ZING'ANO 21
21
Yahova aveeye Wuvunyali
1Yahova aveeye nuvunyari ku zing'anagani ziu mwami kuli yemilira inzira yu mugera.
2Unyala kuganagana ndi kindu choosi chokolaa keveeye kilungi, navuzwa wizulizi ndi Yahova yamanya gaveeye mu mioyo jietu kandi nu mukalagi wilienya liilio.
3Kokora gaveeye malungi kandi gilikalaga lirungi, gayaanziza Yahova kuvita kumuletera visiuviliru.
4Avandu vachamu vamifwa ni liegingira kandi lielola, yaga nuvwoni.
5Olohizi vulahi ligali na ulava nivindu vinyingi; niiva ulakola vwangu vwangu siulava navio vinyingi mba.
6Vutugi vwonyoola munzira yovovehi vulagota vwangu, kandi vulakwimilira munzira yi likuza.
7Vandu vachamu valadiva kolondekana ni kirage chavo, vasuura kokora vulungi.
8Inzira yumundu mudamanu eveeye yu vuchamu, navuzwa inzira yumundu mulungi eveeye inungi.
9Ni vulahi komenya kwigulu kwinyumba kuvita komenya munyumba harara numukali mulembani.
10Avandu vachamu vayanza kokora vudamanu kazozo sivaveeye ni zimbavasi nu mundu woosi mba.
11Lwu mundu wikirage anyoora mageri, kali mundu utaveeye niziganagani anyoora mageri. Mundu wovogeri aliiga kutura ku gayigizwaa.
12Nyasaye aveeye mulungi, yamanya zinyumba ziavandu vachamu kandi aladiviza avandu vu vuchamu.
13Nusuula kuhuliriza kulianira liumundu mudaka, lianira liilio kwenya ovokonyi sililahulirizwa mba.
14Kihanwa chu muvwivisu kehozerizaa vutima; kandi viambeti viumuvwivisu vihomatizaa vutima vululu.
15Lwuvulungi vokolwa voveeye vusangali ku vandu valungi, navuzwa voveza vovereri ku vandu vakora vudamanu.
16Mundu woosi uturaa kunzira yilimanya, aladuuka mulikuza.
17Mundu oveeye muliiva liukwiyaanziza, alava mundu mudaka, kandi oyo uyanzaa iwaini na maguta sialava mutugi mba.
18Avandu vachamu valatunga ligovi lia valungi, na vandu vataveeye vasuuvirifu valatunga ligovi lia vasuuvirifu.
19Nuvulahi komenya muchangalangwe kuvita komenya harara nu mukali mulembani kandi wukwililira.
20Avandu vovogeri vamenya mu miandu kandi muvutugi, navuzwa vandu vasiru vatumikira mabese gaavo goosi nonoho lwa vaganyoola.
21Ove ni zimbavasi kandi musuuvirifu na ulahindira, avandi valahaana luyali kuivi kandi valakokolera vulahi.
22Mundu mugeri alavugula lidaala lia vezingulu, kandi aladiviza zimbinga ziavo zia vasuviraa mu.
23Nuwenya kutura muvudinyu wilindi kugovoolaa.
24Mundu wi kehenyahenye lieta lilie nu mwelori kandi wi kirage, akolaa vindu ni kirage chu vwelori.
25Mundu mugata usulaa kokora miyinzi yiyitaa; 26goosi agakolaa nu kuganagana ku viayenyaa kuva navio. Navuzwa mundu mulungi ahaanaa nu mwoyo gwosi.
27Yahova siayanzilira visiuviliru via vandu vachamu mba, siaviyanzilira ligali niiva valahaana niliiva liu vudamanu mba.
28Muloli wu vugadi aladiva, navuzwa makuva gu mundu hulira galahindira.
29Vandu valungi visuuvirizaa, navuzwa vandu vachamu vekola kuva valahi.
30Vogeri vwu mundu, vwideri kandi limanyiriza si viveeye novokonyi niiva Yahova yamusula mba.
31Unyala kwetegekiza zibarasi mu vulwani, navuzwa Yahova niye uhaana liguuta.
©Bible Society of Kenya, 2019