ZING'ANO 16
16
Likuva lia Yahova liu kumaliriza
1Kunyala kuva ni lilohiza lietu, navuzwa Nyasaye aveeye ni likuva liukumaliriza.
2Unyala kuganaganyia ndi viosi viokolaa viveeye vilahi, navuzwa Yahova akalagira zing'anagani zizio.
3Teva Yahova agaasizi lilohiza liilio, na limaliriza lia lio lilava lilahi.
4Vindu viosi via Yahova yalomba viveeye nekeheri cha vio, ne keheri chu mundu mudamanu ni kudivizwa.
5Yahova adunyiraa mundu woosi oveeye mwelori, na sialahononoka kohevwa mageri mba.
6Utie kandi ove musuuvirifu na Nyasaye alakusamiiha vwoni vuvwo. Utie Yahova nu uvudamanu vwosi sivulekoleka ku ivi mba.
7Niiva ulayaanziza Yahova, ulalomba vasigu vovo kuva valina.
8Ni vulahi kuva ni vikekeke vionyooye mu vusuuvirifu, kuvita kunyoola vinyingi vitaveeye viu vusuuvirifu.
9Unyala kuva ne lilohiza liilio, navuzwa Nyasaye yimiliraa vikolwa vivio.
10Mwami omoloma ni zinguru zia Yahova likalaga lilie liveeye lirungi vuli kazozo.
11Yahova yenya vigelo viosi vive visuuvirifu, na vuli kegelo keve cha giligali.
12Avami sivayanzaa vudamanu mba, kigira agiligali nigo galombaa vwamihi kuva ni zinguru.
13Mwami yenya kuhulira agiligali kandi alayaanzilira yavo avamolomaa agiligali.
14Mundu mugeri agerizaa kokora mwami ave nu vuyanzi; niiva mwami alava nu vutima, mundu anyala kukuza.
15Liyaanzizwa liu mwami liveeye kuli malesi galetaa imbura mu ing'inga yi vindu komela lwi livamwoyo liveeye ho.
16Ni vulahi ligali kuva no vogeri kandi ni limanya kuvita kuva ni zahabu harara ni ifeza.
17Yavo avaveeye avalahi vagenda kunzira itaveeye nuvudamanu; kunangwa muhenzerizi wamuzizaa, na munyala kuhonyia livamwoyo lienyu.
18Lielola liduukiza mundu mulidiva, kandi liegingira likora mundu kugwa.
19Ni vulahi kuva muhocha ma ove mudaka, kuvita kuva mulala ku vandu vi liegingira kandi konyoora ku mugavo gwi vilaanye viavo.
20Uhulirizi gawigizwaa, na ulanyora madanyi; usuuviri mu Yahova na mulava no vuyanzi.
21Mundu mugeri amanyikanaa ku limanyiriza lilie. Amakuva geege manyingi malahi gamukolaa kuva wokogoonya.
22Ovogeri voveeye kisinukiru chi livamwoyo ku mundu mugeri, navuzwa kogeliza kwigiza vandu vasiru nu kwononyia vwiyangu.
23Avandu avageri vaganagana imbiri wa vakikiri komoloma; na ga vavola gaveeye gu kuyaanziza.
24Amakuva malahi gaveeye kuli vwuki, gaveeye amalahi ku kuhulira, kandi malahi ku vulamu vwu muviri gugwo.
25Eveeyeho inzira elolekaa kuva inungi ku mundu, navuzwa keheri chayo keveeye likuza.
26Inzara yu muyinziri imukolaa kuyinzira vudinyu, kigira yenya kwiyigutiza.
27Avandu vadamanu valohiza kokora vudamanu kali makuva geege gasambaa kuli muliru.
28Avandu vachamu valandiza makuva gavuzwa, vatangiza kirage kandi vagotiza vulina.
29Avandu vi kirage vagada valina vaavo kandi vavimilira kuzia mu vudinyu.
30Mundu uvunyavunyaa zimoni zizie, alohizaa kokora uvuchamu; kandi uyu usurunyaa minwa jije, aletaa uvudamanu.
31Lihindira liveeye madanyi ga vandu valungi; zimbuzi ziveeye itaji yu vukumi.
32Ni vulahi kuva mwikuziri kuvita kuva wi zinguru. Nivulahi kwilinda kuvita kuguuta madaala manene.
33Avandu vakuba zikuura kumanya lienya lia Nyasaye, navuzwa Nyasaye mwene ahaanaa mativuli.
©Bible Society of Kenya, 2019