LIKUNULA 22

1Engelosi yamanyia kandi umugera gwa amazi gi livamwoyo, amalengeeru ligali, gasinukaa mundeve yu uvwami vwa Nyasaye kandi yu Mwana wi Ligondi. 2Gavitira hagati hi inzira yi lidaala linene. Ku vuli lujinga lwu umugera zana, gwaali ho umusaala gwi livamwoyo, ugwama amakuyu likomi na gaviri ku muhiga lulala ku vuli mweli. Kandi amatu gu umusaala zana gaveeye gokohonyia avandu vi izihiiri. 3Sihalava ho kandi ni kindu choosi ichalaamwa na Nyasaye mu lidaala linene yilio mba. Navuzwa endeve yu uvwami vwa Nyasaye ni yu Mwana wi Ligondi zilakave mu lidaala yilio kandi avatumikiri veve valakamutumikiri. 4Kulakalole kandi mumoni mwa Nyasaye, ni ilieta lilie lilakang'odwe mu uvweni vwavo. 5Uvudiku sivulakave ho mba, kandi sivalakenye uvulavu vwi itaya, anoho vwi liuva mba kigira Mwami Nyasaye alakave uvulavu vwavo, navo valakamihi mihiga ni mihiga.

Yeso yazaa vwangu

6Maku engelosi yambolera, “Amakuva yaga gaveeye agiligali agukusuuvirwa. Mwami Nyasaye, ohezaa Roho weve ku avaporofeti umala kutuma engelosi weve kumanyia avatumikiri veve ivindu viduukana viekoleke vwangu.”

7Yeso avoora, “Hulira, nziza vwangu! Aveeye nuvugasu uyu ugumira amakuva go ovoporofeti vwi kitabu yiki!”

8Inzi Yohana, ndaamara kuhulira no kolola ivindu yivi viosi. Lwa ndaamara kuhulira nu kuvilola, ndaagwa hasi havirenge vie engelosi uwaali niyamanyii ivindu yivi, kandi ndaali ahimbi kumusigamira. 9Navuzwa yambolera, “Utakola ndio mba! Inzi mbeeye vuzwa umutumikiri wacho, harara na avamwavo vovo avaporofeti, harara na yavo valonda amakuva gi kitabu yiki. Sigamira Nyasaye!”

10Yambolera kandi, “Utaviika amakuva go ovoporofeti vwi kitabu yiki kuva agimbisu mba, kigira ing'inga eveeye ahimbi lwayaga goosi gazizaa kwekoleka. 11Leka oyo okolaa vudamanu ameede kokora vudamanu ligali. Leka oyo oveeye ni kivihiri ameede kokora kivihiri. Leka oyo okolaa vulahi ameede kokora vulahi. Leka oyo oveeye mutakatifu ameede kuva mutakatifu.” 12Yeso avoora, “Hulira Inzi nziza vwangu! Mbeeye na amadanyi gange, kutunga umundu sa mulala kolondekana ni miyinzi jije. 13Inzi mbeeye Alufa na Omega, wimbiri nuwukumaliriza, litanga ne keheri.” 14Vaveeye nuvugasu avogizaa zinguvu ziavo, vaduuki kulia amakuyu gu musaala gwi livamwoyo kandi kwingira mu virivwa nu kuduuka mu lidaala linene. 15Ichova ziveeye yo zimbwa, avakumu, avaheyi, aviiti, na avasigamiraa imisaambwa, kandi yava vosi avayaanzaa kovora ovovehi. 16Inzi, Yeso, mali kutuma engelosi wange aduuki kumulandizira ivindu yivi mu makanisa. Inzi mbeeye wi kisukururwi cha Daudi; mbeeye eng'ereng'ani. 17Kandi Roho harara nu umwiha vavoola, “Hamba!” Kandi uyu uhuliraa avoora “Hamba.” Kandi uyu oveeye nu uvuluhu yaaze, avugiliri amazi gi livamwoyo kuva ikihaanwa, uyu uwegombaa yaaze.

Agukumaliriza

18Inzi, Yohana, nziganihizaa umundu sa mulala uhuliraa amakuva go ovoporofeti vwi kitabu yiki; mundu woosi omedaa kindu choosi ku makuva yaga Nyasaye alameda kuye amaduywa agang'odwa mu kitabu yiki. 19Utuliza kindu choosi ku makuva gi kitabu cho ovoporofeti yivu, Nyasaye alatuliza lisanga lilie kutura ku musaala guhaanaa livamwoyo mu Lidaala Litakatifu, ili ng'odeywi mu kitabu yiki.

20Uyu ololekizaa ivindu yivi avoora, “Ligali inzi nziza vwangu!”

Gave ndio. Hamba, Mwami Yeso!

21Zimbavasi ziu Mwami Yeso zive na avandu vosi. Amini.

Currently Selected:

LIKUNULA 22: LOGOOLI

Highlight

Copy

Compare