ZING'ANO 19
19
Nivulahi kuva mwikuziri
1Voveeye vulahi kuva mudaka, navuzwa ove musuuvirifu kuvita kuva mugadi musiru.
2Vugulu vugira limanya sivoveeye vulahi mba; kandi sivoveeye vulahi kudidikana ma ogote inzira mba.
3Avandu valala vidivizaa nivikolwa viavo visiru maku vadula Yahova.
4Avandu vatugi vanyola valina vahia kazozo, navuzwa vadaka sivanyala kuva harara na valina vakekeeke vavaveeye navo mba.
5Niiva mundu alavoora vovehi mukiyaro, alanyoola mageri; sialahononoka mba.
6Vuli mundu agerizaa kwiyaanziza ku vandu vi kivuni; vuli mundu yenya vulina na yavo vahaana vihaanwa.
7Kali aviiko vu mundu mudaka sivaveeye no vokonyi naye mba; siliveeye lio kugenyia kigira avula valina mba. Kali agelize ndi, sianyola mulina ku lovega lwilwe mba.
8Wekole mulahi, na uliga goosi gunyala; maku wizulizi gawigizwa kandi ulanenehizwa.
9Avulaho mundu ovola vovehi mukiyaro ohononokaa kohevwa mageri; mundu uyu yadiva.
10Avandu vasiru sivadukanaa komenya mu vutugi mba, kandi vatugwa sivadukanaa vamiihi vandu vinyumba yu vwamihi mba.
11Mundu naveeye novogeri, alagumira vutima vwivwe. Mundu na kogosera, ni vulahi kumusamiiha.
12Vutima vwu mwami voveeye kuli lifuuma lie isimba, navuzwa liyaanza lilie liveeye kuli liza lie imbura.
13Mwana musiru aleteraa baba weve lidivizwa. Mukali murembani aveeye kuli mazi gatonyatonya do-do-do.
14Umundu anyala kuvugura inyumba na mabese kutura ku vivuli veve, navuzwa Yahova alamuha mukali mugeri.
15Unyala kuva mugata niiva wenyaa vugata; zizagilira kogona zindolo, navuzwa ulava ninzara.
16Ulindi malago ga Nyasaye na ulahindira; niiva ulagaleka, ulakuza.
17Mundu nahaana vindu vivie ku vadaka, gaveeye kuli kwegobiza Yahova, na Yahova alakwilanyira.
18Uhaane amageri ku vana vovo nivakikiri vasoleri vaduuke kwiga; Niiva siulakola ndio, uvakonyaa kwidiviza.
19Niiva mundu aveeye nu vutima vululu muleke anyoore agadukanaa naye. Niiva ulamutuliza mu vudinyu ing'inga indala, gadukanaa umukonye kandi.
20Niiva ulahuliriza miigizu ma ove ni lienya kwiga, lidiku lilala ulava mugeri.
21Avandu vanyara kulohiza vindu viosi viavanyala, navuzwa lienya lia Yahova lizizaa kwekoleka.
22Sivoveeye vulahi mundu kuva muhuvaali mba; vandu vadaka vaveeye vulahi kuvita vavehi.
23Utie Yahova na ulahindira, ulasosa kutura mu linyang'ana.
24Avandu valala vaveeye avagata ligali, kali sivanyala kuviika chukulia mu minwa jaavo mba.
25Mundu mwigingiri gamuduukira ahevwe mageri, kunangwa vandu vatamanyi kindu choosi kuduuka vigi. Niiva oveeye mugeri uliga lwa wigizwa.
26Mundu wi kirage kandi utaveeye nu vuyanzi, aladambiza baba weve anaho akungi mama weve kutura hango hehe.
27Mwana wange, lwa ulekelaa kwiga ulaleka vwangu aga umanyi.
28Sihaveeyeho ni likalaga lirungi hu muloli asaaviyi kusaliriza wundi mba, vandu vachamu vayaanza kokora vudamanu.
29Avandu vekehenyahenye vetegeki kunyoola mageri, kandi avandu avasiru vetegeki kukuywa zimbimbu mu migongo.
©Bible Society of Kenya, 2019