LIKUNULA 21

1Maku ndaalora ligulu lihia ni lirova lihia. Ligulu liu kutanga kandi lirova liu kutanga limali kuvita kandi inyanza ituliziywi ho. 2Kandi ndaalora Lidaala Litakatifu, Jerusalemi imbia, nilikaa kutura mwigulu ku Nyasaye, nilietegekizwi kuli umwiha uwisiahiyi umusaza weve. 3Ndaahulira umwoyo munene nigutura mundeve yu vwami vwa Nyasaye, ni govoora, “Kalunu ovomenyo vwa Nyasaye voveeye harara na avandu! Alamenya navo, navo valava avandu veve. Nyasaye mwene alava harara navo, kandi alava Nyasaye wavo. 4Aleeya vosi, amaliga kutura mu izimoni ziavo. Likuza sililava ho mba, kandi sihalava no ovovereri anoho lisioma nu uvuzunu mba. Ivindu viakale vimali kogotizwa.”

5Maku Nyasaye yavoola, “Henza! Inzi ngolaa ivindu viosi vive ivihia.” Yambolera, “Ng'oda yili, kigira amakuva yaga gaveeye agiligali kandi aguvusuuvirifu.” 6Yambolera, “Gakoleywi! Inzi mbeeye Alufa na Omega, Litanga ne Keheri. Inzi ndaha uyu oveeye nuvuluhu ikisinukiruchaamazi gi livamwoyo, anwi vugira imituungu. 7Mundu woosi uliguuta alakanyoole imiandu yiji kutura ku inzi: Inzi ndava Nyasaye weve, naye alakave umwana wange. 8Navuzwa avuvuti, avatasuuvira avavihilirizi, aviiti, avaheyi, avakumu, avasigamiraa misambwa, na avavehi vosi uvwiyangu vwavo vulakave munyanza isambaa nu muliru kandi kibiriti; yilio nilio ilikuza lia kaviri.”

Jerusalemi imbia

9Mulala ku zingelosi saba avaari ni zibakuli saba, zizura amaduywa saba gukumaliriza, yaza ku inzi nambolera, “Hamba yinu, na ndakumanyia umwiha; mukali wu Mwana wi Ligondi.” 10Ndaali kandi mu Roho, na engelosi yang'inga nimbila mu kiguru kenene kandi kitaambi. Yamanyia Jerusalemi, Lidaala Litakatifu likaa kutura mwigulu ku Nyasaye. 11Liang'ereng'ana nu uvukumi vwa Nyasaye; lidaala liang'ereng'ana ovong'ereng'anu kuli vwi ligina lie Jasiperi, lilengeru ligali kuli igilasi. 12Liali ni lidiji linene kandi litambi, harara ni virivwa likomi na viviri; zingelosi likomi na vaviri valinda virivwa. Amita gi zihiiri zia avandu va Isiraeli likomi na vaviri gang'odwa ku virivwa zana. 13Virivwa vivaga viali ku vuli lovega. Vivaga ku lovega lwi vugwi, kandi ivindi vivaga ko lovega lwi Isavaalu; na virivwa vivaga viali lovega lwi Ivaale, kandi ivirivwa vivaga kolovega lwi madioli. 14Lidiji lie lidaala linene zana liumbakwa ku misingi zana komi na mbiri ija ng'odwa ku amiita kumi na mbiri agavatumwa.

15Engelosi yamoloma ninzi yaali ni imbimbu yi izahabu yu kubimira lidaala linene, ivirivwa vialio, kandi lidiji lialio. 16Lidaala linene zana liali ni izimbega zine zineng'ani uvutambi nu vuvambalaru. Yaabima kandi lidaala linene ni mbimbu yu kubimira: Ziaduka izikilomita 2,400. Uvutambi vwalio, nu vuvambalaru vwalio, harara nu uvudiguluku vwalio vwaleng'ana. 17Engelosi yaabima kandi lidiji lialio, nalio liaduuka zimita sitini kuzia igulu, kolondekana ku kibimu cha kazozo icha yatumikira. 18Lidiji yilio liali ni liumbakirwa amagina amakanyu guvuguli agalangwa Jasiperi, ni ilidaala zana liali lie zahabu indahi enzere; ovolengeru uvwere kuli vwi gilasi. 19Imisingi ji lidiji ji lidaala zana jasiafa na amagina izing'ano ziosi izindahi. Ligina liu kutanga liu umusingi liali liu uvulimu Jasiperi, liakaviri liali lia bulu liali isafire, liakavaga liali liu uvulimu agate liakane ni liu uvulimu emeralidi, 20liakatano iliakanyu onikisi, lia sita liali iliakanyu Karinelia, lia saba amayai nu uvulimu-kurisolaiti, lia munane bulu nu uvulimu berili lia tisa lia amayai-topazi, liali komi lia amaveere kurisopurase lia komi na moja ni bulu na uvulimu tarikwoisi, lia komi na mbiri muzambarao-amezisiti. 21Ivirivwa likomi na viviri viali izilulu likomi na ziviri; vuli kirivwa chalombwa ku ilulu ndala. Kandi inzira yi lidaala yaali izahabu enzere, yaali eng'ereng'anu kuli igilasi.

22Si ndaalora kandi Litembeli mu lidaala yilio mba, kigira Litembeli lialio nu Mwami Nyasaye Wuvunyali nu Mwana wi Ligondi. 23Lidaala linene zana siliveeye ni liuva anoho umweli ukwaka kulio mba, kigira uvukumi vwa Nyasaye vwalilaviza. Itaya yalio nu Mwana wi Ligondi. 24Izihiiri zilagenda mu uvulavu vwalio, na avami vi lirova valaleta uvukumi vwu uvutugi vwavo mulio. 25Ivirivwa vialio sivilahanwa mbasu gwosi kigira sihalava nu uvudiku mba. 26Kandi valeta lizominywa nu uvukumi vwi izihiiri mu lidaala zana. 27Kindu choosi kitaveeye kinifu kandi kitaveeye kesereze, anoho umundu okolaa ivindu vie voheyi kandi vovehi, sivalingira mu lidaala linene zana. Navuzwa yava avang'odwa mu kitabu chi livamwoyo chu Mwana wi Ligondi, nivo avalingira mu veng'ine.

Mugera gwi Livamwoyo

Currently Selected:

LIKUNULA 21: LOGOOLI

Highlight

Copy

Compare