu kali mulala akolege anoho kukuchaya.

Kokora gaveeye amalahi

Currently Selected:

TITO 2: LOGOOLI

Highlight

Copy

Compare