LIKUNULA 20

1Maku ndaalora engelosi niyiika kutura mwigulu, nagumiyi ulufungu lwe gehena harara nu munyororo muliduhu mu mukono gwigwe. 2Yagumira ogoyoka zana, ogoyoka gwa kale yigwo ogoveeye Lidemoni anoho Setani, naagovoha nu munyororo ku mihiga eletu ndala. 3Engelosi zana yaagusiuva mu gehena ma naagikunika vudinyu, kandi naduya ku umuhuri, kunangwa guvuli kugaada zihiiri kandi mba kuduuka lwi mihiga elefu ndala jitweka. Navuzwa inyima wayaga gulakavohololwe, ku ing'inga engekeeke.

4Maku ndaalora zindeve ziu uvwami, kandi avandu viikara kuzio, na vahevwa uvunyali vwi likalaga. Kandi ndaalora imioyo ja avandu viitwa kigira vilwaza likuva lia Nyasaye. Sivali nivasigamiyi iking'ang'a anoho kifananyi chacho mba, anoho mu makono gaavo kandi sivali nivaduyiywi umuhuri mu uvweni vwavo kuva ikimanyiru chi king'ang'a yicho mba. Vasimuguka kandi vamiiha harara na Kristo ku mihiga elefu. 5Avakuzu vandi yavo vatigara sivasimuguka mba kuduuka mihiga elefu ndala. Yili nilio lisimuguka liu kutanga. 6Vaveeye nuvugasu yavo avaveeye ni lisanga mu lisimugukizwa liu kutanga. Likuza lia kaviri siliveeye ni zinguru kuvo mba; valava avasaalisi va Nyasaye kandi ava Kristo, na valamiha harara naye ku mihiga elefu ndala.

Liguutwa lia Setani

7Mihiga elefu ndala ni jakavita, Setani alavohololwa kutura mu vuhambe vwivwe, 8alatula ichova kugaada zihiiri ziosi iziasalana mu lirova liosi, avamanyikani kuli Goga na Magogi. Setani alavavungiza harara mu liihi, navo valava avanyingi kuli umuyeke ku lujinga lwinyanza. 9Vaasalana mu lirova liosi kandi nivakumbiriza amadara ga vandu va Nyasaye ni lidaala lia yayanza. Navuzwa umuliru gwatura mwigulu niguvadiviza. 10Maku Lidemoni, iliavagaadaa yilio, liasuuvwa mu inyanza yu muliru ni kibiriti, hiking'ang'a, harara numuporofeti wo vovehi ha vaali nivaasiuvwa; kandi navo valadambizwa ligali mbasu nu uvudiku mihiga ni mihiga.

Likalaga liu kumaliriza

11Ndaalora Nyasaye niyikaye kondeve enene indavu yu vwami. Ligulu ni lirova viagota imbiri weve; sivialoleka kandi mba. 12Ndaalora kandi avakuzu, avanene na vakekeeke, nivasingiyi imbiri wendeve yu uvwami. Ivitabu viakunulwa, kandi ikitabu kindi ekeveeye chi livamwoyo, chakunulwa. Avakuzu vakalagirwa kolondekana ni miyinzi javakolaa kuli gang'odwa mu vitabu yivi. 13Maku inyanza yaatuliza avakuzu vayo. Likuza ni kivala cha vakuzu kandi viatuliza avakuzu avaari mucho. Vakalagirwa kolondekana ni likora liavo. 14Maku likuza ni kivala cha vakuzu viasiuvwa mu inyanza yu muliru. Inyanza yu muliru yiyi nilio likuza lia kaviri. 15Umundu woosi wi lieta liilieliavula kong'odwa mu kitabu chi livamwoyo, yasiuvwa munyanza yu muliru.

Ligulu ni Lirova lihia

Currently Selected:

LIKUNULA 20: LOGOOLI

Highlight

Copy

Compare