ZING'ANO 18
18
Voveeye Vudamanu kuyaanzilira vandu Vadamanu
1Vandu vatahulirizanaa na vandi viyanza; vahing'ana na agavandi vamanyi kuva malungi.
2Musiru si ahendaa mwoyo kumanya kindu mba, chayenyaa vuzwa ni kumanya kuli aveeye mugeri.
3Vwoni ni zisoni viveeye kindu kilala. Nogotiza luyali lulwo ulakolelwa kehenyahenye.
4Makuva gumundu ganyala kuva kisinukiru chovogeri, gaveeye musi kuli inyanza kandi malahi kuli mugera guvitaa.
5Sivoveeye vulahi kuyaanzilira mundu mudamanu nu kwigalira mundu utaveeye nimbala konyoora vulungi mba.
6Makuva gumundu musiru galetaa volembani, goosi agaavoola galetaa vudinyu kuye.
7Lwu mundu musiru amolomaa, yidivizaa; agumilwa numutego gwamakuva gege mwene.
8Amakuva gumumonyi gaveeye kuli chukulia kilahi, kuyaanza kugavugula nukugaviika mu zing'anagani zietu.
9Mundu mugata aveeye mudamanu kuli mundu udiviza.
10Yahova aveeye kuli munara gwizingulu gwumulungi yirukira mu anyoore vohonyi.
11Avandu vatugi vaganagana ndi, vutugi vwavo vuvakingaa kuli lidigi litambi lie zinguru liakumberiza lidaala.
12Avulaho mundu unyala konyoora luyali, nategehizi, avandu vikirage vaveeye kunzira yu kudivizwa.
13Uhulirizi kutanga, nukikiri kuhaana mativuli, na nutakoli ndio oveeye musiru kandi muzalirizi
14Mwoyo gwumundu gwikuziraa kuvulwaye, navuzwa nivwaha unyala kwikuzira ku vudinyu vwumwoyo gumali kuvunika?
15Mundu mugeri anyoora limanya, kandi gutu gwu mugeri gwenyelerizaa limanya.
16Kihanwa chu mundu kimwiguliraa viliango vinyingi kandi kimwimiliraa kuduuka imbiri wavandu avanene.
17Mundu wukutanga komoloma mu kiyaalo alolekaa kovora agiligali kazozo, kuduuka lwumusigu weve atangaa kumuteeva mateeva.
18Niiva vandu vaviri vizingulu vahing'ana mu kiyaalo, likuba zikuura lilavukanya vosoolo vwavo.
19Okonye amwavo woovo naye alakukinga kuli lidigi liezingulu lie lidaala, navuzwa nolembana naye alakuhanira muliango gwigwe.
20Mundu alamenya kolondekana na makuyu kutura ku makuva goosi gavoora; aligutizwa na makuva geege.
21Amakuva agovoola galahonya livamwoyo anaho galalidiviza, kunangwa gakuduukiraa uvugiliri makuyu ga makuva googo.
22Oyo onyoora mukali, umali konyoora kindi kilahi kandi anyoora liyaanzilira kutura ku Yahova.
23Lwa vandu vadaka vamoloma, gavadukiraa vasave mu ligoonya kandi mugalaha, navuzwa lwa vandu vatugi vahaana mativuli, vaveeye nu vululu.
24Vaveeye ho avandu valala avigadaa kuva avalina, navuzwa aveeye ho nu mulina wahimbi ligali kuvita amwavo woovo.
©Bible Society of Kenya, 2019