ZING'ANO 17
17
Yahova Agerizaa Zing'anagani zia Vuli Mundu
1Ni vulahi kulia lidonye liu vuchima likaya mu mirembe kuvita kuva ni lilia linene munyumba yizuuyi vudinyu.
2Mutumikiri wovogeri alamiiha mwana wu mwami weve utaveeye nuvunyari kandi alanyoola kedonye ku miandu kuli mulala ku va mwavo veve.
3Izahabu ni ifeza zigelizwa kuvitira mumuliru, kandi Yahova agerizaa mwoyo gwu mundu.
4Avandu vadamanu vahuliriza zing'anagani zindamanu kandi vavehi vahuliriza ovovehi.
5Mundu osekerizaa umudaka anyegaa Nyasaye wamulomba. Oyo uyaanziliraa kivi alanyoola mageri.
6Avaguuga vekonyela aviisukulu vaavo, kuli avana vekonyela avababa vaavo.
7Vandu vu luyali sivavolaa ovovehi mba, kandi avasiru sivaveeye nikindu kilahi chavanyala kovora mba.
8Avandu valala vaganaganyia ndi viambeti viyinzira kuli vukumu, vasuviraa vinyala kokora kindu choosi.
9Niiva olenya vandu vakuyaanze; uvasamihi uvudamanu vwa vakokolera wizulizi ndi vudamanu voletaa ovolegani hagati huvulina.
10Mundu mugeri yiiga amanyingi kutura ku ligondokelwa, navuzwa musiru yiiga kutura ku likubwa haali mia.
11Mundu mudamanu yenyeleriza kokora liebaala, navuzwa mutumwa mululu alatumwa kuzia kumulwana.
12Ni vulahi kwagana ni idubu imali kunyagwa avana vayo, kuvita kwagana nu mundu musiru mu miyinzi jije, ju vusiru.
13Nutungiza uvudamanu havogono hu vulahi vudamanu si vulatula munyumba yooyo mba.
14Litanga lie lihing'ana liveeye kuli ligalira lia mazi; ugigariri nigakiri kuzia ihale.
15Uyu okolaa vuchamu kuva uvulungi kandi ukalagiraa avalugi, vombi vaveeye vu kuvihiliriza ku Yahova.
16Gaveeye na vokonyi ki mundu musiru kutumikira mabese konyoora ovogeri kuvataveeye ni limanya?
17Mulina amanyia vuyanzi vuli ing'inga, navuzwa amwavo aveeye ho kokonya ing'inga yu vudinyu.
18Mundu utaveeye novogeri niye unyala kuvungilira kutunga ligovi liu mundu wundi.
19Kuyaanza kokora vwoni ni kuli koleta vudinyu. Niiva uligingilira ing'inga yoosi weyenyela vudinyu.
20Mundu woosi wi zing'anagani ziu vuchamu, sialanyoola madanyi mba, na mundu oveeye nu vugadi alanyoola kivi.
21Mwana musiru aveeye vuliduhu ku baba, na baba wu mwana musiru siaveeye nuvusangali mba.
22Kuva nu vuyanzi kolomba mundu kuva nu vulamu. Kuduunya ing'inga yoosi ni likuza liagalaha.
23Vakalagi vadamanu vavugilira vaimbeti mu vwivisu, sivakora vulungi mba.
24Mundu wilimanyiriza akolaa vindu viovogeri, navuzwa mundu musiru akolaa vindu viu vusiru ku lirova.
25Mwana wu vusiru aveeye vuliduhu ku baba weve kandi vuzunu ku mama weve.
26Sivoveeye vulahi mundu utaveeye nimbala kuhiola, ageligali, gagota lwa vandu valungi vanyoola mageri.
27Mundu utamoloma makuva manyingi aveeye nilimanya. Mundu wagalaha aveeye nilimanya liu mugati ligali.
28Kali musiru oveeye muchiring'anu aganaganwa kuva wi limanya kandi mugeri, kali niiva alachiringana na akuniki munwa gwigwe.
©Bible Society of Kenya, 2019