ZING'ANO 20
20
Vogeri voveeye vulahi kuvita izahabu
1Kunwa iwaini inyingi ekolomba kuva mundu wi liyoga kandi musiru. Voveeye vusiru kuhambika.
2Utie mwami wu vutima kuli unyala kutia isimba ihugumaa nu vutima; kokora mwami ave nu vutima ni kuli kwisunga.
3Mundu musiru atangizaa mahangali, navuzwa voveeye vulahi kweleha kugo.
4Umulimi oveeye mugata ligali kulima mu ing'inga idukanaa, sialava nichokogesa mba.
5Zing'anagani ziu mundu ziveeye kuli amazi gu luliva, navuzwa mundu wovogeri vwu musi anyala kugadaha.
6Vuli mundu amolomaa kuli aveeye wu luyali kandi musuuvirifu, navuzwa nivwaha unyala kunyoola mundu musuuvirifu?
7Avana vaveeye ni ingavi niiva vaveeye na baba oveeye musuuvirifu kandi okolaa gaveeye amalungi.
8Mwami wikala kondeve yu vwami, amanyaa vudamanu lwa vololaa.
9Mundu anyala kumanya ligali zing'anagani zizie ziveeye zinungi, kandi yaatuliza vwoni vwivwe vwosi?
10Yahova adunyiraa vandu vaatumikira vigelo viu vugadi.
11Kali mwana amanyia liiva lilie kolondekana ku agakolaa; ulamanya niiva aveeye musuuvirifu kandi mulahi.
12Yahova yakuha zimoni kolola kandi amatu kuhulira.
13Niiva ulatumikira vwiyangu vuvwo vunyingi kugona, ulava mudaka. Okole miyinzi vuli ing'inga na ulava ni viukulia vinyingi.
14Muguli yilirira vuli ing'inga ndi uvuguli voveeye igulu, navuzwa ni yakatula ho yevoolavoola kuli anyooye vuguli vodoto.
15Niiva umanya makuva ga omoloma, oveeye ni kindu chu vuguli vutambi kuvita izahabu anaho magina guvuguli.
16Mundu oveeye musiru ligali alaangaa kutunga ligovi liu mugeni, gaduukanaa vindu vivie vivugulwi kuhambilira ligovi yili.
17Vindu via onyoora munzira itaveeye inungi ulaviyanza kuli chukulia kilahi ligali, navuzwa yaga nigakavita kilava kuli muyeke munwa mumwo.
18Onyoore amigizu malahi nulanyoola cha wenyaa; utazia mu vulwani nukikiri kwelohiza mba.
19Makuva ga vuzwa sigaveeye nimbisu mba. Welehe ku vandu vamoloma makuva gu vusiru.
20Niiva ulalaama baba woovo anoho mama woovo, limenya liilio lilahera kuli itaya isimaa mukisundi.
21Niiva unyoola vutugi vuvwo mu vudoto, sivulakokonya hanene mba.
22Utitungila vudamanu mba. Suuvira Yahova na alakokoonya.
23Yahova adunyiraa vandu vaatumikira vigero viu vugadi.
24Yahova yatovola zinzira zietu; kunangwa mundu anyala kumanya ndi zinzira zizie?
25Uganaganyie vulahi ligali imbiri wukikiri kulaga kuhaanira Nyasaye kihanwa unyala kwidula inyima.
26Umwami mugeri gamuduukira atange kumanya mundu okolaa vudamanu, maku ahaane mageri vugira livelelelwa.
27Roho gwumundu goveeye itaya ya Yahova, gwenyelerizaa zing'anagani ziumusi ziumundu.
28Umwami alazizagilira kuva mwami niiva uvwamihi vwivwe vulava vwagiligali, vwuvulungi kandi uvuduukanaa.
29Kwegomba zinguru zia vasoleri ni uvunyali vwaro kandi kuhaana luyali ku zimbuzi ziuvusakulu ni uvukumi kuvo.
30Liduywa lisalirizaa litulizaa vudamanu, likuywa lie zimbimbu likolomba kuva mulahi mugati mu mwoyo.
©Bible Society of Kenya, 2019